ટપાલ વિભાગ તેના બચત ખાતાધારકોને ATM, ઇન્ટરનેટ અને મોબાઇલ બેંકિંગની સુવિધા આપે છે. જો તમારી પાસે પોસ્ટ ઓફિસનું ATM કાર્ડ છે, તો તેના નિયમો જાણવા જરૂરી છે.
હવે પોસ્ટ ઓફિસ ATMમાંથી એક દિવસમાં વધુમાં વધુ ₹25,000 ઉપાડી શકાય છે. પરંતુ એક વખતમાં મહત્તમ ₹10,000 જ ઉપાડી શકાશે. પૈસા ઉપાડતી વખતે ખાતામાં ઓછામાં ઓછું ₹500નું બેલેન્સ રહેવું જરૂરી છે. જો બેલેન્સ આનાથી ઓછું હશે તો ટ્રાન્ઝેક્શન રિજેક્ટ થઈ શકે છે અને ₹23 સુધીનો વધારાનો ચાર્જ પણ લાગી શકે છે.
મફત ટ્રાન્ઝેક્શનની મર્યાદા
ટપાલ વિભાગ પોતાના ATM અને બીજી બેંકોના ATM માટે અલગ-અલગ મફત ટ્રાન્ઝેક્શનની મર્યાદા નક્કી કરે છે.
પોસ્ટ ઓફિસના ATM પર ખાતાધારકોને દર મહિને 5 મફત ટ્રાન્ઝેક્શન મળે છે. આમાં નાણાકીય અને બિન-નાણાકીય બંને પ્રકારના ટ્રાન્ઝેક્શનનો સમાવેશ થાય છે.
બીજી બેંકોના ATM પર મેટ્રો શહેરોમાં (6 મુખ્ય મેટ્રો સિટી) દર મહિને 3 મફત ટ્રાન્ઝેક્શન મળે છે, જ્યારે નોન-મેટ્રો વિસ્તારોમાં દર મહિને 5 મફત ટ્રાન્ઝેક્શનની છૂટ છે.
મફત મર્યાદા પૂરી થયા પછીનો ચાર્જ
મફત ટ્રાન્ઝેક્શનની મર્યાદા પાર કર્યા પછી વધારાનો ચાર્જ ચૂકવવો પડે છે.
બીજી બેંકના ATM પર રોકડ ઉપાડવા (ફાઇનાન્શિયલ ટ્રાન્ઝેક્શન) પર ₹23 ઉપરાંત GST લાગે છે. બેલેન્સ ચેક કરવું કે મિની સ્ટેટમેન્ટ જેવા બિન-નાણાકીય ટ્રાન્ઝેક્શન પર ₹11 ઉપરાંત GST લાગે છે.
પોસ્ટ ઓફિસના ATM પર મફત મર્યાદા પૂરી થયા પછી નાણાકીય ટ્રાન્ઝેક્શન પર ₹10 ઉપરાંત GST અને બિન-નાણાકીય ટ્રાન્ઝેક્શન પર ₹5 ઉપરાંત GSTનો ચાર્જ ચૂકવવો પડે છે.
વ્યાજની ગણતરી અને ₹50નો જાળવણી દંડ
પોસ્ટ ઓફિસ બચત ખાતામાં જમા રકમ પર વાર્ષિક 4%ના દરે વ્યાજ મળે છે.
વ્યાજની ગણતરી દર મહિનાની 10મી તારીખથી મહિનાના અંતિમ દિવસ સુધી ખાતામાં રહેલા સૌથી ઓછા બેલેન્સ પર થાય છે. આ વ્યાજ વર્ષમાં એક વાર ખાતામાં જમા કરવામાં આવે છે.
જો કોઈ નાણાકીય વર્ષના અંતે ખાતામાં લઘુત્તમ બેલેન્સ ₹500થી ઓછું હોય, તો ખાતાધારક પાસેથી ₹50નો એકાઉન્ટ મેન્ટેનન્સ ચાર્જ વસૂલ કરી શકાય છે.