વડાપ્રધાન નરેન્દ્ર મોદી 30 અને 31 ઓક્ટોબર એમ બે દિવસ ગુજરાતના પ્રવાસે છે. આ દરમિયાન તેઓ વિવિધ વિકાસકાર્યોના લોકાર્પણ અને ખાતમુહૂર્ત તેમજ રાષ્ટ્રીય એકતા દિવસના કાર્યક્રમોમાં ભાગ લેશે.
આજે 30 ઓક્ટોબરે સવારે આશરે 9:30 વાગ્યે વડાપ્રધાન બનાસકાંઠાના ભીલડી ખાતે એમ્બ્રિયો ટ્રાન્સફર ટેક્નોલોજી-ઇન વિટ્રો ફર્ટિલાઇઝેશન (ET-IVF) લેબોરેટરી અને ભારત બોવાઇન બ્રીડિંગ એન્ડ રિસર્ચ સેન્ટર (BBBRC)ના પશુ ફાર્મની મુલાકાત લેશે.
ત્યારબાદ સવારે આશરે 10:30 વાગ્યે તેઓ ₹14,000 કરોડથી વધુનાં વિવિધ વિકાસકાર્યોનું ખાતમુહૂર્ત, ઉદ્ઘાટન અને લોકાર્પણ કરશે. આ પ્રસંગે બે ટ્રેન સેવાઓને લીલી ઝંડી આપવામાં આવશે અને તેઓ ઉપસ્થિત લોકોને સંબોધન પણ કરશે.
BBBRC રાષ્ટ્રને સમર્પિત થશે
ભીલડી ખાતે 127 એકર વિસ્તારમાં વિકસાવવામાં આવેલું ભારત બોવાઇન બ્રીડિંગ એન્ડ રિસર્ચ સેન્ટર વડાપ્રધાન રાષ્ટ્રને સમર્પિત કરશે. આધુનિક સુવિધાઓથી સજ્જ આ કેન્દ્ર ગાય-ભેંસના સંવર્ધન, આનુવંશિક સુધારણા અને આધુનિક પ્રજનન ટેક્નોલોજીને પ્રોત્સાહન આપશે. આ સંસ્થાથી પશુઓની જાતિ સુધારવાની પ્રક્રિયામાં 10થી 20 ગણી ઝડપ લાવવાનું લક્ષ્ય રાખવામાં આવ્યું છે. કાંકરેજ ગાયની જાતિને સમર્પિત આ પ્રકારનું દેશનું પ્રથમ કેન્દ્ર હોવાનું જણાવાયું છે.
થરાદ અને રાધનપુરમાં બાયો-CNG પ્લાન્ટ
બનાસ ડેરી દ્વારા થરાદ અને રાધનપુરમાં સ્થાપવામાં આવનારા બે બાયો-CNG પ્લાન્ટનું વડાપ્રધાન ખાતમુહૂર્ત કરશે. આ પ્લાન્ટમાં દરરોજ અનુક્રમે 75 મેટ્રિક ટન અને 100 મેટ્રિક ટન પશુઓના છાણની પ્રક્રિયા કરવાની ક્ષમતા હશે. આ પ્રોજેક્ટથી પશુઓના છાણનો ઉપયોગ ઊર્જા ઉત્પાદન માટે કરી શકાશે.
અમદાવાદ મેટ્રોના વિસ્તરણનું ખાતમુહૂર્ત
વડાપ્રધાન અમદાવાદ મેટ્રો ફેઝ-2A અને ફેઝ-2Bના વિસ્તરણનું ખાતમુહૂર્ત કરશે. ફેઝ-2A હેઠળ એરપોર્ટ સુધી મેટ્રો કનેક્ટિવિટી વધારવામાં આવશે. આ માર્ગ 6 કિલોમીટરથી વધુ લાંબો હશે અને તેમાં કોતેશ્વર રોડથી એરપોર્ટ સુધી પાંચ સ્ટેશનનો સમાવેશ થશે.
ફેઝ-2B હેઠળ ગિફ્ટ સિટીથી શાહપુર સુધી 3.3 કિલોમીટરથી વધુ લાંબા મેટ્રો માર્ગનું નિર્માણ કરવામાં આવશે. આ વિભાગમાં ત્રણ સ્ટેશન હશે. આ વિસ્તરણથી અમદાવાદમાં જાહેર પરિવહન વ્યવસ્થા વધુ મજબૂત બનવામાં મદદ મળશે.
