જો તમે શેરબજારના જોખમો ટાળીને સુરક્ષિત રીતે પૈસા વધારવા માંગતા હો, તો પોસ્ટ ઓફિસની બચત યોજનાઓ એક સારો વિકલ્પ બની શકે છે. ભારત સરકારે ઓક્ટોબરથી ડિસેમ્બર 2026ના ત્રિમાસિક ગાળા માટે નાની બચત યોજનાઓના વ્યાજ દરોમાં કોઈ ઘટાડો કર્યો નથી. આ યોજનાઓ 100 ટકા સરકારી ગેરંટી, આકર્ષક વ્યાજ દર અને કરમુક્તિ સાથે આવે છે.
અહીં પોસ્ટ ઓફિસની પાંચ લોકપ્રિય યોજનાઓની વિગતો આપી છે:
1. સિનિયર સિટિઝન સેવિંગ્સ સ્કીમ (SCSS) – 8.20% વ્યાજ
60 વર્ષ અને તેથી વધુ ઉંમરના નાગરિકો માટે આ યોજના છે. વાર્ષિક 8.20% વ્યાજ મળે છે, જે ત્રિમાસિક ચૂકવવામાં આવે છે. રોકાણનો સમયગાળો 5 વર્ષનો છે. લઘુત્તમ 1,000 રૂપિયાથી મહત્તમ 30 લાખ રૂપિયા સુધી રોકાણ કરી શકાય છે. જો તમે 30 લાખ રૂપિયા રોકો છો, તો દર ત્રણ મહિને 61,500 રૂપિયા વ્યાજ મળશે, એટલે કે દર મહિને આશરે 20,500 રૂપિયાની આવક. આવકવેરા કાયદાની કલમ 80C હેઠળ 1.5 લાખ રૂપિયા સુધીની કરમુક્તિ મળે છે.
2. પોસ્ટ ઓફિસ મન્થલી ઇન્કમ સ્કીમ (POMIS) – માસિક આવક
એકસાથે રકમ જમા કરીને દર મહિને નિશ્ચિત આવક મેળવવા માંગતા લોકો માટે આ યોજના યોગ્ય છે. વાર્ષિક 7.40% વ્યાજ મળે છે, જે માસિક ચૂકવવામાં આવે છે. રોકાણનો સમયગાળો 5 વર્ષ છે. એકલા ખાતામાં મહત્તમ 9 લાખ રૂપિયા અને સંયુક્ત ખાતામાં 15 લાખ રૂપિયા સુધી જમા કરી શકાય છે. 9 લાખ રૂપિયા જમા કરાવો તો દર મહિને 5,550 રૂપિયા અને 15 લાખ રૂપિયા પર 9,250 રૂપિયા મળશે.
3. પોસ્ટ ઓફિસ ટાઇમ ડિપોઝિટ (5-વર્ષની FD) – બેંક કરતાં સારું વ્યાજ
પોસ્ટ ઓફિસની 5 વર્ષની FD સુરક્ષિત રોકાણ અને કર બચત બંને આપે છે. વાર્ષિક 7.50% વ્યાજ મળે છે, જે ત્રિમાસિક ચક્રવૃદ્ધિ પ્રમાણે ગણાય છે. 1 થી 5 વર્ષની FD ઉપલબ્ધ છે, પરંતુ 5 વર્ષની FD પર સૌથી વધુ વ્યાજ મળે છે. લઘુત્તમ 1,000 રૂપિયાથી શરૂઆત કરી શકાય છે, કોઈ મહત્તમ મર્યાદા નથી. કલમ 80C હેઠળ 1.5 લાખ રૂપિયા સુધીની કર કપાત મળે છે.
4. પોસ્ટ ઓફિસ રિકરિંગ ડિપોઝિટ (5-વર્ષની RD) – નાની બચતથી મોટું ફંડ
જેઓ એકસાથે મોટી રકમ રોકી શકતા નથી, તેમના માટે આ યોજના યોગ્ય છે. વાર્ષિક 6.70% વ્યાજ મળે છે, જે ત્રિમાસિક ચક્રવૃદ્ધિ પ્રમાણે ગણાય છે. દર મહિને ફક્ત 100 રૂપિયાથી શરૂઆત કરી શકાય છે. જો તમે દર મહિને 5,000 રૂપિયા જમા કરો છો, તો 5 વર્ષમાં કુલ 3 લાખ રૂપિયા જમા થશે. 6.70% વ્યાજ સાથે તમને આશરે 56,830 રૂપિયા વ્યાજ મળશે અને પાકતી મુદતે કુલ 3,56,830 રૂપિયા મળશે. 12 મહિના પછી તમે કુલ જમા રકમના 50% સુધી લોન લઈ શકો છો.
5. પોસ્ટ ઓફિસ સેવિંગ્સ એકાઉન્ટ – ઇમરજન્સી ફંડ માટે
પૈસા ગમે ત્યારે ઉપાડવાની સુવિધા સાથે સુરક્ષિત રાખવા માંગતા હો તો આ સાદું સેવિંગ્સ એકાઉન્ટ શ્રેષ્ઠ છે. વાર્ષિક 4.0% વ્યાજ મળે છે. ફક્ત 500 રૂપિયાથી ખાતું ખોલી શકાય છે. સામાન્ય નાગરિકો માટે કલમ 80TTA હેઠળ 10,000 રૂપિયા સુધીના વ્યાજ પર કરમુક્તિ છે, જ્યારે વરિષ્ઠ નાગરિકો માટે 50,000 રૂપિયા સુધીના વ્યાજ પર કરમુક્તિ મળે છે.
અસ્વીકરણ: આ માહિતી મીડિયા રિપોર્ટ્સ પર આધારિત છે. રોકાણ કરતા પહેલાં નિષ્ણાંતની સલાહ લેવી.