બોલિવૂડ અભિનેતા રણવીર સિંહના નાના ડૉ. રામ હિંગોરાણીનું 96 વર્ષની વયે અવસાન થયું છે. દિવાળીના શુભ દિવસે, લક્ષ્મી પૂજાના પાવન સમયે તેમણે અંતિમ શ્વાસ લીધા હતા. રણવીરની કઝિન બહેન સૌમ્યા હિંગોરાણી ઠાકરેએ સોશિયલ મીડિયા પર ભાવુક પોસ્ટ દ્વારા આ સમાચારની પુષ્ટિ કરી હતી.
સૌમ્યાએ ઇન્સ્ટાગ્રામ પર દાદુ સાથેની બાળપણ અને યુવાનીની યાદગાર તસવીરો શેર કરી છે, જેમાં યુવાન રણવીર પોતાના નાના સાથે પ્રેમભરી ક્ષણો માણતો જોવા મળે છે. તેણે લખ્યું, 'મારા દાદુ, ડૉક્ટર રામ, દિવાળીના પ્રસંગે આપણને બધાને છોડીને દાદી પાસે ચાલ્યા ગયા. તેમણે પોતાના માટે આનાથી વધુ શુભ સમય પસંદ ન કર્યો હોત, દિવસનો સૌથી શ્રેષ્ઠ સમય, લક્ષ્મી પૂજાનો સમય. હું શરત લગાવી શકું છું કે બંને પોતાની ખુરશી પર બેસી ગયા હશે અને આપણને બધાને જોઈને એન્જોય કરી રહ્યા હશે. સૌથી વ્હાલા દાદુ બનવા માટે તમારો ખૂબ-ખૂબ આભાર. તમે અમને બધું જ આપ્યું. મારા માટે પણ આઈસ્ક્રીમ બચાવીને રાખજો, ત્યાં સુધી જ્યાં સુધી આપણે ફરી ન મળીએ. હરિ ઓમ.'
રણવીર સિંહ પોતાના નાના સાથે ખૂબ જ ઊંડો અને મજબૂત સંબંધ ધરાવતો હતો. ફિલ્મ 'રોકી ઔર રાની કી પ્રેમ કહાની'ના પ્રમોશન દરમિયાન રણવીરે પોતાના નાના સાથેનો એક વીડિયો ફેન્સ સાથે શેર કરીને તેમની મુલાકાત કરાવી હતી. તે સમયે તેમના નાના 93 વર્ષના હતા અને તે ઉંમરે પણ તેઓ અત્યંત ઉત્સાહ સાથે રણવીર સાથે ફિલ્મનું સુપરહિટ ગીત 'ઝુમકા ગિરા રે' પર ડાન્સ કરતા જોવા મળ્યા હતા. નાનાનો એ એનર્જેટિક અને સુપરકૂલ અંદાજ સોશિયલ મીડિયા પર ભારે વાયરલ થયો હતો.