રણબીર કપૂર: 'એક્ટર તરીકે આ મારો છેલ્લો દાયકો, હવે દિગ્દર્શન તરફ વળવું છે'

બોલિવૂડ અભિનેતા રણબીર કપૂરે જણાવ્યું છે કે એક્ટર તરીકેની તેમની કારકિર્દીનો આ છેલ્લો દાયકો હોઈ શકે છે. તેમણે કહ્યું કે તેઓ ધીમે-ધીમે દિગ્દર્શન તરફ આગળ વધવા માંગે છે અને આગામી બે-ત્રણ વર્ષમાં પોતાની પહેલી ફિલ્મનું દિગ્દર્શન કરવાનો ઇરાદો ધરાવે છે.

રણબીરે આ વાત ફિલ્મ 'રામાયણ'નાં સહ-કલાકાર સાઈ પલ્લવી સાથે બીબીસી એશિયન નેટવર્કને આપેલા ઇન્ટરવ્યુમાં કહી હતી. તેમણે સ્પષ્ટ કર્યું કે આનો અર્થ એ નથી કે તેઓ તરત જ અભિનય છોડી દેશે. હાલમાં તેમની પ્રાથમિકતા આવનારી ફિલ્મોનું શૂટિંગ પૂરું કરવાની છે.

રણબીરે જણાવ્યું કે તેમણે થોડા મહિના પહેલાં જ પોતાની પહેલી ફિલ્મની સ્ક્રિપ્ટ લખવાનું શરૂ કર્યું છે. તેમણે કહ્યું, 'આ ખૂબ જ મુશ્કેલ કામ છે. લેખકો અને સર્જકો માટે મારા મનમાં ઘણું સન્માન છે. હું વિચારું છું કે આખરે તેઓ વાર્તાઓ કેવી રીતે બનાવે છે.'

તેમના મતે દિગ્દર્શકને વાર્તા કહેવામાં અને આખી ટીમ સાથે તેને પડદા પર ઉતારવામાં ખાસ સર્જનાત્મક સંતોષ મળે છે.

રણબીરે સ્પષ્ટ કર્યું કે પોતાની પહેલી ફિલ્મનું દિગ્દર્શન કરતી વખતે તેઓ તેમાં અભિનય નહીં કરે. તેમણે કહ્યું કે અભિનેતા અને દિગ્દર્શકની જવાબદારીઓ અલગ હોય છે. અભિનેતા પોતાનો શોટ આપ્યા પછી આગલા દૃશ્યની રાહ જુએ છે, જ્યારે દિગ્દર્શક વાર્તા અને ફિલ્મના દરેક પાસા વિશે વિચારતો રહે છે.

દિગ્દર્શક તરીકે તેમની પસંદગી અંગે રણબીરે કહ્યું કે તેઓ કૌટુંબિક નાટ્ય (ફેમિલી ડ્રામા) અને જીવન સાથે જોડાયેલી વાર્તાઓ બનાવવાનું પસંદ કરશે. તેમણે હજુ કોઈ ચોક્કસ જોનર નક્કી કર્યો નથી. તેમણે પોતાની મનપસંદ ફિલ્મોમાં 'લાઇફ ઇઝ બ્યુટિફુલ', 'ઇટ્સ અ વન્ડરફુલ લાઇફ' અને રાજકુમાર હિરાણીની ફિલ્મોનો ઉલ્લેખ કર્યો. તેમની ઇચ્છા એવી ફિલ્મ બનાવવાની છે જે જોઈને દર્શકોને સારું લાગે.

રણબીરે જણાવ્યું કે તેઓ વર્ષમાં આશરે 100થી 125 દિવસ શૂટિંગમાં વ્યસ્ત રહે છે. બાકીનો સમય તેઓ વાર્તા લખવા અને નવા વિચારો પર કામ કરવામાં વિતાવી શકે છે. તેમણે કહ્યું કે પહેલાં 'બ્રહ્માસ્ત્ર 2', 'એનિમલ પાર્ક' અને 'રામાયણ પાર્ટ 2'નું કામ પૂરું કરવા માંગે છે. ત્યારબાદ આગામી બે-ત્રણ વર્ષમાં પોતાની પહેલી ફિલ્મ ફ્લોર પર લાવવાનો પ્રયાસ કરશે.

રણબીરનો પરિવાર ફિલ્મ નિર્માણ અને દિગ્દર્શન સાથે જોડાયેલો રહ્યો છે. તેમના પિતા રિશી કપૂરે 1999માં ફિલ્મ 'આ અબ લૌટ ચલે'નું દિગ્દર્શન કર્યું હતું, જેમાં અક્ષય ખન્ના અને ઐશ્વર્યા રાય જોવા મળ્યાં હતાં. રણબીરે નાની ઉંમરે પિતા સાથે ફિલ્મ નિર્માણ નજીકથી જોયું હતું. તેમણે સંજય લીલા ભણસાલીની ફિલ્મ 'બ્લેક'માં સહાયક દિગ્દર્શક તરીકે પણ કામ કર્યું હતું.

રણબીરે 2007માં ફિલ્મ 'સાંવરિયા'થી બોલિવૂડમાં અભિનેતા તરીકે પ્રવેશ કર્યો હતો. લગભગ બે દાયકાની અભિનય કારકિર્દી બાદ હવે તેઓ દિગ્દર્શનની દુનિયામાં નવી શરૂઆત કરવાની તૈયારીમાં છે.