રણબીર કપૂર, યશ અને સાઈ પલ્લવીની મુખ્ય ભૂમિકા ધરાવતી ફિલ્મ 'રામાયણ'એ રિલીઝના માત્ર આઠ દિવસમાં વિશ્વભરના બોક્સ ઓફિસ પર 1000 કરોડ રૂપિયાની કમાણી કરી લીધી છે. આ સાથે જ આ ફિલ્મ સૌથી ઝડપથી 1000 કરોડ રૂપિયા કમાવનારી ત્રીજી ભારતીય ફિલ્મ બની ગઈ છે.
ટ્રેડ રિપોર્ટ્સ અનુસાર, 5 નવેમ્બરે દિવાળી પહેલાં રિલીઝ થયેલી આ ફિલ્મે પહેલા દિવસે વિશ્વભરમાં 128 કરોડ રૂપિયાની ઓપનિંગ કરી હતી. ભારતમાં દિવાળીના તહેવારને કારણે શરૂઆતના દિવસોમાં કમાણી થોડી મર્યાદિત રહી, પરંતુ વિદેશોમાં વર્ડ ઓફ માઉથને કારણે ફિલ્મને મોટો ફાયદો થયો. ચાર દિવસના ઓપનિંગ વીકએન્ડમાં ફિલ્મે 507 કરોડ રૂપિયા એકત્ર કર્યા. ત્યારબાદ સોમવારે ગોવર્ધન પૂજા અને મંગળવારે ભાઈબીજની રજાઓ દરમિયાન ફિલ્મે સતત બે દિવસ 150-150 કરોડ રૂપિયાનો બિઝનેસ કર્યો.
'રામાયણ' 1000 કરોડ ક્લબમાં સામેલ થનારી કુલ 11મી ભારતીય ફિલ્મ છે. આ ક્લબની શરૂઆત મે 2017માં 'બાહુબલી: ધ કન્ક્લૂઝન' અને 'દંગલ'એ કરી હતી. સૌથી ઝડપી 1000 કરોડ કમાવવાના મામલે 'રામાયણ' (8 દિવસ)એ 'બાહુબલી 2' (10 દિવસ), 'આરઆરઆર' (16 દિવસ), 'કેજીએફ ચેપ્ટર 2' (18 દિવસ), શાહરુખ ખાનની 'જવાન' (18 દિવસ) અને 'પઠાણ' (27 દિવસ)ને પાછળ છોડી દીધા છે. આ યાદીમાં 'રામાયણ'થી આગળ માત્ર 'પુષ્પા 2: ધ રૂલ' અને 'ધુરંધર: ધ રિવેન્જ' છે, જેમણે 7-7 દિવસમાં આ આંકડો પાર કર્યો હતો.
ફિલ્મની આ સફળતા પર લક્ષ્મણની ભૂમિકા ભજવનારા અભિનેતા રવિ દુબેએ ઇન્સ્ટાગ્રામ પર પડદા પાછળની (BTS) તસવીરો પોસ્ટ કરીને ખુશી વ્યક્ત કરી છે. આ તસવીરોમાં તે રણબીર કપૂર, સાઈ પલ્લવી અને નિર્માતા નમિત મલ્હોત્રા સાથે જોવા મળી રહ્યા છે. તેમણે કેપ્શનમાં લખ્યું, "ખુશ થવાના હજારો કારણો."
બે ભાગમાં બની રહેલી આ ફિલ્મના પહેલા ભાગમાં રણબીર કપૂરે ભગવાન રામ, સાઈ પલ્લવીએ સીતા, યશે રાવણ અને સની દેઓલે હનુમાનની ભૂમિકા ભજવી છે. ફિલ્મમાં અરુણ ગોવિલ, લારા દત્તા, રકુલ પ્રીત સિંહ અને જટાયુના અવાજ તરીકે અનુપમ ખેર પણ સામેલ છે.