ન્યૂયોર્ક: કોંગ્રેસ નેતા રાહુલ ગાંધીએ કહ્યું છે કે ભારત આર્થિક સંકટ તરફ આગળ વધી રહ્યું છે. તેનું મુખ્ય કારણ મોટા પાયે બેરોજગારી અને શિક્ષણ વ્યવસ્થામાં રહેલી ખામીઓ છે. યુવાનોમાં વધતી નિરાશાનું કારણ એ છે કે તેમને પોતાનું ભવિષ્ય દેખાતું નથી.
રાહુલ ગાંધીએ આ વાત ન્યૂયોર્કની કોલંબિયા યુનિવર્સિટીમાં વિદ્યાર્થીઓ અને ફેકલ્ટી સમક્ષ કહી. તેઓ અમેરિકાના બે દિવસના પ્રવાસે છે અને આજે યુનિવર્સિટી ઓફ શિકાગોની મુલાકાત લેવાના છે.
રાહુલ ગાંધીએ ચૂંટણી પ્રક્રિયામાં ગેરરીતિનો આરોપ લગાવતાં કહ્યું કે અચાનક 5 લાખ મતનું માર્જિન મળી જવું શક્ય નથી. તેમણે કહ્યું, 'અમારી પાસે ચૂંટણીમાં ગોટાળાના અનેક પુરાવા છે. અમે તેને સામે લાવવા માટે કામ કરી રહ્યા છીએ.'
સ્પેશિયલ ઇન્ટેન્સિવ રિવિઝન (SIR) અંગે રાહુલે કહ્યું કે આ અભિયાન પર અંદાજ કરતાં 20, 30, 40 અથવા 50 ગણો વધુ ખર્ચ થયો છે. આટલા પૈસા ક્યાંથી આવ્યા તે અંગે અનેક સવાલો છે.
તેમણે ચૂંટણી વ્યવસ્થામાં સુધારાની જરૂરિયાત પર ભાર મૂકતાં કહ્યું કે નિષ્પક્ષ ચૂંટણીઓ લોકશાહીનો પાયો છે અને ચૂંટણી પ્રક્રિયામાં પારદર્શિતા સુનિશ્ચિત કરવી જરૂરી છે.
યુવાનોની નિરાશા અંગે રાહુલે કહ્યું કે યુવાનોમાં વર્તમાન પરિસ્થિતિને લઈને નિરાશા છે. તેમાંનો એક વર્ગ મધ્યમવર્ગીય પરિવારોમાંથી આવે છે અને તેણે ઔપચારિક શિક્ષણ મેળવ્યું છે. અમે આ અંગે અભ્યાસ કરી રહ્યા છીએ. તેનું સૌથી મહત્ત્વનું કારણ એ છે કે તેમને પોતાનું ભવિષ્ય દેખાતું નથી.
રાહુલે જણાવ્યું કે કારકિર્દીને લઈને યુવાનો અને તેમના માતા-પિતા વચ્ચેનું અંતર વધી રહ્યું છે. યુવાનો પાછલી પેઢીની સલાહ અને અનુભવો પર સવાલ ઉઠાવી રહ્યા છે. તેઓ કહી રહ્યા છે કે તમે સફળ નહોતા, તમે અમને એ કરવા માટે કહી શકતા નથી જે તમે કર્યું હતું, કારણ કે આજના સમયમાં એ ફોર્મ્યુલા કામ કરતી નથી.