આમ આદમી પાર્ટી (AAP) અને ભાજપ (BJP) વચ્ચે દિલ્હીની મતદાર યાદીમાં રાજ્યસભા સાંસદ રાઘવ ચઢ્ઢાના નામની નોંધણીને લઈને નવો વિવાદ સર્જાયો છે. AAP તેને 'બેકડોર એન્ટ્રી' અને ચૂંટણી પંચની છેતરપિંડી ગણાવી રહી છે, જ્યારે ચઢ્ઢાએ તમામ આરોપો નકારી કાઢ્યા છે. પંજાબમાંથી નામ રદ થયા બાદ દિલ્હીમાં નામ ઉમેરાતા AAPએ પ્રશ્નો ઉઠાવ્યા છે. ચૂંટણી પંચે નિયમોનું પાલન થયાનું જણાવ્યું છે.
ચૂંટણી પંચની વેબસાઈટ અનુસાર, રાઘવ ચઢ્ઢાનું નામ દિલ્હીના રાજેન્દ્ર નગર વિધાનસભા ક્ષેત્ર (AC-39) ના ભાગ 46 ની મતદાર યાદીમાં સીરિયલ નંબર 747 પર નોંધાયેલું છે. વિવાદનું મુખ્ય કારણ એ છે કે 31 ઓગસ્ટના રોજ પ્રકાશિત થયેલી ડ્રાફ્ટ યાદીમાં માત્ર 746 મતદારો જ હતા. AAPના રાષ્ટ્રીય મીડિયા પ્રભારી અનુરાગ ઢાંડા અને દિલ્હીના પ્રમુખ સૌરભ ભારદ્વાજે પ્રશ્ન ઉઠાવ્યો છે કે ડ્રાફ્ટ યાદી બહાર પડ્યા પછી 747મી એન્ટ્રી તરીકે રાઘવ ચઢ્ઢાનું નામ કઈ રીતે ઉમેરવામાં આવ્યું. AAPનો આરોપ છે કે યોગ્ય કાનૂની પ્રક્રિયાનું પાલન કર્યા વિના પાછલા બારણેથી આ નામ ઉમેરાયું છે, જે સ્પેશિયલ ઇન્ટેન્સિવ રિવિઝન (SIR) પ્રક્રિયાની પારદર્શકતા પર ગંભીર પ્રશ્નો ઊભા કરે છે.
રાઘવ ચઢ્ઢાએ તમામ આરોપોને નકારી કાઢ્યા છે. તેમણે સ્પષ્ટ કર્યું કે તેમણે ભારતીય ચૂંટણી પંચની તમામ માર્ગદર્શિકાઓ અને પ્રક્રિયાઓનું યોગ્ય રીતે પાલન કર્યું છે. તેમણે AAP પર નિશાન સાધતા કહ્યું કે, 'મેં AAP છોડી દીધી ત્યારથી મને એક યા બીજા કારણસર હેરાન કરાઈ રહ્યો છે. AAP એક્સ (બોયફ્રેન્ડ કે ગર્લફ્રેન્ડ) જેવું વર્તન કરી રહી છે. AAP 'મતદાર યાદી' અને 'પાર્ટી સભ્યપદ રજિસ્ટર' વચ્ચેનો તફાવત ભૂલી ગઈ છે અને જે કોઈ પાર્ટી છોડે છે તેને હેરાન કરી રહ્યા છે.'
અગાઉ રાઘવ ચઢ્ઢા પંજાબના SAS નગર (મોહાલી) મતવિસ્તારના મતદાર હતા અને 2024ની લોકસભા ચૂંટણીમાં તેમણે ત્યાં જ મતદાન કર્યું હતું. ઓગસ્ટની શરૂઆતમાં પંજાબની યાદીમાંથી તેમને 'કાયમી ધોરણે સ્થળાંતરિત' ગણાવીને તેમનું નામ કાઢી નાખવામાં આવ્યું હતું, જેને રાઘવ ચઢ્ઢાએ બદલાની ભાવના ગણાવી હતી. 3 સપ્ટેમ્બરે તેમણે કહ્યું હતું કે તેઓ પંજાબમાં ફરી નામ નોંધાવવાનો પ્રયાસ કરશે, પરંતુ હવે તેમનું નામ દિલ્હીની યાદીમાં આવતા AAP આશ્ચર્યમાં છે.
આ આરોપોનો જવાબ આપતા દિલ્હીના CEO કાર્યાલયે સ્પષ્ટતા કરી છે કે મતદાર યાદીમાં કોઈપણ સુધારો, ઉમેરો કે ઘટાડો લોક પ્રતિનિધિત્વ અધિનિયમ 1950 અને મતદારોની નોંધણી નિયમો 1960 અનુસાર ફોર્મ 6, 7 અને 8 દ્વારા જ થાય છે. નિયમ 25(4) અને કલમ 23 અનુસાર, ડ્રાફ્ટ યાદી અને અંતિમ યાદીના પ્રકાશન વચ્ચે પણ જો યોગ્ય ચકાસણી થાય તો નવા નામો ઉમેરી શકાય છે. 8 સપ્ટેમ્બર સુધીમાં દિલ્હીમાં નામો ઉમેરવા માટે લગભગ 700 જેટલા ફોર્મ મંજૂર કરવામાં આવ્યા છે. નવા ઉમેરાયેલા નામો ઓનલાઈન જોઈ શકાશે અને અંતિમ યાદી 12 ઓક્ટોબરે તથા પૂરક યાદી 4 નવેમ્બરે ઔપચારિક રીતે પ્રકાશિત થશે.
આ અંગે મીડિયાએ અધિકારીઓનો સંપર્ક કર્યો ત્યારે મિશ્ર પ્રતિભાવો મળ્યા. દિલ્હીના મુખ્ય ચૂંટણી અધિકારી અશોક કુમારે જણાવ્યું કે ફોર્મ 6 દ્વારા નામો ઉમેરવાની પ્રક્રિયા ચાલુ છે. મીડિયા ઓફિસર ઉર્મિલાએ ઓનલાઈન અપડેટની પુષ્ટિ કરી. જોકે, ચૂંટણી નોંધણી અધિકારી (ERO) પુનીત પટેલે ખરાબ નેટવર્કનું કારણ આપી વાત કરવાનું ટાળ્યું હતું, અને સંબંધિત બૂથના BLO સોનલે પણ ટિપ્પણી કરવાનો ઇનકાર કર્યો હતો.