કોંગ્રેસ નેતા રાહુલ ગાંધીએ ગોવાના મડગાંવમાં 'ગોય રાખણ યાત્રા'ના સમાપન પ્રસંગે જનસભાને સંબોધતા કેન્દ્ર સરકાર અને મુખ્ય ચૂંટણી કમિશનર જ્ઞાનેશ કુમાર પર ચૂંટણી પ્રક્રિયા સાથે છેડછાડ કરવાનો આરોપ લગાવ્યો છે. તેમણે કહ્યું કે વડાપ્રધાન, ગૃહમંત્રી અને મુખ્ય ચૂંટણી કમિશનરને ન્યાયનો સામનો કરવો પડશે અને તેમણે જે કર્યું છે તેની કિંમત ચૂકવવી પડશે.
રાહુલ ગાંધીએ કહ્યું, "દેશમાં જે થઈ રહ્યું છે તે તમે બધા જોઈ રહ્યા છો. આખો દેશ જાણે છે કે શું થઈ રહ્યું છે. હવે કોઈ મૂંઝવણ નથી. હું દરેક રાજ્યને કહું છું કે પીએમ વોટ ચોરી કરે છે. પરંતુ મારા પર કોઈ કેસ નોંધાતો નથી. કારણ કે તેઓ જાણે છે કે જો કેસ થશે તો મામલો કાનૂની બની જશે અને તેઓ ફસાઈ જશે."
તેમણે વધુમાં જણાવ્યું કે યુવાનો કેન્દ્ર સરકાર વિરુદ્ધ ઊભા થઈ ગયા છે. "દિલ્હીમાં અમે થોડા જ સમયમાં પીએમ અને ગૃહમંત્રી સાથે નિપટી લઈશું. કામ ચાલુ છે. સરકારની એક્સપાયરી ડેટ આવવાની છે. તમે જોયું છે કે આજકાલ પીએમ સામે ઊભા રહી શકતા નથી. કારણ કે તેઓ જાણે છે કે દેશનો યુવાન તેમની વિરુદ્ધ ઊભો થઈ ગયો છે."
રાહુલ ગાંધીએ કેન્દ્ર સરકાર પર નિશાન સાધતા કહ્યું કે પહેલા આપણી પાસે વિશ્વ-સ્તરીય શિક્ષણ પ્રણાલી હતી, પરંતુ હવે વિદ્યાર્થી પ્રદર્શનકારીઓ સામે પેલેટ ગનનો ઉપયોગ કરવામાં આવી રહ્યો છે. તેમણે કહ્યું, "કેન્દ્ર સરકાર અને CEC જ્ઞાનેશ કુમારને ન્યાયનો સામનો કરવો પડશે અને તેમણે જે કર્યું છે તેની કિંમત ચૂકવવી પડશે. હું તમને એક રસપ્રદ વાત જણાવું, મારા વિરુદ્ધ માનહાનિના 45થી વધુ કેસ નોંધાયેલા છે. જેમાં PM, ગૃહમંત્રી અને અન્ય લોકો સાથે જોડાયેલા કેસો સામેલ છે. કુલ મળીને આ 45 કેસો છે. તેમ છતાં, હું દરેક મંચથી કહું છું કે નરેન્દ્ર મોદી વોટ ચોરે છે, અને આવું કહેવા માટે મારા વિરુદ્ધ ક્યારેય કોઈ કેસ નોંધવામાં આવતો નથી. શું તમે જાણો છો કેમ? કારણ કે તેઓ ડરે છે કે જો તેઓ ખાસ કરીને વોટ ચોરી કરવાને લઈને કોઈ કેસ નોંધે છે, તો તે એક મોટી કાયદાકીય લડાઈ બની જશે, અને તેઓ જાતે જ તેમાં ફસાઈ જશે."
તેમણે વધુમાં જણાવ્યું કે "આજે નહીં તો કાલે, કોંગ્રેસ પાર્ટી ન્યાય જરૂર અપાવશે કારણ કે આપણે બંધારણના સંરક્ષક છીએ, આપણે તેની રક્ષા કરનારા છીએ. જ્યારે આ લોકોએ વોટ ચોર્યા અને બંધારણ પર હુમલો કર્યો, ત્યારે તેમણે આપણી આસ્થા પર પણ પ્રહાર કર્યો. આપણે તેને સ્વીકારીશું નહીં. કોંગ્રેસના તમામ કાર્યકર્તાઓ ધ્યાનથી સાંભળે. વડાપ્રધાન, ગૃહમંત્રી અને જ્ઞાનેશ કુમારને ન્યાયનો સામનો કરવો પડશે અને તેમણે જે કર્યું છે તેની કિંમત તેમણે ચૂકવવી પડશે."
ઉલ્લેખનીય છે કે રાહુલ ગાંધી 18 ઓક્ટોબરે કોંગ્રેસની 'ગોય રાખણ યાત્રા'માં સામેલ થયા હતા. આ દરમિયાન તેમણે આશરે બે કિલોમીટર ચાલીને પાર્ટીના કાર્યકર્તાઓ સાથે ભાગ લીધો હતો. અહીં કોંગ્રેસની 28 દિવસ લાંબી યાત્રાનું સમાપન થયું છે. રાહુલનો છેલ્લા 4 વર્ષમાં આ પહેલો ગોવા પ્રવાસ છે. આ પહેલા 2022માં તેઓ અહીં આવ્યા હતા. ગોવામાં આવતા વર્ષે 2027માં વિધાનસભા ચૂંટણી યોજાવાની છે.