નિતેશ તિવારીની 'રામાયણ પાર્ટ વન' સિનેમા પડદા પર આવી ગઈ છે. ફિલ્મની લંબાઈ 3 કલાક 15 મિનિટ છે અને તેને 5માંથી 3.5 રેટિંગ આપવામાં આવ્યું છે. આ ફિલ્મ લગભગ 4000 કરોડ રૂપિયાના ખર્ચે બની હોવાનું કહેવાય છે.
એક તરફ અયોધ્યાના રાજકુમાર રામ છે, જેમના માટે મર્યાદા સૌથી મોટો ધર્મ છે. બીજી તરફ લંકાનો રાજા રાવણ છે, જેની પાસે જ્ઞાન પણ છે, શક્તિ પણ છે અને ત્રણેય લોક પર રાજ કરવાનો અહંકાર પણ છે. આ બંને સામસામે આવે તે પહેલાંની વાર્તાને મોટા સિનેમાઈ કેનવાસ પર રજૂ કરવી સહેલી નથી, ખાસ કરીને ત્યારે જ્યારે વાર્તા માત્ર મનોરંજન પૂરતી સીમિત નથી, પરંતુ કરોડો લોકોની આસ્થા સાથે પણ જોડાયેલી છે.
વાર્તા: રસપ્રદ વાત એ છે કે ફિલ્મની શરૂઆત રામથી નહીં, પરંતુ રાવણથી થાય છે. રાવણ (યશ) કઠોર તપસ્યા કરીને ભગવાન બ્રહ્માને પ્રસન્ન કરે છે અને વરદાન મેળવે છે. ત્યાર બાદ તેની મહત્ત્વાકાંક્ષા વધતી જાય છે. તે ઇન્દ્રને પરાજિત કરે છે અને પોતાના સાવકા ભાઈ કુબેર પાસેથી લંકાનું અધિકાર મેળવી લે છે. ફિલ્મ રાવણને દશાનન કેમ કહેવામાં આવે છે અને તેના દસ મસ્તકોની પૌરાણિક ઓળખ શું છે, તે પાસાને પણ વાર્તામાં સ્થાન આપે છે.
આ પછી વાર્તા અયોધ્યા તરફ વળે છે. ભગવાન વિષ્ણુના અવતાર રામ (રણબીર કપૂર)નો જન્મ રાજા દશરથના ઘરે થાય છે. તેમનું બાળપણ, ઋષિ વિશ્વામિત્ર સાથેની યાત્રા, મિથિલામાં સીતા (સાઈ પલ્લવી)ના સ્વયંવરમાં શિવધનુષ તોડવું અને વિવાહ જેવા પ્રસંગો દર્શાવવામાં આવ્યા છે.
પરંતુ રાજમહેલની રાજનીતિ વાર્તાની દિશા બદલી નાખે છે. કૈકેયી (લારા દત્તા) પોતાના બે વરદાન માંગે છે અને રામને 14 વર્ષનો વનવાસ મળે છે. રામ સાથે સીતા અને લક્ષ્મણ (રવિ દુબે) પણ વનમાં જવા નીકળી પડે છે.
વનવાસ દરમિયાન શૂર્પણખા (રકુલ પ્રીત સિંહ)નો પ્રસંગ આવે છે. ત્યારબાદ મારીચના સુવર્ણ મૃગવાળા માયાજાળ વાર્તાને એવા વળાંક પર લઈ જાય છે, જ્યાં રામ અને લક્ષ્મણ આશ્રમથી દૂર જતા રહે છે. સાધુના વેશમાં આવેલો રાવણ સીતાનું હરણ કરી લે છે. સીતાને બચાવવા જટાયુ રાવણ સાથે યુદ્ધ કરે છે. ઘાયલ જટાયુ રામને સીતાના અપહરણની જાણકારી આપે છે અને અંતિમ શ્વાસ લે છે.
ફિલ્મમાં પોસ્ટ-ક્રેડિટ સીન પણ છે. તેમાં હનુમાનજી (સની દેઓલ)ની ઝલક બતાવવામાં આવી છે, પરંતુ તેમનો ચહેરો દેખાડવામાં આવતો નથી.
અભિનય: ભગવાન રામનું પાત્ર ભજવવું કોઈપણ કલાકાર માટે મોટી જવાબદારી છે. રણબીર કપૂર આ ભૂમિકામાં સંયમ અને ગંભીરતા લાવે છે. તેમના ચહેરા પર શાલીનતા અને વર્તનમાં મર્યાદા દેખાય છે. તેઓ રામને જરૂર કરતાં વધુ નાટકીય બનાવવાને બદલે સહજ અને ગૌરવપૂર્ણ રાખવાનો પ્રયાસ કરે છે.
સાઈ પલ્લવી (સીતા) પોતાની સ્વાભાવિક અદાકારી અને ભાવપૂર્ણ અભિવ્યક્તિથી પાત્રમાં સહજતા લાવે છે. રવિ દુબે (લક્ષ્મણ)ના અભિનયમાં ભાઈ પ્રત્યેનું સમર્પણ અને રક્ષકની ભાવના દેખાય છે.
યશ (રાવણ)નો અંદાજ સાવ અલગ છે. રુઆબદાર વ્યક્તિત્વ, દમદાર અવાજ, આંખોમાં અહંકાર અને પડદા પર તેમની હાજરી રાવણના પાત્રને પ્રભાવશાળી બનાવે છે. તેમની એન્ટ્રી અને મોટા દૃશ્યોમાં તેમનો અંદાજ ખાસ ધ્યાન ખેંચે છે.
એકંદરે, ફિલ્મમાં VFXની ભવ્યતા છે, પણ સંગીત અને સંવાદો થોડા ફીકા પડ્યાનું જણાય છે. પહેલા ભાગમાં રાવણનો ઉદય, રામનો વનવાસ અને સીતાહરણ સુધીની વાર્તા દર્શાવવામાં આવી છે. હવે હનુમાનજીની લંકાયાત્રા, અશોકવાટિકા, રામસેતુ અને લંકાયુદ્ધ જેવા મોટા પ્રસંગો માટે બીજા ભાગની રાહ જોવી પડશે.