સત્ય. સાહસ. સંકલ્પ.

રાહુલ ગાંધીએ કેમ્બ્રિજની રેસ્ટોરન્ટમાં ગર્લફ્રેન્ડ સાથે જમવાનો કિસ્સો કહ્યો, માતા-પિતાની પ્રેમકથા યાદ કરી

રાહુલ ગાંધીએ કેમ્બ્રિજની રેસ્ટોરન્ટમાં ગર્લફ્રેન્ડ સાથે જમવાનો કિસ્સો કહ્યો, માતા-પિતાની પ્રેમકથા યાદ કરી

કોંગ્રેસ સંસદીય દળના અધ્યક્ષા સોનિયા ગાંધીના સંસ્મરણો પર આધારિત પુસ્તક ‘Belonging: A Journey of Love’નું સોમવારે વિમોચન થયું. આ પ્રસંગે રાહુલ ગાંધીએ પોતાના અંગત જીવનનો એક રસપ્રદ કિસ્સો શેર કર્યો, જે તેમના માતા-પિતા રાજીવ ગાંધી અને સોનિયા ગાંધીની પહેલી મુલાકાત સાથે જોડાયેલો છે.

રાહુલે જણાવ્યું કે કેમ્બ્રિજમાં અભ્યાસ દરમિયાન તેઓ પોતાની ગર્લફ્રેન્ડને ‘વર્સિટી રેસ્ટોરન્ટ’માં લઈ ગયા હતા. તેમણે કહ્યું, ‘મારા માતા-પિતા પહેલીવાર આ જ રેસ્ટોરન્ટમાં મળ્યા હતા, તેથી હું એ સ્થળ જોવા માંગતો હતો.’ રેસ્ટોરન્ટ પહોંચતા તેમને પીળા રંગનો દરવાજો યાદ આવ્યો. દરવાજા પાસે ઊભેલા સજ્જને પૂછ્યું કે કેટલા લોકો છે, તો રાહુલે ‘2’ કહ્યું. અંદર જઈને બેઠા બાદ કર્મચારીએ મેનુ આપ્યું, ત્યારે રાહુલે તેને કહ્યું કે તેમના માતા-પિતા આ જ રેસ્ટોરન્ટમાં મળ્યા હતા. કર્મચારીએ કહ્યું, ‘ઓહ, તેઓ! હું તેમને ઓળખું છું.’ રાહુલે પૂછ્યું કે તમે તેમના વિશે શું જાણો છો, તો કર્મચારીએ કહ્યું કે તે જાણે છે કે રાહુલ કોની વાત કરી રહ્યા છે. પછી રાહુલે મેનુમાં સૌથી સારી વાનગી પૂછી, તો કર્મચારીએ ‘ચિકન ચેઝર’ સૂચવ્યું. રાહુલે બે પ્લેટ ઓર્ડર કરી અને બંનેએ સાથે જમ્યા.

પોતાની માતા સાથે જોડાયેલી ભાવુક વાતો શેર કરતાં રાહુલે પરિવારના મુશ્કેલ સમયને યાદ કર્યો. તેમણે કહ્યું કે તેમણે ઈન્દિરા ગાંધીને ગોળી વાગતા જોયા અને પિતા રાજીવ ગાંધીને વિસ્ફોટમાં ટુકડાઓમાં વિખેરાતા જોયા. માતાની યાદશક્તિ વિશે વાત કરતાં તેમણે કહ્યું કે તેઓ માતા સાથે સતત દલીલ કરે છે. સોનિયા ગાંધીની યાદશક્તિ અત્યંત તેજ છે અને તેઓ ક્યારેય કશું ભૂલતા નથી, પરંતુ એક જ બાબત એવી છે જે તેમને યાદ નથી – જો પિતાના નિધન સમયે શું બન્યું હતું તે પૂછવામાં આવે તો તેમને તે ઘટનાની કોઈ સ્મૃતિ નથી.

અંતમાં રાહુલે સ્પષ્ટ કર્યું કે આ પુસ્તકમાં જે કંઈ લખાયું છે તે તેમની બહેન પ્રિયંકા અને માતા સોનિયા ગાંધીએ સાથે મળીને તૈયાર કર્યું છે. રાજીવ ગાંધીના નિધનને યાદ કરતાં તેમણે કહ્યું, ‘આ એક અદ્ભુત જીવન અને પ્રેમ હતો, જે એક જ દિવસમાં સમાપ્ત થઈ ગયો.’