દિલ્હી યુનિવર્સિટી સ્ટુડન્ટ્સ યુનિયન (DUSU)ની ચૂંટણીમાં NSUIને એક પણ પદ ન મળ્યા બાદ કોંગ્રેસે સંગઠનની અંદર સમીક્ષા શરૂ કરી છે. સોમવારે કોંગ્રેસ નેતા રાહુલ ગાંધીએ NSUI પ્રભારી કન્હૈયા કુમાર અને રાષ્ટ્રીય અધ્યક્ષ વિનોદ જાખડ સાથે બેઠક કરી હતી. કોંગ્રેસના સંગઠન મહાસચિવ કે.સી. વેણુગોપાલ પણ આ બેઠકમાં હાજર રહ્યા હતા.
અહેવાલો અનુસાર બેઠકમાં ચૂંટણીના પરિણામ, ઉમેદવારોની પસંદગી અને પ્રચારની રણનીતિ અંગે ચર્ચા થઈ હતી. સૂત્રોના જણાવ્યા મુજબ રાહુલ ગાંધીએ એ સવાલ ઉઠાવ્યો કે NSUI અધ્યક્ષ પદની ચૂંટણીમાં જીતની નજીક હતી, તો પરિણામ આટલું અલગ કેમ આવ્યું?
મળતી માહિતી પ્રમાણે રાહુલ ગાંધીએ ચૂંટણી મેનેજમેન્ટ, ઉમેદવારની પસંદગી અને કેમ્પેઇન અંગે પણ સવાલ કર્યા હતા. વેણુગોપાલે ટિકિટ વિતરણની પ્રક્રિયા અંગે કન્હૈયા કુમારને સવાલો કર્યા હોવાનું પણ અહેવાલોમાં જણાવાયું છે.
બેઠકમાં સૌથી વધુ ચર્ચાયેલો મુદ્દો અપક્ષ ઉમેદવાર દીપાંશુ શોકીનનો હતો. શોકીન અગાઉ NSUI સાથે જોડાયેલા હતા અને 2023 તથા 2024ની ચૂંટણીઓમાં સંગઠન માટે પ્રચાર કર્યો હતો. 2026ની DUSU ચૂંટણીમાં તેઓ NSUIની ટિકિટ પર નહીં પણ અપક્ષ ઉમેદવાર તરીકે મેદાનમાં ઉતર્યા અને વાઇસ પ્રેસિડેન્ટ પદ જીતી લીધું. શોકીનને 30,615 મત મળ્યા હતા, જ્યારે NSUIના ઉમેદવાર વીર છત્રથને 4,313 મત મળ્યા હતા.
રાહુલ ગાંધીએ સવાલ કર્યો હતો કે શોકીનને સંગઠન સાથે કેમ રાખી શકાયા નહીં. કન્હૈયા કુમાર અને વિનોદ જાખડે શોકીન દ્વારા મૂકવામાં આવેલી કેટલીક શરતોને કારણ ગણાવ્યું હોવાનું કહેવાય છે. જોકે કોંગ્રેસ નેતા અમિતાભ દુબેએ આ અંગે અલગ દાવો કર્યો છે. તેમણે સોશિયલ મીડિયા પર કહ્યું હતું કે શોકીનને અધ્યક્ષ પદની ટિકિટ ઓફર કરવામાં આવી હતી, પણ તેમણે સ્વીકારી નહોતી અને પછી વાઇસ પ્રેસિડેન્ટ પદ માટે અપક્ષ તરીકે ચૂંટણી લડી હતી.
DUSUના ચાર કેન્દ્રીય પેનલ પદમાંથી ABVPએ ત્રણ પદ જીત્યાં. યશ દબાસ પ્રેસિડેન્ટ, રિયા છાવડી સેક્રેટરી અને લક્ષ્ય રાજ સિંહ જોઇન્ટ સેક્રેટરી તરીકે વિજેતા થયા. વાઇસ પ્રેસિડેન્ટ પદ દીપાંશુ શોકીનને મળ્યું. NSUIને ચારમાંથી એક પણ પદ મળ્યું નહીં. પ્રેસિડેન્ટની ચૂંટણીમાં ABVPના યશ દબાસને 24,576 મત મળ્યા હતા, જ્યારે NSUIના વિજય શંકર મીનાને 22,523 મત મળ્યા હતા. એટલે આ બેઠક પરની લડાઈ નજીકની રહી હતી.
DUSUનું પરિણામ કોંગ્રેસ માટે એટલા માટે પણ મહત્વનું છે કે પાર્ટી છેલ્લા કેટલાક સમયથી યુવાનો અને ખાસ કરીને Gen-Z સુધી પહોંચ વધારવાનો પ્રયાસ કરી રહી છે. રાહુલ ગાંધીના ‘છાત્રોં કી ગૂંજ’ જેવા કાર્યક્રમો દ્વારા વિદ્યાર્થીઓ સાથે સીધો સંપર્ક સાધવાનો પ્રયાસ કરવામાં આવ્યો છે. આ પૃષ્ઠભૂમિમાં DUSUનું પરિણામ કોંગ્રેસની યુવા વિદ્યાર્થીઓ સુધીની પહોંચ અને કેમ્પસ સ્તરની સંગઠનાત્મક કામગીરી અંગે ચર્ચાનો વિષય બન્યું છે.
બેઠક દરમિયાન વિદ્યાર્થીઓના સ્થાનિક મુદ્દાઓ વધુ અસરકારક રીતે કેમ્પસ સુધી કેમ પહોંચાડવા અને સંગઠનની કામગીરીની સમીક્ષા અંગે પણ ચર્ચા થઈ હોવાનું અહેવાલોમાં જણાવાયું છે.