ઇન્ડિયન પ્રીમિયર લીગ (IPL)ની ફ્રેન્ચાઇઝી પંજાબ કિંગ્સમાં કોચિંગ સ્ટાફમાં ફેરફાર થયો છે. ટીમના ફિલ્ડિંગ કોચ બ્રેડ હેડિન અને ઝડપી બોલિંગ કોચ જેમ્સ હોપ્સે ટીમ છોડી દીધી છે. બંનેએ આ અંગે ફ્રેન્ચાઇઝીને જાણકારી આપી હોવાનું સૂત્રોનું કહેવું છે. ઓસ્ટ્રેલિયાના ભૂતપૂર્વ વિકેટકીપર બેટ્સમેન હેડિન અને ભૂતપૂર્વ ઝડપી બોલર હોપ્સ બિગ બેશ લીગ (BBL) સાથે જોડાઈ શકે છે.
હવે IPL 2027ની સીઝન પહેલાં ટીમને ત્રણ કોચની જરૂર પડશે. કારણ કે સ્પિન બોલિંગ કોચ સાંઈરાજ બહુતુલેએ પહેલેથી જ ટીમ છોડી દીધી છે. તેઓ ટીમ ઈન્ડિયાના સ્પિન બોલિંગ કોચ તરીકે જોડાયા છે. નવા કોચની પસંદગી મધ્ય ડિસેમ્બરમાં યોજાનારા ઓક્શન પહેલાં પૂરી થઈ શકે છે.
ગયા IPL સીઝનમાં પંજાબ કિંગ્સ લીગ ટેબલમાં પાંચમા સ્થાને રહી હતી. છેલ્લી મેચમાં તેણે લખનઉ સામે જીત મેળવી હતી, પરંતુ પ્લેઓફમાં પહોંચવા માટે તે પૂરતી નહોતી.
ક્રિકબઝના અહેવાલ મુજબ, નવા કોચિંગ સ્ટાફની પસંદગી હેડ કોચ રિકી પોન્ટિંગ કરશે. મેનેજમેન્ટ કેટલાક નામ સૂચવી શકે છે, પરંતુ ઉમેદવારો સાથે વાતચીત અને ઇન્ટરવ્યૂ પોન્ટિંગ સાથે ચર્ચા બાદ જ થશે. એક સૂત્રના જણાવ્યા અનુસાર, 'હેડ કોચ જ નિર્ણય કરશે.' પોન્ટિંગે આ અંગે પૂછાયેલા સવાલનો તરત જવાબ આપ્યો ન હતો.
રિકી પોન્ટિંગને IPL 2025 પહેલાં પંજાબ કિંગ્સના હેડ કોચ તરીકે નિયુક્ત કરવામાં આવ્યા હતા. હોપ્સ પોન્ટિંગના નજીકના માનવામાં આવતા હતા અને તેઓ પોન્ટિંગ સાથે દિલ્હી કેપિટલ્સથી પંજાબ કિંગ્સમાં આવ્યા હતા. હેડિન અગાઉની મેનેજમેન્ટ ટીમ સાથે જોડાયેલા હતા, જ્યારે ટ્રેવર બેલિસ ટીમના મુખ્ય કોચ હતા.