મુખ્ય ચૂંટણી કમિશનર (CEC) જ્ઞાનેશ કુમારના રાજીનામાની માંગ સાથે વિપક્ષી પાર્ટીઓએ દિલ્હીના રામલીલા મેદાનમાં રેલી કાઢી. કોંગ્રેસ નેતા રાહુલ ગાંધીએ આ રેલીમાં કહ્યું કે જ્ઞાનેશ કુમારે વોટ ચોરી કરાવી છે અને તેમને જેલ જવું પડશે. આ રેલીમાં 20 જેટલી વિપક્ષી પાર્ટીઓ જોડાઈ હતી. લેફ્ટના નેતા એમ.એ. બેબી, તેજસ્વી યાદવ, મલ્લિકાર્જુન ખડગે, અખિલેશ યાદવ, મમતા બેનર્જી, ફારૂક અબ્દુલ્લા અને મહેબૂબા મુફ્તી સહિતના નેતાઓએ પણ સંબોધન કર્યું. મમતા બેનર્જીએ કહ્યું કે બંગાળમાં તેમની પાર્ટી હારી નથી, પરંતુ તેમને હરાવવામાં આવ્યા છે.
બંગાળની ખાડીમાં એક સપ્તાહમાં બીજું ચક્રવાતી તોફાન સર્જાયું છે. ઊંડા દબાણના ક્ષેત્રે ‘મુરાસુ’ નામનું ચક્રવાત સ્વરૂપ ધારણ કર્યું છે. હવામાન વિભાગ મુજબ, આ ચક્રવાત 3 નવેમ્બરની સવારે આંધ્રપ્રદેશના દરિયાકિનારે ટકરાઈ શકે છે. તે સમયે પવનની ઝડપ 100થી 110 કિમી પ્રતિ કલાક રહેવાની અને ઝાપટા સાથે 120 કિમી પ્રતિ કલાક સુધી પહોંચવાની શક્યતા છે. આ પહેલાં 26 ઓક્ટોબરે ‘અર્નબ’ ચક્રવાત સર્જાયું હતું, જે 28 ઓક્ટોબરે આંધ્રના કિનારે ટકરાયું હતું. તેના કારણે આંધ્રપ્રદેશ અને ઓડિશામાં ભારે વરસાદ થયો હતો. ઓડિશાના ગંજામ અને ગજપતિ જિલ્લામાં છેલ્લા એક સપ્તાહથી પૂર જેવી સ્થિતિ છે.
અમેરિકાના રાષ્ટ્રપતિ ડોનાલ્ડ ટ્રમ્પે શનિવારે ઇઝરાઇલના વડાપ્રધાન બેન્જામિન નેતન્યાહૂ સાથે ફોન પર વાતચીત કરી હતી. આ માહિતી ‘વોલ સ્ટ્રીટ જર્નલ’એ આપી છે. રવિવારે પત્રકારો સાથે વાત કરતાં ટ્રમ્પે જણાવ્યું કે ઈરાનના પરમાણુ કાર્યક્રમ સાથે જોડાયેલા એક કે બે ઠેકાણાં પર હજુ હુમલો કરવાનો બાકી છે. તેમાં પિકૈક્સ માઉન્ટેન પણ સામેલ છે. અમેરિકન ન્યૂઝ ચેનલ MS NOWએ જણાવ્યું કે વોશિંગ્ટને ખાડી દેશોને ઈરાન પર નવા હુમલાઓ માટે તૈયાર રહેવા કહ્યું છે. આ હુમલાઓ 4 નવેમ્બરથી શરૂ થઈ શકે છે, જે અમેરિકામાં યોજાનારી મિડટર્મ ચૂંટણીના બીજા દિવસે છે.
પંજાબમાં આમ આદમી પાર્ટી (AAP)ના 40 ઉમેદવારોની પ્રથમ યાદી જાહેર થયા બાદ બે ધારાસભ્યોએ પાર્ટી છોડી દીધી છે. પટિયાલાના સમાનાથી ધારાસભ્ય ચેતન સિંહ જૌડામાજરા અને સનૌરથી ધારાસભ્ય હરમીત સિંહ પઠાણમાજરાએ પાર્ટી છોડી છે. જૌડામાજરા AAP સરકારમાં મંત્રી રહી ચૂક્યા છે. પઠાણમાજરા વિરુદ્ધ બળાત્કારનો કેસ નોંધાયો હતો અને તેઓ ઓસ્ટ્રેલિયા ફરાર થઈ ગયા હતા. બંનેએ કહ્યું છે કે કેજરીવાલની ગેરંટી પૂરી થઈ નથી અને તેઓ ભાજપમાં જોડાશે.
ન્યૂઝીલેન્ડે પાંચમી T20 મેચમાં ભારતને 7 વિકેટથી હરાવ્યું છે. ન્યૂઝીલેન્ડે 192 રનનો ટાર્ગેટ 3 વિકેટ ગુમાવીને પૂરો કર્યો. સેફર્ટે 93 રન બનાવ્યા. શ્રેયસ અને ઈશાનની અડધી સદી પણ કામ ન આવી. ટીમ ઈન્ડિયાએ સિરીઝ 3-2થી જીતી લીધી છે.
રાજકોટની સરાઝા હોટેલમાં દારૂ પાર્ટીનો મામલો સામે આવ્યો છે, જેમાં અનેક મોટા નામો સામેલ હોવાનું જણાય છે. આ અંગે વધુ તપાસ ચાલી રહી છે.