એશિયન ગેમ્સ 2026માં ભારતની 23 વર્ષીય ગોલ્ફર પ્રણવી ઉર્સે મહિલાઓની વ્યક્તિગત સ્પર્ધામાં ગોલ્ડ મેડલ જીતીને ઈતિહાસ રચ્યો છે. 15 અંડર પારના સ્કોર સાથે તેમણે આ સિદ્ધિ મેળવી. આ સાથે તેઓ એશિયન ગેમ્સમાં ગોલ્ફની વ્યક્તિગત ઈવેન્ટમાં ગોલ્ડ જીતનારી પ્રથમ ભારતીય મહિલા ગોલ્ફર બન્યા છે.
પ્રણવીએ ફાઈનલમાં ચાર રાઉન્ડની સ્પર્ધા 15 અંડર પાર પર પૂરી કરી. છેલ્લા હોલ પર તેમણે પાર બનાવ્યો. સિંગાપોરની શેનન ટેન અને ચીનની યિન રૂઓનિંગે 14 અંડર પાર સાથે સંયુક્ત રીતે સિલ્વર મેડલ જીત્યો. આમ, પ્રણવીએ એક સ્ટ્રોકની સરસાઈ સાથે ગોલ્ડ મેડલ જીત્યો.
મૈસૂરની પ્રણવીએ ત્રીજા હોલમાં ટ્રિપલ બોગી કર્યા બાદ ત્રણ બર્ડી લગાવી. આખરી રાઉન્ડમાં તેમણે ઈવન પાર 70નો સ્કોર કર્યો અને ચાર દિવસમાં કુલ સ્કોર 15 અંડર 265 રહ્યો. પ્રણવી, અદિતિ અશોક (આખરી રાઉન્ડમાં 67) અને દીક્ષા ડાગર (આખરી રાઉન્ડમાં 77)ની ટીમે સિલ્વર મેડલ જીત્યો. ભારતે 14 અંડર 546નો સ્કોર કર્યો. ચીને 22 અંડર 538 સાથે ટીમ ઈવેન્ટમાં ગોલ્ડ મેડલ જીત્યો.
પ્રણવી ઉર્સે છ વર્ષની ઉંમરે ગોલ્ફ રમવાનું શરૂ કર્યું હતું. તેમના પિતા અને ભાઈ તેમના પ્રેરણાસ્રોત બન્યા હતા. તેઓ 2023ની એશિયન ગેમ્સમાં પણ ભારતીય મહિલા ટીમનો હિસ્સો હતા, જ્યારે ટીમ ચોથા સ્થાને રહીને મેડલ ચૂકી ગઈ હતી. ભારત માટે આ એશિયન ગેમ્સ 2026માં અત્યાર સુધીનો 18મો ગોલ્ડ મેડલ છે.
ભારત માટે ગોલ્ફમાં પુરુષ વર્ગમાં છેલ્લે શિવ કપૂરે 2002 બુસાન રમતોમાં ગોલ્ડ મેડલ જીત્યો હતો. ત્યારબાદ 24 વર્ષ બાદ ભારતને ગોલ્ફમાં ફરી ગોલ્ડ મળ્યો છે.