નવી દિલ્હીમાં વિપક્ષી 'ઈન્ડિયા' ગઠબંધન દ્વારા ચૂંટણી પંચ સામે મોટું વિરોધ પ્રદર્શન કરવામાં આવ્યું. આ પ્રદર્શન દરમિયાન લોકસભામાં વિપક્ષના નેતા રાહુલ ગાંધી અને કોંગ્રેસ મહાસચિવ પ્રિયંકા ગાંધી સહિત અનેક નેતાઓને દિલ્હી પોલીસે અટકાયતમાં લીધા હતા.
મંગળવારે વિપક્ષી ગઠબંધનના સાંસદોએ સંસદ ભવનથી ચૂંટણી પંચ તરફ કૂચ કરી હતી. પોલીસે સંસદ માર્ગ પર નીતિ આયોગ અને આકાશવાણી ભવન પાસે આ માર્ચને અટકાવી દીધી. ત્યારબાદ વિપક્ષી સાંસદો રસ્તા પર જ ધરણાં પર બેસી ગયા.
આ દરમિયાન રાહુલ ગાંધીએ વડાપ્રધાન મોદી, ગૃહમંત્રી અમિત શાહ, આરએસએસ પ્રમુખ મોહન ભાગવત અને મુખ્ય ચૂંટણી કમિશનર જ્ઞાનેશ કુમાર પર વોટ ચોરી દ્વારા દેશને હાઇજેક કરવાનો આરોપ લગાવ્યો. તેમણે કહ્યું કે વિપક્ષી પક્ષોના આશરે 300 સાંસદો મુખ્ય ચૂંટણી કમિશનરને મળવા ગયા હતા, પરંતુ તેમને મળવા દેવામાં આવ્યા નહોતા. મંગળવારે રાત્રે આશરે 8 વાગ્યે પોલીસે રાહુલ ગાંધી, પ્રિયંકા ગાંધી, કે.સી. વેણુગોપાલ અને 10 સાંસદો સહિત કુલ 260 લોકોને કસ્ટડીમાં લીધા. લગભગ બે કલાક બાદ રાત્રે 10 વાગ્યે તમામ નેતાઓને મુક્ત કરવામાં આવ્યા.
બહાર આવ્યા બાદ રાહુલ ગાંધીએ સોશિયલ મીડિયા પર પોસ્ટ કરીને લખ્યું, 'લોકતંત્રના ગદ્દારોને બચાવવા માટે અત્યારે જે થોડું-ઘણું લોકતંત્ર અસ્તિત્વમાં છે તેને ઘસડવામાં આવ્યું છે. હિસાબ થશે, એક પણ દેશદ્રોહી બક્ષવામાં નહીં આવે.'
આ સમગ્ર ઘટનાક્રમ વચ્ચે કોંગ્રેસ સાંસદ શશિ થરૂર આ પ્રદર્શનમાં સામેલ નહોતા, કારણ કે તેઓ ચાર મહિના પહેલાં નક્કી થયેલી જર્મનીની એક કોન્ફરન્સમાં ભાગ લઈ રહ્યા છે. તેમ છતાં તેમણે સોશિયલ મીડિયા પ્લેટફોર્મ 'X' પર સરકાર સામે આક્રોશ વ્યક્ત કર્યો. થરૂરે જણાવ્યું, 'વિપક્ષ નેતા રાહુલ ગાંધી સાથે હાથાપાઈ કરવા અને તેમને અટકાયતમાં લેવાની તસવીરો જોઈને હું ખૂબ દુઃખી છું. એક તરફ 13 કરોડ મતદારોના અધિકારો છીનવાઈ રહ્યા છે, ત્યારે વિરોધ પ્રદર્શન કરવું એ દરેક નાગરિકના બંધારણીય અધિકારો માટે ઊભા રહેવા જેવું છે. આ મામલે સરકારની પ્રતિક્રિયા અત્યંત શરમજનક છે.'