ભારતની સ્ટાર બેડમિન્ટન ખેલાડી પી.વી. સિંધુએ BWF વર્લ્ડ ટૂર ફાઇનલ્સ માટે ક્વોલિફાય કરી લીધું છે. આ ટુર્નામેન્ટ 9થી 13 ડિસેમ્બર સુધી ચીનના હાંગઝોઉમાં રમાશે. સિંધુ 2021 પછી પહેલીવાર આ ટુર્નામેન્ટમાં રમશે. 2021માં તેઓ આ ટુર્નામેન્ટમાં ઉપવિજેતા રહ્યા હતા.
2022માં પણ સિંધુએ ક્વોલિફાય કર્યું હતું, પરંતુ ડાબા પગની ઘૂંટીમાં સ્ટ્રેસ ફ્રેક્ચરને કારણે તેમણે નામ પાછું ખેંચવું પડ્યું હતું. ત્યારબાદ 2023થી 2025 સુધી તેઓ આ ટુર્નામેન્ટમાં રમ્યા નહોતા.
વુમન્સ સિંગલ્સમાં કુલ 8 ખેલાડીઓને સ્થાન મળે છે. તેમાંથી સિંધુ સહિત 5 ખેલાડીઓએ ક્વોલિફિકેશન નિશ્ચિત કરી લીધું છે. દક્ષિણ કોરિયાની એન સે-યંગ, જાપાનની અકાને યામાગુચી, ચીનની વાંગ ઝી યી અને ચેન યુ ફેઈએ પણ સ્થાન મેળવી લીધું છે. બાકીનાં 3 સ્થાન માટે 6 ખેલાડીઓ વચ્ચે હરીફાઈ ચાલી રહી છે.
સિંધુએ આ સીઝનમાં અત્યાર સુધી શાનદાર પ્રદર્શન કર્યું છે. તેમણે જુલાઈમાં જાપાન ઓપનનો ખિતાબ જીત્યો હતો. 19 જુલાઈએ રમાયેલી ફાઇનલમાં તેમણે જાપાનની અકાને યામાગુચીને 21-17, 21-17થી હરાવ્યા હતા.
ઓક્ટોબરમાં તેઓ ફ્રેન્ચ ઓપનની ફાઇનલમાં પહોંચ્યા હતા, પરંતુ ખિતાબી મુકાબલામાં તેમને એન સે-યંગ સામે 21-16, 11-21, 12-21થી હારનો સામનો કરવો પડ્યો હતો. તેના એક અઠવાડિયા બાદ તેમણે જર્મનીમાં હાઇલો ઓપનનો ખિતાબ જીતીને વાપસી કરી હતી. ફાઇનલમાં તેમણે ડેનમાર્કની લાઇન હ્જમાર્ક ક્યાર્સફેલ્ડને 39 મિનિટમાં 21-12, 21-14થી હરાવ્યા હતા.
હાઇલો ઓપનમાં સિંધુએ સતત 5 મેચ જીતી હતી અને સમગ્ર ટુર્નામેન્ટમાં એક પણ ગેમ ગુમાવી નહોતી. બીજા ક્રમાંકની સિંધુએ સેમિફાઇનલમાં ભારતની અનમોલ ખરબને 21-13, 21-16થી હરાવ્યા હતા. ફાઇનલમાં તેમણે આઠમા ક્રમાંકની ક્યાર્સફેલ્ડને સીધી ગેમમાં માત આપી હતી.
આ સુપર 500 ટુર્નામેન્ટનો ખિતાબ જીતવા બદલ સિંધુને 9,200 રેન્કિંગ પોઈન્ટ મળ્યા છે. જાપાન ઓપન અને હાઇલો ઓપનના ખિતાબ તથા ફ્રેન્ચ ઓપનની ફાઇનલ સુધી પહોંચવાને કારણે તેમનું ક્વોલિફિકેશન વધુ મજબૂત બન્યું છે.
BWF વર્લ્ડ રેન્કિંગમાં સિંધુ 74,421 પોઈન્ટ સાથે છઠ્ઠા સ્થાને છે. ડિસેમ્બર 2022 પછી આ તેમનું સર્વશ્રેષ્ઠ રેન્કિંગ છે.
વર્લ્ડ ટૂર ફાઇનલ્સ માટે અલગ રેસ રેન્કિંગ હોય છે, જેમાં સિંધુ 81,060 પોઈન્ટ સાથે પાંચમા સ્થાને છે. નિયમિત વર્લ્ડ રેન્કિંગમાં છેલ્લા 52 અઠવાડિયાના પ્રદર્શનની ગણતરી થાય છે, જ્યારે વર્લ્ડ ટૂર રેસમાં વર્તમાન સીઝનની શ્રેષ્ઠ 14 ટુર્નામેન્ટના પોઈન્ટ સામેલ હોય છે. એક દેશમાંથી વધુમાં વધુ 2 ખેલાડીઓ ક્વોલિફાય કરી શકે છે.
હાઇલો ઓપનનો ખિતાબ જીત્યા બાદ સિંધુએ કહ્યું હતું કે આ જીતથી તેમને ઘણો પ્રોત્સાહન અને આત્મવિશ્વાસ મળ્યો છે.
હાંગઝોઉમાં યોજાનારી વર્લ્ડ ટૂર ફાઇનલ્સની કુલ ઇનામી રકમ 35 લાખ ડૉલર (અંદાજે 29 કરોડ રૂપિયા) છે. 8 ખેલાડીઓને 4-4ના બે ગ્રુપમાં વહેંચવામાં આવશે. રાઉન્ડ રોબિન મુકાબલા બાદ દરેક ગ્રુપની ટોચની 2 ખેલાડીઓ સેમિફાઇનલમાં પહોંચશે. સિંધુ 8 વર્ષ બાદ બીજી વખત આ ખિતાબ જીતવાના ઇરાદા સાથે મેદાનમાં ઉતરશે.