ચિપ ઉત્પાદક કંપની ક્વોલકોમે ભારતમાં કર્મચારીઓની છટણી શરૂ કરી છે. કંપનીના વૈશ્વિક કાર્યબળ પુનર્ગઠનના ભાગરૂપે આ પગલું લેવામાં આવી રહ્યું છે. અહેવાલો અનુસાર, ભારતમાં 1,000 કે તેથી વધુ કર્મચારીઓની નોકરીઓ પર અસર થઈ શકે છે. જોકે, આ આંકડો કંપનીએ સત્તાવાર રીતે જાહેર કર્યો નથી.
ક્વોલકોમ ભારતમાં બેંગલુરુ, હૈદરાબાદ, દિલ્હી-એનસીઆર અને ચેન્નઈમાં મોટા ઓપરેશન ધરાવે છે. ભારતમાં કંપનીમાં આશરે 20,000 કર્મચારીઓ કાર્યરત છે, જ્યારે વિશ્વભરમાં આ આંકડો લગભગ 52,000 છે. વૈશ્વિક પુનર્ગઠનથી કંપનીના કુલ કાર્યબળના લગભગ 7 ટકા કર્મચારીઓ પર અસર થઈ શકે છે.
બેંગલુરુમાં છટણીની પ્રક્રિયા શરૂ થઈ ગઈ છે અને તે સિનિયર એન્જિનિયરોને અસર કરી રહી છે. કેટલાક અહેવાલોમાં જણાવાયું છે કે કર્મચારીઓને તબક્કાવાર રીતે છટણી કરવામાં આવશે અને જાન્યુઆરી 2027 સુધીમાં આ પ્રક્રિયા ચાલુ રહેવાની શક્યતા છે.
ગત મહિને કંપનીના સીઈઓ ક્રિસ્ટિયાનો અમોને કર્મચારીઓને પુનર્ગઠન અંગે સંદેશ મોકલ્યો હતો. તેમાં જણાવાયું હતું કે વાર્ષિક કામગીરીના આધારે નવેમ્બરમાં નોકરીમાં કાપ શરૂ થઈ શકે છે. છટણી થયેલા કર્મચારીઓને સેવરેન્સ પેકેજ મળશે. અહેવાલો અનુસાર, પ્રભાવિત કર્મચારીઓને ત્રણ મહિનાનો પગાર મળી શકે છે અને જે કર્મચારીઓ રાહત દસ્તાવેજો નિર્ધારિત સમય પહેલા પૂર્ણ કરશે તેમને એક મહિનાનો વધારાનો પગાર મળી શકે છે. જોકે, આ અંગે કંપનીએ કોઈ સત્તાવાર નિવેદન બહાર પાડ્યું નથી.