નવી દિલ્હી: વડાપ્રધાન નરેન્દ્ર મોદીએ મંત્રી પરિષદના આશરે 20 રાજ્ય મંત્રીઓ સાથે મોડી રાત્રે લગભગ ત્રણ કલાક સુધી એક મહત્વપૂર્ણ બેઠક યોજી હતી. આ બેઠકમાં ભાજપના મંત્રીઓ ઉપરાંત સાથી પક્ષોના નેતાઓ અને સ્વતંત્ર હવાલો ધરાવતા રાજ્ય મંત્રીઓ પણ ઉપસ્થિત રહ્યા હતા. સૂત્રોના જણાવ્યા મુજબ, આગામી સમયમાં સંભવિત કેબિનેટ ફેરબદલની અટકળો વચ્ચે આ બેઠકને ઘણી સૂચક માનવામાં આવી રહી છે.
બેઠકમાં મંત્રીઓના વ્યક્તિગત કાર્ય, તેમની કામગીરી અને ભવિષ્યના વિઝન પર વિગતવાર ચર્ચા થઈ હતી. વડાપ્રધાને સ્પષ્ટ કહ્યું હતું કે મંત્રાલયોના આંકડા તો સચિવો પણ આપી શકે છે, પરંતુ મંત્રીઓએ પોતાના ક્ષેત્રમાં આપેલું વ્યક્તિગત યોગદાન અને સક્રિય ભૂમિકા રજૂ કરવી જોઈએ. મંત્રીઓને સૂચના આપવામાં આવી હતી કે તેઓ તેમના મંત્રાલયની યોજનાઓથી કેટલા લોકોના જીવન પર હકારાત્મક અસર પડી છે તેનું સચોટ મૂલ્યાંકન કરે. વડાપ્રધાને જનસંપર્ક અને સામાજિક ભૂમિકાને વધુ મજબૂત બનાવવા પર ભાર મૂક્યો હતો.
વડાપ્રધાને તમામ મંત્રીઓને 'વિકસિત ભારત 2047' માટે પોતાનું વિઝન અને રોડમેપ તૈયાર કરીને રજૂ કરવા કહ્યું હતું. આગામી પાંચ વર્ષ અને 2047 સુધીની લાંબા ગાળાની કાર્યયોજનાઓ શેર કરવા માટે પણ સૂચના આપવામાં આવી છે. સામાજિક ન્યાય, આદિવાસી કલ્યાણ, યુવા વર્ગ અને શિક્ષણ જેવા પાયાના મુદ્દાઓ પર વિશેષ ધ્યાન કેન્દ્રિત કરવામાં આવ્યું હતું. દલિતો, પછાત વર્ગો, આદિવાસીઓ અને યુવાનોના ઉત્કર્ષ માટે મંત્રાલય સ્તરે કઈ ચોક્કસ યોજનાઓ છે તે અંગે વડાપ્રધાને તીક્ષ્ણ પ્રશ્નો પૂછ્યા હતા.
બેઠકનો બીજો મહત્વનો હિસ્સો સોશિયલ મીડિયા પર મંત્રીઓના પ્રદર્શનની સમીક્ષાનો હતો. વડાપ્રધાને સરકારી યોજનાઓ અને મુદ્દાઓને લોકો સુધી પહોંચાડવાના પ્રયાસો વિશે પૂછ્યું હતું. વિદ્યાર્થીઓના વિરોધ પ્રદર્શનો અને વિપક્ષોના નિવેદનોનો ડિજિટલ પ્લેટફોર્મ પર કેવી રીતે સામનો કરવામાં આવ્યો તેની ચર્ચા થઈ હતી. મંત્રીઓના સોશિયલ મીડિયા ફોલોઅર્સ અને જનતા સાથેના ડિજિટલ જોડાણ વિશે કડક પૂછપરછ કરાઈ હતી. તમામ મંત્રીઓને તેમના ડિજિટલ પ્રદર્શનનું રિપોર્ટ કાર્ડ સોંપવામાં આવ્યું હતું. સૂત્રોના જણાવ્યા મુજબ, કોઈ પણ રાજ્યમંત્રીનું સોશિયલ મીડિયા પ્રદર્શન સંતોષકારક ન હતું, અને તમામને જનસંપર્કમાં સુધારો કરવાની તાકીદ કરવામાં આવી છે.