રાષ્ટ્રીય રાજધાની દિલ્હીમાં આજે રાજકીય ગરમાવો ચરમસીમાએ પહોંચ્યો હતો. વિપક્ષી ગઠબંધન 'I.N.D.I.A'એ સુપ્રીમ કોર્ટ સુધી માર્ચ કાઢવાની જાહેરાત કરી હતી, પરંતુ મુખ્ય ન્યાયાધીશ (CJI)એ વિપક્ષી સાંસદોની અરજી ફગાવી દીધી હતી.
લોકસભામાં વિપક્ષના નેતા રાહુલ ગાંધીએ પ્રેસ કોન્ફરન્સ યોજીને કેન્દ્ર સરકાર પર પ્રહારો કર્યા હતા. તેમણે પૂછ્યું કે, "આખરે દિલ્હી કેદમાં કેમ છે? લોકોને દિલ્હી આવતા રોકવામાં આવી રહ્યા છે, ટ્રેનો અને બસોને અટકાવવામાં આવી રહી છે. દિલ્હીને કિલ્લો બનાવી દેવામાં આવ્યો છે અને ચારેય તરફ પોલીસ તૈનાત છે." તેમણે આરોપ લગાવ્યો કે ચીફ ઇલેક્શન કમિશનર જ્ઞાનેશ કુમારને બચાવીને સરકાર મોટી ભૂલ કરી રહી છે.
રાહુલ ગાંધીએ દાવો કર્યો કે દિલ્હી પોલીસ, સીઆરપીએફ અને આઈટીબીપીના 50 ટકા કર્મચારીઓ પણ તેમના સમર્થનમાં છે. તેમણે કહ્યું કે આ કર્મચારીઓ પૂછે છે કે યુવાનોને કેમ મારવામાં આવી રહ્યા છે. તેમણે કહ્યું કે હું અને કોંગ્રેસ અધ્યક્ષ મલ્લિકાર્જુન ખડગે સીજેઆઈ જસ્ટિસ સૂર્યકાંતને મળવા માગતા હતા, પરંતુ તેમણે મુલાકાતનો ઈનકાર કરી દીધો. આજે બપોરે 3 વાગ્યે ઈન્ડિયા ગઠબંધનના નેતાઓ સુપ્રીમ કોર્ટમાં અરજી દાખલ કરશે.
જ્ઞાનેશ કુમાર અંગે રાહુલ ગાંધીએ કહ્યું કે તેઓ દબાણ હેઠળ છે અને તેમને રાજીનામું આપી દેવું જોઈએ. તેમણે કહ્યું કે આ આંદોલન દેશના ભવિષ્ય માટે છે અને જ્યાં સુધી ન્યાય ન મળે ત્યાં સુધી તે શમશે નહીં. તેમણે ભાજપ અને આરએસએસ પર આકરા પ્રહારો કરતાં કહ્યું કે તેમના ગુંડાઓએ પોલીસની હાજરીમાં યુવા દેખાવકારો પર હુમલો કર્યો છે. તેમણે લોકોને અપીલ કરી કે બંધારણ બચાવવું હોય તો રસ્તા પર આવી જાઓ.
બીજી તરફ, NCP-SCPના સાંસદ સુપ્રિયા સુલેએ શાંતિપૂર્ણ રીતે ન્યાય માંગવાની વાત કરી હતી. કોકરોચ જનતા પાર્ટી (CJP)ના સૌરવ દાસે જણાવ્યું કે દરેક નાગરિકને શાંતિપૂર્ણ પ્રદર્શન કરવાનો મૌલિક અધિકાર છે. CJPએ દિલ્હી પોલીસને 24 કલાકનું અલ્ટીમેટમ આપતાં કહ્યું કે શાંતિપૂર્ણ પ્રદર્શન માટે દિવસ અને તારીખ ફાળવવામાં આવે, નહીંતર સંગઠન પોતે જ આંદોલનની જાહેરાત કરશે.