T20 ક્રિકેટનો સર્વશ્રેષ્ઠ ખેલાડી કોણ છે, તે અંગે ચાહકોમાં હંમેશા ચર્ચા ચાલતી રહે છે. સામાન્ય રીતે ક્રિસ ગેલ, વિરાટ કોહલી કે એબી ડી વિલિયર્સ જેવા વિસ્ફોટક બેટ્સમેનોના નામ પહેલા આવે છે. પરંતુ અફઘાનિસ્તાનના સ્પિનર રાશિદ ખાને આ મામલે અલગ પસંદગી કરી છે.
રાશિદ ખાન પોતે T20 ક્રિકેટનો ખતરનાક ખેલાડી મનાય છે, જે પોતાની બોલિંગથી મેચનું પાસું પલટી શકે છે. તાજેતરમાં એક ક્રિકેટ પોર્ટલે તેની સાથે પસંદગીની રમત રમાડી હતી.
આ રમતમાં તેને રાઉન્ડમાં બે ખેલાડીઓના વિકલ્પ આપવામાં આવ્યા હતા. તેમને સર્વકાલીન મહાન T20 ક્રિકેટર પસંદ કરવાના હતા.
પહેલા રાઉન્ડમાં રાશિદ ખાન અને સુનીલ નારાયણ વચ્ચે પસંદગી આવી, ત્યારે રાશિદે પોતાનું નામ પસંદ કર્યું. ત્યારબાદ આન્દ્રે રસેલ અને એબી ડી વિલિયર્સમાંથી ડી વિલિયર્સને પસંદ કર્યા.
ક્રિસ ગેલ અને વિરાટ કોહલી વચ્ચે મુકાબલો થયો, ત્યારે રાશિદે કોહલીને પસંદ કર્યો. પહેલા રાઉન્ડની છેલ્લી જોડીમાં જસપ્રીત બુમરાહ અને કિરોન પોલાર્ડ હતા, જેમાં તેમણે બુમરાહને પસંદ કર્યો.
બીજા રાઉન્ડમાં રાશિદ ખાન સામે પોતાનું અને ડી વિલિયર્સનું નામ હતું. તેમણે પોતાને બાકાત રાખીને ડી વિલિયર્સને આગળ વધાર્યા.
બીજી તરફ વિરાટ કોહલી અને જસપ્રીત બુમરાહ વચ્ચે પસંદગી આવી, ત્યારે તેમણે બુમરાહને પસંદ કર્યો.
આમ, અંતિમ રાઉન્ડમાં એબી ડી વિલિયર્સ અને જસપ્રીત બુમરાહ આમને-સામને હતા. રાશિદ પાસે બે જ વિકલ્પ બચ્યા હતા.
બેટ્સમેનો માટે કાળ સમાન ગણાતા જસપ્રીત બુમરાહને તેમણે 'તેજસ્વી અને અદ્ભુત' ગણાવીને પોતાની અંતિમ પસંદગી બનાવી. રાશિદ ખાનના મતે જસપ્રીત બુમરાહ જ સર્વકાલીન મહાન T20 ક્રિકેટર છે.
32 વર્ષીય જસપ્રીત બુમરાહ આજે વિશ્વના સૌથી ખતરનાક બોલરોમાંનો એક છે. તે પોતાના દમ પર હારેલી બાજી પલટી નાખવાની તાકાત ધરાવે છે.
બુમરાહે ભારત માટે 52 ટેસ્ટમાં 234 વિકેટ, 91 વનડેમાં 151 વિકેટ અને 100 T20 આંતરરાષ્ટ્રીય મેચોમાં 126 વિકેટ ઝડપી છે.
બુમરાહના ઓવરઓલ T20 કરિયરમાં તેણે આંતરરાષ્ટ્રીય, ફ્રેન્ચાઇઝી અને સ્થાનિક ક્રિકેટ મળીને કુલ 288 T20 મેચ રમી છે. આ 288 મેચોમાં તેણે 354 વિકેટ લીધી છે.
આ ફોર્મેટમાં તેણે 2 વખત 5 વિકેટ લેવાની સિદ્ધિ મેળવી છે. ખાસ વાત એ છે કે બેટ્સમેનોના દબદબાવાળા T20 ક્રિકેટમાં પણ તેનો ઈકોનોમી રેટ માત્ર 6.97 રહ્યો છે, જે તેની મહાનતા દર્શાવે છે.
રાશિદ ખાનના મતે ભારતીય ફાસ્ટ બોલર જસપ્રીત બુમરાહ સર્વકાલીન મહાન T20 ક્રિકેટર છે. તેમણે બુમરાહને 'તેજસ્વી અને અદ્ભુત' ગણાવ્યો હતો.