ભારતીય ક્રિકેટર પૃથ્વી શૉની અંગત જિંદગીમાં મુશ્કેલી વધી છે. તેમની મંગેતર આકૃતિ અગ્રવાલે ઇન્સ્ટાગ્રામ પર પોસ્ટ કરીને સગાઈ તૂટી હોવાની જાહેરાત કરી છે. બંનેએ ભવિષ્યના અલગ-અલગ લક્ષ્યોને કારણે પરસ્પર સંમતિથી અલગ થવાનો નિર્ણય લીધો છે.
આકૃતિ અગ્રવાલે પોતાની પોસ્ટમાં લખ્યું છે, 'અત્યંત ભારે હૈયે જણાવવું પડે છે કે મેં અને મારા મંગેતરે ભવિષ્યના અલગ લક્ષ્યો અને પરિસ્થિતિઓને ધ્યાનમાં રાખીને અલગ થવાનો નિર્ણય લીધો છે. અમે એકબીજાને ઘણો પ્રેમ અને આદર આપીએ છીએ, છતાં અમે સ્વીકાર્યું છે કે અમારા રસ્તા સાથે ચાલવા માટે નથી બન્યા. અંગત જવાબદારીઓ અને વર્તમાન પરિસ્થિતિને જોતાં પરસ્પર સહમતિથી સંબંધનો અંત લાવવાનું નક્કી કર્યું છે.'
પૃથ્વી શૉ અને સોશિયલ મીડિયા ઇન્ફ્લુએન્સર તેમજ અભિનેત્રી આકૃતિ અગ્રવાલે 8 માર્ચ, 2026ના રોજ સગાઈ કરી હતી. છેલ્લા કેટલાક દિવસોથી બંને વચ્ચે અણબનાવની ચર્ચા ચાલતી હતી, જેને આ પોસ્ટે મહોર લગાવી દીધી છે.
26 વર્ષીય પૃથ્વી શૉને એક સમયે ભારતીય ક્રિકેટનો ભાવિ સુપરસ્ટાર માનવામાં આવતો હતો. 2018માં માત્ર 18 વર્ષની ઉંમરે તેમણે વેસ્ટ ઈન્ડિઝ સામે ટેસ્ટ ડેબ્યૂમાં સદી ફટકારી હતી. જોકે, ખરાબ ફોર્મ અને ફિટનેસના પ્રશ્નોને કારણે તેઓ ટીમમાંથી બહાર થઈ ગયા છે અને હાલમાં સ્થાનિક ક્રિકેટ તેમજ આઈપીએલમાં વાપસી માટે સંઘર્ષ કરી રહ્યા છે.