રણબીર કપૂરની આગામી ફિલ્મ 'રામાયણ' દિવાળી પર રિલીઝ થવાની છે. ત્યારે નવી પેઢીને રામાયણના સનાતન મૂલ્યો સાથે જોડવા માટે OTT પ્લેટફોર્મ જિયોહોટસ્ટારે નમિત મલ્હોત્રાની 'રામાયણ' અને IIMUNના સહયોગથી 'હર યુગ મેં રામઃ અ કન્વર્ઝેશન વિથ યંગ લીડર્સ'નું આયોજન કર્યું હતું. આ કાર્યક્રમમાં દેશભરમાંથી લગભગ 20,000 વિદ્યાર્થીઓને એક મંચ પર લાવવામાં આવ્યા હતા.
મુંબઈના IIMUN મુખ્યાલયે યોજાયેલી આ ઇવેન્ટમાં કાશ્મીરથી કન્યાકુમારી સુધીના 18 શહેરોની 500થી વધુ શાળાઓના વિદ્યાર્થીઓએ ભાગ લીધો હતો. લાઇવ સેશનમાં 150 વિદ્યાર્થી નેતાઓ રૂબરૂ હાજર રહ્યા હતા, જ્યારે અન્ય વિદ્યાર્થીઓ વર્ચ્યુઅલી જોડાયા હતા. આ કાર્યક્રમમાં નિતેશ તિવારી, નમિત મલ્હોત્રા, રણબીર કપૂર અને રવિ દૂબે ઉપસ્થિત રહ્યા હતા. વિદ્યાર્થીઓએ મહાકાવ્યના સ્થાયી મૂલ્યો, પાત્રો અને આજના સમયમાં સંબંધોની પ્રાસંગિકતા પર ખુલીને ચર્ચા કરી હતી. આ સંવાદનો એક ખાસ એપિસોડ તૈયાર કરવામાં આવ્યો છે, જે 1 નવેમ્બરથી જિયોહોટસ્ટાર પર સ્ટ્રીમ થશે.
'રામાયણ'માં શ્રીરામની ભૂમિકા ભજવી રહેલા રણબીર કપૂરે કહ્યું, 'રામની વાર્તા પેઢીઓથી આપણા જીવનનો હિસ્સો રહી છે, અને તેમના પાત્રમાં ઢળવું એ મારા માટે અત્યંત વિનમ્રતાપૂર્ણ અનુભવ રહ્યો છે. આ સંવાદને જે બાબતે ખાસ બનાવ્યો, તે એ હતો કે યુવા મન આ વાર્તા સાથે પોતાની રીતે જોડાય છે. આ વાર્તા એ બાબતની યાદ અપાવે છે કે, દરેક પેઢી રામ સાથે અલગ રીતે જોડાઈ શકે છે, છતાં પણ તેમની આ મુસાફરીમાં કંઈક એવું અનુભવી શકે છે જે ખૂબ જ જાણીતું અને સનાતન હોય.'
ફિલ્મના ડિરેક્ટર નિતેશ તિવારીએ કહ્યું કે, 'રામાયણની સમૃદ્ધિ એ વાતમાં છે કે, તેના ભવ્ય પ્રસંગોની સાથે સાથે તેના પાત્રો અત્યંત માનવીય પસંદગીઓ અને લાગણીઓનો સામનો કરે છે. ફિલ્મ નિર્માતા તરીકે, નવી પેઢી માટે આ વાર્તાને પડદા પર લાવતી વખતે તે ભાવનાત્મક સત્યને જાળવી રાખવાની અમારી જવાબદારી હતી. વિદ્યાર્થીઓને આ પાત્રો વિશે પ્રશ્નો પૂછતા, પડકારતા અને પોતાની રીતે તેનું અર્થઘટન કરતા સાંભળવા એ એ વાતની સુંદર યાદ અપાવે છે કે આ વાર્તા શા માટે આટલી અમર છે.'
'રામાયણ'ના પ્રોડ્યુસર નમિત મલ્હોત્રાએ કહ્યું કે, 'રામાયણે આપણને પેઢી દર પેઢી એવી વાર્તાઓ, મૂલ્યો અને પાઠ આપ્યા છે, જે આજે પણ આપણું માર્ગદર્શન કરે છે. આ મહાકાવ્યને મોટા પડદા પર લાવવાની સાથે એ પણ એટલું જ મહત્વનું છે કે, યુવાનો આ મૂલ્યોને ઓળખે અને તેમની સાથે પોતાનો સંબંધ શોધે. આ વિદ્યાર્થીઓ ચર્ચામાં જે જિજ્ઞાસા, પ્રામાણિકતા અને દૃષ્ટિકોણ લાવ્યા, તેણે આ સંવાદને ખરેખર અદ્ભુત બનાવ્યો. હજારો વર્ષો જૂની વાર્તા આજે પણ નવી પેઢી સાથે એટલી જ સુસંગત છે, તે જોવું ખૂબ જ આનંદદાયક છે.'
ફિલ્મમાં લક્ષ્મણની ભૂમિકા ભજવી રહેલા રવિ દૂબેએ કહ્યું, 'લક્ષ્મણનું પાત્ર ભજવવાથી મને નિષ્ઠા, પ્રેમ અને અટલ કર્તવ્યનિષ્ઠા પર આધારિત સંબંધને અનુભવવાની તક મળી. આ સંવાદ દરમિયાન મને જે બાબતે સૌથી વધુ આકર્ષિત કર્યો, તે એ હતો કે યુવાનો આ સંબંધો અને નિર્ણયોને પોતાના અનુભવોના દૃષ્ટિકોણથી કેવી રીતે જુએ છે. આ ચર્ચાએ મને પણ લક્ષ્મણને નવી રીતે જોવાની દૃષ્ટિ આપી, અને આ પહેલનો હિસ્સો બનવાનો આ સૌથી મોટો સંતોષજનક અનુભવ હતો.'