એશિયન ગેમ્સ 2026માં ભારતને બોક્સિંગમાં સફળતા મળી છે. મહિલાઓની 60 કિગ્રા વજન વર્ગની સેમિફાઇનલમાં પ્રિયા ઘંઘાસને ચીનની અનુભવી ખેલાડી ચેંગ્યુ યાંગ સામે 1-4થી હારનો સામનો કરવો પડ્યો છે. આ હાર સાથે તેમણે બ્રોન્ઝ મેડલથી સંતોષ કરવો પડ્યો છે. ટૂંક સમયમાં લવલીના બોર્ગોહેન બોક્સિંગની બીજી સેમિફાઇનલમાં ઉતરશે.
હાલ ભારત એશિયન ગેમ્સ 2026ના મેડલ ટેબલમાં નવમા સ્થાને છે. ભારત પાસે 8 ગોલ્ડ, 21 સિલ્વર અને 26 બ્રોન્ઝ મળીને કુલ 55 મેડલ છે.
પ્રિયા ઘંઘાસ કોણ છે? તે હરિયાણાના ભિવાની જિલ્લાના ધનાના ગામની રહેવાસી છે. તેમના પિતા મહેન્દ્ર ઘંઘાસ વેપારી છે અને માતા ગૃહિણી છે. પરિવારમાં તેમના ભાઈ નીરજ અને એક બહેન પણ છે. નીરજ પણ બોક્સિંગમાં નામ કમાવવા માંગે છે. પ્રિયાની રમત જોઈને લોકો તેમને ગોલ્ડન ગર્લ અને મિની ક્યુબા ભિવાનીની નવી દીકરી કહે છે.
પ્રિયાએ 2016માં બોક્સિંગ કારકિર્દી શરૂ કરી હતી. રસપ્રદ વાત એ છે કે શરૂઆતમાં તેમને કુસ્તી વધુ ગમતી હતી, પરંતુ 2008માં વિજેન્દ્ર સિંહની રમત જોયા બાદ તેમણે બોક્સિંગને કારકિર્દી બનાવવાનું નક્કી કર્યું. 2026 કોમનવેલ્થ ગેમ્સમાં તેમણે 60 કિગ્રા વર્ગની ફાઇનલમાં મેરી અલ-અહમદિયેહને હરાવીને ગોલ્ડ મેડલ જીત્યો હતો.
આ પહેલાં ભારતે તીરંદાજીમાં મિક્સ કમ્પાઉન્ડ ટીમ ઇવેન્ટની ફાઇનલમાં દક્ષિણ કોરિયાને શૂટ-ઓફમાં હરાવીને આઠમો ગોલ્ડ મેડલ જીત્યો હતો. આ જીત સાથે ભારતે લોસ એન્જીલ્સ 2028 ઓલિમ્પિકની ટિકિટ પણ મેળવી લીધી છે.