દરેક સામાન્ય માણસનું સપનું હોય છે પોતાનું આગવું ઘર. પણ આર્થિક તંગીને કારણે ઘણા લોકો આ સપનું પૂરું કરી શકતા નથી. એવા લોકો માટે સરકારે પ્રધાનમંત્રી આવાસ યોજના (PMAY) શરૂ કરી છે, જે લાખો પરિવારોને આર્થિક મદદ પૂરી પાડે છે. પણ આ યોજનાના નિયમો અને પાત્રતા અંગે લોકોના મનમાં ઘણા સવાલો થાય છે.
એક સામાન્ય પ્રશ્ન એ છે કે જો બે ભાઈઓ પહેલાં સંયુક્ત પરિવારમાં રહેતા હોય અને પછી કાયદેસર રીતે અલગ થઈ જાય, તો શું બંને આ યોજના હેઠળ અલગ-અલગ લાભ મેળવી શકે? આનો જવાબ યોજનાના નિયમો અને અરજદારની પાત્રતા પર આધાર રાખે છે.
યોજનાના નિયમો મુજબ, 'પરિવાર' એટલે પતિ, પત્ની અને તેમના અપરિણીત બાળકો. જો ભાઈઓ કાયદેસર રીતે અલગ થઈને સ્વતંત્ર પરિવાર તરીકે રહેતા હોય, તો તેઓ પોતાની પાત્રતા મુજબ અલગ અરજી કરી શકે છે. પરંતુ માત્ર અલગ થવાથી લાભની ખાતરી નથી; અન્ય શરતો પણ પૂરી કરવી પડે.
મુખ્ય શરત એ છે કે અરજદાર, તેના પતિ/પત્ની કે અપરિણીત બાળકોના નામે દેશમાં ક્યાંય પાકું મકાન ન હોવું જોઈએ. વધુમાં, અલગ પરિવાર તરીકે લાભ મેળવવા માટે અલગ રેશનકાર્ડ, લાઈટ બિલ અને રહેઠાણના અન્ય કાયદેસર દસ્તાવેજો હોવા જરૂરી છે. સરકારી અધિકારીઓ પરિવાર વિભાજનના સત્તાવાર પુરાવા માંગી શકે છે.
અંતિમ મંજૂરી સરકારી ચકાસણી પર આધારિત હોય છે. વધુ માહિતી માટે સત્તાવાર વેબસાઇટ PMAY-U જોઈ શકાય.