અમદાવાદ-મહેસાણા હાઇવે આઠ લેનનો બનશે
અમદાવાદ અને ઉત્તર ગુજરાત વચ્ચેની કનેક્ટિવિટી સુધારવા માટે અમદાવાદ-મહેસાણા સ્ટેટ હાઇવે-41ને ચાર લેનમાંથી આઠ લેનમાં અપગ્રેડ અને મજબૂત બનાવવાની યોજનાનું ખાતમુહૂર્ત કરવામાં આવશે. આશરે ₹2,600 કરોડના ખર્ચે હાથ ધરાતા આ પ્રોજેક્ટથી મુસાફરી વધુ ઝડપી, સુરક્ષિત અને સુવિધાજનક બનવાની અપેક્ષા છે.
4,030 નવા બાળમૈત્રી આંગણવાડી કેન્દ્રો
ગુજરાતમાં 4,030 નવા બાળમૈત્રી આંગણવાડી કેન્દ્રોનું ખાતમુહૂર્ત કરવામાં આવશે, જ્યારે પૂર્ણ થયેલાં 361 બાળમૈત્રી આંગણવાડી કેન્દ્રોનું ઉદ્ઘાટન કરવામાં આવશે. આશરે ₹800 કરોડના રોકાણ સાથેની આ પહેલથી ચાર લાખથી વધુ લોકોને લાભ મળવાની અપેક્ષા છે.
કૃષિ ક્ષેત્રની 521 પરિયોજનાઓ રાષ્ટ્રને સમર્પિત
વડાપ્રધાન કૃષિ ઇન્ફ્રાસ્ટ્રક્ચર ફંડ હેઠળ પૂર્ણ થયેલી 521 પરિયોજનાઓ રાષ્ટ્રને સમર્પિત કરશે. આ પરિયોજનાઓ પાછળ આશરે ₹4,950 કરોડનો ખર્ચ થયો છે. તેમાં કોલ્ડ સ્ટોરેજ, કોલ્ડ ચેઇન, ગોડાઉન, સાઇલો, પોલીહાઉસ, ગ્રીનહાઉસ અને કૃષિ પેદાશોના પ્રાથમિક તથા દ્વિતીય પ્રોસેસિંગ કેન્દ્રો સહિતની સુવિધાઓનો સમાવેશ થાય છે.
આ ઉપરાંત દિયોદરના સણાદરમાં બટાકાની પ્રક્રિયા કરતા પ્લાન્ટના વિસ્તરણનું ઉદ્ઘાટન કરવામાં આવશે અને પાલનપુરમાં અલ્ટ્રા-હાઇ-ટેમ્પરેચર (UHT) ઉત્પાદનો માટે ઓટોમેટેડ સ્ટોરેજ એન્ડ રિટ્રીવલ સિસ્ટમ શરૂ કરવામાં આવશે.
બે નવી ટ્રેન સેવાઓને લીલી ઝંડી
રેલવે કનેક્ટિવિટી મજબૂત કરવા માટે વડાપ્રધાન અમદાવાદ (સાબરમતી)-વારાણસી એક્સપ્રેસ અને મહેસાણા-બેચરાજી-સાબરમતી મેમુ ટ્રેન સેવાઓને લીલી ઝંડી આપશે. આ સેવાઓથી મુસાફરોને અવરજવરમાં સુવિધા મળશે.
એકતાનગરમાં ભારત પર્વ-2026નું ઉદ્ઘાટન
30 ઓક્ટોબરે સાંજે વડાપ્રધાન એકતાનગર ખાતે ભારત પર્વ-2026નું ઉદ્ઘાટન કરશે. આ મહોત્સવનો હેતુ ભારતની સાંસ્કૃતિક વિરાસત, વિવિધતા અને રાષ્ટ્રીય એકતાની ભાવનાને ઉજાગર કરવાનો છે. 'એક ભારત, શ્રેષ્ઠ ભારત'ની ભાવનાને આગળ વધારતા આ પર્વમાં વિવિધ રાજ્યો અને કેન્દ્રશાસિત પ્રદેશોની પરંપરાઓ, લોકકલા, પ્રાદેશિક વાનગીઓ અને હસ્તકલાનું પ્રદર્શન થશે.