રાજકોટ લોધિકા સંઘની ચૂંટણીના પરિણામ આવ્યાના 15 દિવસ થઈ ગયા છે, તો પણ ચેરમેન અને વાઈસ ચેરમેનની નિમણૂક માટેનું ચિત્ર સ્પષ્ટ થયું નથી. સામાન્ય રીતે પરિણામ આવ્યાના એક સપ્તાહની અંદર આ નિમણૂક થઈ જતી હોય છે, પરંતુ આ વખતે તે લટકી પડી છે.
લોધિકા સંઘની ચૂંટણી 8 સપ્ટેમ્બરે યોજાઈ હતી. પરિણામ આવ્યા બાદ એક સપ્તાહમાં ચેરમેન અને વાઈસ ચેરમેનની નિમણૂક થઈ જવી જોઈતી હતી. પરંતુ સંઘમાં જયેશ રાદડિયા જૂથ અને પ્રશાંત કોરાટ જૂથ વચ્ચે પોતપોતાના ઉમેદવાર માટે લોબિંગ ચાલી રહ્યું છે, જેના કારણે નિમણૂકની પ્રક્રિયા અટકી છે.
રાદડિયા જૂથ ચેરમેન પદ માટે નીતિન ઢાંકેચાના નામની લોબિંગ કરી રહ્યું છે, જ્યારે કોરાટ જૂથ બાબુ નસીતના નામને ચેરમેન તરીકે આગળ ધરી રહ્યું છે. આ નિમણૂકમાં હજુ એક સપ્તાહનો વધુ વિલંબ થવાની શક્યતા છે.
સહકારી આગેવાનો અને ભાજપના આગેવાનો વચ્ચે પણ આંતરિક ખેંચતાણ ચાલી રહી હોવાનું જણાય છે. લોધિકા સંઘના મેનેજરે તૈયાર કરેલો દરખાસ્તનો પત્ર ભાજપના આગેવાનોએ દબાવી રાખ્યો હોવાની ચર્ચા આંતરિક વર્તુળોમાં ચાલી રહી છે. જોકે આ અંગે કોઈ અધિકૃત પુષ્ટિ મળી નથી.
રાજકોટ જિલ્લા સંઘમાં પણ ચેરમેન અને વાઈસ ચેરમેનના નામને લઈને ગૂંચવણ સર્જાઈ છે. રાદડિયા જૂથે મોકલેલા નામને પ્રદેશ કક્ષાએ નકારી દેવાયા બાદ નામને લઈને સંમતિ ન સધાતાં ફરી એકવાર ચૂંટણી મોકૂફ રાખવામાં આવી છે.