સત્ય. સાહસ. સંકલ્પ.

હૈદરાબાદમાં રાહુલ ગાંધીનું નિવેદન: 'દેશમાં લોકશાહી નથી', ભાજપનો પ્રહાર

હૈદરાબાદમાં રાહુલ ગાંધીનું નિવેદન: 'દેશમાં લોકશાહી નથી', ભાજપનો પ્રહાર

હૈદરાબાદમાં શનિવારે યોજાયેલી 'ભારત સમિટ 2026'ને સંબોધતા લોકસભામાં વિપક્ષના નેતા રાહુલ ગાંધીએ કેન્દ્ર સરકાર પર આકરા પ્રહારો કર્યા હતા. તેમણે આરોપ લગાવ્યો કે ભારત હવે લોકશાહી રહ્યું નથી અને 2014માં સત્તામાં આવ્યા બાદ ભાજપના નેતૃત્વ હેઠળની સરકારે લોકતાંત્રિક સંસ્થાઓને સુનિયોજિત રીતે નબળી પાડી છે.

રાહુલ ગાંધીએ જણાવ્યું કે છેલ્લા એક દાયકામાં દેશની રાજકીય વ્યવસ્થામાં પાયાનો બદલાવ આવ્યો છે. તેમણે 2014 અને 2024ની લોકસભા ચૂંટણીઓમાં અનિયમિતતાઓ થઈ હોવાનો આક્ષેપ કરતા કહ્યું, “સમગ્ર વિશ્વના લોકતાંત્રિક આંદોલન માટે જરૂરી છે કે ભારત એક લોકશાહી બની રહે, પરંતુ અમે જે શોધી કાઢ્યું છે તે એ છે કે ભારત ખરેખર હવે લોકશાહી નથી.”

કોંગ્રેસ નેતાએ દાવો કર્યો કે 2014ની લોકસભા ચૂંટણી એક મોટો વળાંક હતો, જ્યારે રાજકીય વ્યવસ્થામાં મોટા પ્રમાણમાં નાણાં ઠાલવવામાં આવ્યાં અને ચૂંટણી પ્રચારની નવી રીત સામે આવી. તેમણે કહ્યું, “જો હું કહું કે વિપક્ષ આઘાતમાં નહોતો, તો તે જૂઠ હશે. અમે એક-બે વર્ષ નહીં, પરંતુ પૂરા એક દાયકા સુધી આઘાતમાં હતા.” ત્યારબાદ કોંગ્રેસ અને અન્ય વિપક્ષી દળોએ વિવિધ રાજ્યોના ચૂંટણી પરિણામો અને મતદાર ડેટાની તપાસ શરૂ કરી, જેનાથી ચૂંટણી પ્રક્રિયાની વિશ્વસનીયતા પર સવાલ ઉભા થયા છે.

મહારાષ્ટ્ર વિધાનસભા ચૂંટણીનો ઉલ્લેખ કરતા રાહુલ ગાંધીએ કહ્યું કે ત્યાં લોકસભા ચૂંટણીમાં 'ઈન્ડિયા' ગઠબંધને વધુ બેઠકો જીતી હતી, પરંતુ માત્ર ત્રણ મહિના બાદ યોજાયેલી વિધાનસભા ચૂંટણીમાં હારનો સામનો કરવો પડ્યો. તેમણે આરોપ લગાવ્યો કે બંને ચૂંટણીઓ વચ્ચે અંદાજે 70 લાખ નવા મતદારો ઉમેરવામાં આવ્યા અને તે તમામ લોકોએ ભાજપને મત આપ્યો. તેમણે સવાલ ઉઠાવ્યો કે જો ચૂંટણી પંચ 14 કરોડ મતદારોને અમાન્ય જાહેર કરે, તો ચૂંટણી કાયદેસર કેવી રીતે હોઈ શકે? તેમણે અન્ય રાજ્યોમાં પણ આવી જ વિસંગતતાઓ હોવાની આશંકા વ્યક્ત કરી.

કેટલાક પસંદગીના ઔદ્યોગિક જૂથો પાસે આર્થિક તકો સીમિત થઈ રહી હોવાની ટીકા કરતા રાહુલ ગાંધીએ રાજકીય સત્તા, આર્થિક પ્રભાવ અને જાહેર સંસ્થાઓ વચ્ચેના સંબંધો પર સવાલ ઉઠાવ્યો. દરેક સવાલનો જવાબ પોતાની પાસે હોવાનો દાવો કરનારા અને વૈકલ્પિક વિચારો સાંભળવાનો ઇનકાર કરનારા લોકોને 'ફાસીવાદી' ગણાવતા તેમણે કહ્યું કે રાજકારણ, વેપાર અને શિક્ષણ જગતમાં આવા લોકો હાજર છે. તેમણે ઉમેર્યું, “ઐતિહાસિક રીતે ફાસીવાદીઓ ત્યારે ઉભરી આવે છે જ્યારે વ્યવસ્થાઓ પડી ભાંગે છે; જ્યારે બધું બરાબર ચાલતું હોય ત્યારે તેઓ છુપાઈ જાય છે.”

સમિટમાં સામેલ થવા માટે નક્કી કરાયેલા અનેક આંતરરાષ્ટ્રીય પ્રતિનિધિઓની માફી માંગતા રાહુલ ગાંધીએ કહ્યું કે ભારત સરકારે તેમને આવવાની મંજૂરી આપી નથી. તેમણે કહ્યું કે આ અમારી ભૂલ નથી, પરંતુ તેનાથી અંદાજ લગાવી શકાય કે અમે દેશમાં કેવા સંજોગોનો સામનો કરી રહ્યા છીએ. કોંગ્રેસના જણાવ્યા મુજબ આ સમિટમાં 70 દેશોના નિષ્ણાતો સામેલ થઈ રહ્યા છે. બીજી તરફ, કોંગ્રેસ સાંસદ શશિ થરૂરે પણ આરોપ લગાવ્યો હતો કે વિદેશ મંત્રાલય દ્વારા મંજૂર કરાયેલા 315માંથી 115 વક્તાઓને ભારતમાં પ્રવેશતા અટકાવવામાં આવ્યા અથવા તેમના વિઝા રદ કરી દેવામાં આવ્યા.

આ સામે ભાજપે રાહુલ ગાંધીના નિવેદનોનો વળતો પ્રહાર કર્યો છે અને વિદેશ મંત્રાલયે વિઝા રદ થવાના આરોપોને ફગાવી દીધા છે. ભાજપના નેતાઓએ કહ્યું કે કોંગ્રેસ નેતા દેશની છબી ખરાબ કરવાનું કામ કરી રહ્યા છે.