કોંગ્રેસ નેતા રાહુલ ગાંધીના કાફલાની ગાડીઓ સોમવારે સવારે ઉત્તર પ્રદેશના સુલ્તાનપુરમાં પૂર્વાંચલ એક્સપ્રેસ-વે પર એકબીજા સાથે અથડાઈ ગઈ હતી. અકસ્માત ગાડીઓની ઝડપ વધારે હોવાને કારણે થયો હોવાનું જણાવવામાં આવી રહ્યું છે. આ ઘટનામાં કેટલાક લોકોને સામાન્ય ઈજાઓ થઈ છે, જ્યારે રાહુલ ગાંધી સુરક્ષિત છે.
રાહુલ ગાંધી સુલ્તાનપુર કોર્ટમાં હાજરી આપવા જઈ રહ્યા હતા. તેઓ ભાજપ નેતા અમિત શાહ સાથે જોડાયેલા માનહાનિના કેસમાં એમપી-એમએલએ કોર્ટમાં હાજર થવાના હતા. કોર્ટ આજે આ કેસમાં ચુકાદો પણ સંભળાવી શકે છે. કોર્ટે રાહુલ ગાંધીને હાજર થવા માટે જણાવ્યું હતું.
રાહુલ ગાંધી દિલ્હીથી લખનઉ પહોંચ્યા બાદ એરપોર્ટ પર મીડિયા સાથે કોઈ વાત કર્યા વિના સીધા સુલ્તાનપુર જવા રવાના થઈ ગયા હતા. લખનઉથી સુલ્તાનપુર જતાં પૂર્વાંચલ એક્સપ્રેસ-વે પર આ અકસ્માત થયો.
આ કેસની શરૂઆત 2018માં થઈ હતી. ભાજપ નેતા વિજય મિશ્રાએ ઑગસ્ટ 2018માં રાહુલ ગાંધી વિરુદ્ધ ફરિયાદ નોંધાવી હતી. આરોપ એવો છે કે રાહુલ ગાંધીએ 8 મે 2018ના રોજ બેંગલુરુમાં યોજાયેલી પ્રેસ કોન્ફરન્સમાં કહ્યું હતું કે, 'જે પાર્ટી ઈમાનદારીની વાત કરે છે, તેના અધ્યક્ષ પર હત્યાનો આરોપ છે.'
બીજી તરફ, સુલ્તાનપુરમાં પૂર્વાંચલ એક્સપ્રેસ-વે પર કૂરેભાર પાસે કોંગ્રેસીઓ રાહુલ ગાંધીના સ્વાગત માટે ઊભા હતા. આ દરમિયાન પૂર્વ મંત્રી ઓપી સિંહે આશરે 400 ગાડીઓના કાફલા અને 4 હજાર લોકો સાથે પહોંચીને શક્તિ પ્રદર્શન કર્યું હતું.
રાહુલ ગાંધી કોર્ટમાં પહોંચ્યા બાદ સુલ્તાનપુરની સ્પેશિયલ એમપી-એમએલએ કોર્ટરૂમનો દરવાજો બંધ કરાવી દેવામાં આવ્યો હતો અને સુનાવણી શરૂ થઈ હતી. સુલ્તાનપુર દીવાની કોર્ટમાં ફરિયાદીઓને લાઇનમાં ઊભા રાખવામાં આવ્યા હતા. કોર્ટની બહાર ભારે પોલીસ બંદોબસ્ત ગોઠવવામાં આવ્યો હતો અને સુરક્ષા કડક કરવામાં આવી હતી.