ભારતીય ક્રિકેટ કંટ્રોલ બોર્ડ (BCCI) એ રાઈઝિંગ સ્ટાર્સ એશિયા કપ માટે ભારતીય એ ટીમમાં ફેરફારની જાહેરાત કરી છે. ઈજાના કારણે રજત પાટીદારે 50 ઓવરની મેચો માટે પોતાને ઉપલબ્ધ ન જાહેર કરતાં તેમને ટીમમાંથી બહાર કરવામાં આવ્યા છે. તેમના સ્થાને આયુષ બદોનીને ટીમમાં સામેલ કરવામાં આવ્યો છે, જ્યારે રિંકુ સિંહને ટીમનો વાઈસ કેપ્ટન બનાવવામાં આવ્યો છે.
BCCI દ્વારા જારી કરાયેલા અપડેટ મુજબ, રજત પાટીદારે બોર્ડને જાણ કરી હતી કે તેઓ હાલમાં 50 ઓવર ફોર્મેટની મેચો માટે ઉપલબ્ધ નથી અને તેમણે પોતાની ઈજાના રિકવરી પર ધ્યાન કેન્દ્રિત કરવું છે. આથી પસંદગી સમિતિએ તેમને ટૂર્નામેન્ટ માટે ભારતીય એ ટીમમાંથી બહાર કર્યા છે અને તેમના સ્થાને આયુષ બદોનીનું નામ પસંદ કર્યું છે.
ઉલ્લેખનીય છે કે, રજત પાટીદાર પહેલેથી જ ઈજાગ્રસ્ત હતા અને તેમણે 50 ઓવર ફોર્મેટમાં પસંદગી માટે વિચારણા ન કરવા વિનંતી કરી હતી. BCCI એ તેમની વિનંતી સ્વીકારીને ટીમમાં ફેરફાર કર્યો છે. આ ફેરફાર સાથે ભારતીય એ ટીમ હવે રિંકુ સિંહની વાઈસ કેપ્ટનશિપમાં રમશે.
રાઈઝિંગ સ્ટાર્સ એશિયા કપમાં ભારતીય એ ટીમ તેની શરૂઆત કરવા આતુર છે. ટીમમાં થયેલા આ ફેરફાર બાદ ચાહકોની નજર રિંકુ સિંહ પર રહેશે, જેમને પ્રથમ વખત વાઈસ કેપ્ટનની જવાબદારી સોંપવામાં આવી છે.