બોલિવૂડ અભિનેત્રી રકુલ પ્રીત સિંહે તેના નામ સાથે જોડાયેલા આવકવેરા વિભાગના દરોડાના અહેવાલોને ફગાવી દીધા છે. તેણે કહ્યું છે કે, જે દરોડાનો ઉલ્લેખ કરવામાં આવી રહ્યો છે, તેની સાથે તેને કોઈ લેવાદેવા નથી.
રકુલે ઇન્સ્ટાગ્રામ પર એક નિવેદન શેર કરીને આ અહેવાલોને 'જૂઠા, ભ્રામક અને દુર્ભાવનાપૂર્ણ' ગણાવ્યા છે. તેણે કહ્યું કે, તથ્યોની ચકાસણી કર્યા વગર સમાચારને સનસનાટીભર્યા બનાવવાનું વલણ દુઃખદ છે.
તાજેતરમાં મીડિયામાં એવા અહેવાલ આવ્યા હતા કે, આવકવેરા વિભાગે રકુલ પ્રીત સિંહ અને તેના સસરા તથા ફિલ્મ નિર્માતા વાશુ ભગનાની સાથે સંકળાયેલા 12 સ્થળોએ દરોડા પાડ્યા છે. એક ટીવી ચેનલના અહેવાલ મુજબ, 28 સપ્ટેમ્બરે શંકાસ્પદ નાણાકીય ગેરરીતિઓ અને ફિલ્મોના નામે વિદેશમાં નાણાં મોકલવાના આરોપોની તપાસના સંદર્ભમાં આ કાર્યવાહી કરવામાં આવી હતી. જોકે, વાશુ ભગનાની તરફથી આ અંગે કોઈ પ્રતિક્રિયા મળી નથી.
રકુલે તેની સફાઈમાં કહ્યું કે, તે સશસ્ત્ર દળોની પૃષ્ઠભૂમિમાંથી આવે છે અને ફિલ્મ ઉદ્યોગમાં તેનો કોઈ ગોડફાધર નથી. તેણે સખત મહેનતથી પોતાની ઓળખ બનાવી છે અને 20 વર્ષની ઉંમરથી નિયમિત રીતે ટેક્સ ભરી રહી છે.
તેણે વધુમાં જણાવ્યું કે, તે વ્યક્તિગત રીતે કે કોઈ પ્રોડક્શન હાઉસ મારફતે ગેરકાયદેસર વિદેશી વ્યવહારોમાં સંલગ્ન નથી. દેશ કે વિદેશમાં તેની પાસે કોઈ બેનામી સંપત્તિ નથી અને તે મોંઘા ઉપહારો પણ સ્વીકારતી નથી.
ફિલ્મ ફાઇનાન્સિંગના નામે થતી ગેરરીતિના આરોપોને ફગાવી દેતાં રકુલે ખોટા સમાચાર પ્રકાશિત કરનારી મીડિયા સંસ્થાઓને તેમના અહેવાલ પાછા ખેંચવાની અપીલ કરી છે. તેણે કહ્યું કે, મીડિયા હાઉસ ચલાવવા માટે વ્યાવસાયિક દબાણો હોઈ શકે, પરંતુ તે કોઈની પ્રતિષ્ઠા, આજીવિકા અને તથ્યોની કિંમતે ન હોવું જોઈએ.
ઉલ્લેખનીય છે કે, રકુલ પ્રીત સિંહનો પરિવાર અગાઉ પણ કાનૂની વિવાદોમાં રહી ચૂક્યો છે. ડિસેમ્બર 2025માં મુંબઈ પોલીસે ડ્રગ્સ કેસમાં રકુલના ભાઈ અમન પ્રીત સિંહની શોધ શરૂ કરી હતી. ડ્રગ લો એન્ફોર્સમેન્ટ ફોર્સ અને વેસ્ટ ઝોન પોલીસે બે ડ્રગ તસ્કરોની ધરપકડ કરીને તેમની પાસેથી 43 ગ્રામ કોકેઈન અને 11.5 ગ્રામ MDMA જપ્ત કર્યું હતું. તપાસમાં આરોપ લગાવાયો હતો કે અમને તે તસ્કરો પાસેથી પાંચ વખત નશીલા પદાર્થો ખરીદ્યા હતા. આ મામલે અમનની ધરપકડ પણ થઈ હતી. અમન સાઉથ અભિનેતા છે અને રકુલ સાથે એક ટેલેન્ટ કંપની પણ ચલાવે છે.
અગાઉ સુશાંત સિંહ રાજપૂત આત્મહત્યા કેસની તપાસ દરમિયાન રિયા ચક્રવર્તીએ પૂછપરછમાં સારા અલી ખાન અને રકુલ પ્રીતનું નામ લીધું હતું. રકુલે તેના નામના મીડિયા કવરેજને રોકવા માટે હાઈકોર્ટનો સંપર્ક પણ કર્યો હતો. 2022માં EDએ ટોલીવૂડ ડ્રગ્સ કેસ સાથે જોડાયેલા મની લોન્ડરિંગ કેસમાં તેની પૂછપરછ કરી હતી.
અત્યારે રકુલ પ્રીત સિંહ નિતેશ તિવારીના ડિરેક્શનમાં બની રહેલી ફિલ્મ 'રામાયણ પાર્ટ 1'ને લઈને ચર્ચામાં છે. આ ફિલ્મમાં તે શૂર્પણખાનું પાત્ર ભજવી રહી છે. ફિલ્મમાં રણબીર કપૂર ભગવાન રામ, સાઈ પલ્લવી સીતા, રવિ દુબે લક્ષ્મણ અને યશ રાવણની ભૂમિકામાં જોવા મળશે. આ ફિલ્મ 6 નવેમ્બર 2026ના રોજ દિવાળીના અવસરે સિનેમાઘરોમાં રિલીઝ થવાની છે. રકુલના લગ્ન વાશુ ભગનાનીના દીકરા અને અભિનેતા-નિર્માતા જૅકી ભગનાની સાથે થયા છે. વાશુ ભગનાની પણ તાજેતરમાં વિવાદમાં રહ્યા છે.