ઘણા લોકોના મનમાં પ્રશ્ન થાય છે કે શું પ્રોવિડન્ટ ફંડ (PF)માં જમા થયેલા પૈસા હોમ લોન ચૂકવવા માટે ઉપાડી શકાય? જો તમારા મનમાં પણ PF ઉપાડ, ટેક્સના નિયમો અને રિટાયરમેન્ટ પછીના વ્યાજ અંગે સવાલો છે, તો આ માહિતી ઉપયોગી છે.
રૂપી વિથ ઋષભ ઇન્વેસ્ટમેન્ટ સર્વિસીઝના ફાઉન્ડર ઋષભ દેસાઈના જણાવ્યા અનુસાર, તમે હોમ લોનનું મૂળ (પ્રિન્સિપલ) ચૂકવવા માટે તમારું એમ્પ્લોઈઝ પ્રોવિડન્ટ ફંડ (EPF) ઉપાડી શકો છો. વર્તમાન હાઉસિંગ લોન ચૂકવવા માટે તમારે કુલ 10 વર્ષની EPF સભ્યપદ જરૂરી છે. જોકે, તાજેતરના નિયમો હેઠળ હાઉસિંગ સોસાયટીના સભ્ય અથવા પહેલીવાર ઘર ખરીદનારા વ્યક્તિ ત્રણ વર્ષની સેવા પૂરી કર્યા પછી ઘરના હેતુ માટે પોતાના કોર્પસના 90 ટકા સુધીની રકમ ઉપાડી શકે છે.
ટેક્સ ક્યારે લાગે છે અને ક્યારે નહીં? પ્રોપર્ટી તમારા નામે, તમારા જીવનસાથીના નામે અથવા સંયુક્ત માલિકીમાં નોંધાયેલી હોવી જોઈએ. તમારે ટેક્સ ભરવો પડશે કે નહીં તે સતત પાંચ વર્ષની સેવાના નિયમ પર આધાર રાખે છે. પાંચ વર્ષથી વધુ સેવા હોય તો ઉપાડેલી રકમ ટેક્સ-ફ્રી હોય છે અને TDS લાગુ પડતો નથી. પાંચ વર્ષથી ઓછી સેવા હોય તો ઉપાડેલી રકમ કરપાત્ર આવક ગણાય છે. આ ઉપરાંત, જો ઉપાડની રકમ 50,000 રૂપિયાથી વધુ હોય તો 10 ટકા TDS કાપવામાં આવે છે.
જો તમારી હોમ લોનનો વ્યાજ દર EPFના વ્યાજ દર કરતા વધુ હોય, તો પ્રિન્સિપલ ઘટાડવા માટે PFના પૈસા વાપરવાથી તમને ફાયદો થાય છે. પરંતુ ધ્યાન રાખો કે તમે રિટાયરમેન્ટ માટે જમા થયેલા પૈસા ઉપાડી રહ્યા છો, તેથી તમે દાયકાઓ સુધી ટેક્સ-ફ્રી ચક્રવૃદ્ધિ વ્યાજ ગુમાવી શકો છો.
રિટાયરમેન્ટ પછી વ્યાજ ક્યાં સુધી મળે? શેર સમાધાનના કો-ફાઉન્ડર વિકાસ જૈનના જણાવ્યા અનુસાર, 58 વર્ષની ઉંમરે પણ EPF બેલેન્સ પર વ્યાજ આપોઆપ બંધ થતું નથી. EPFO નિયમો હેઠળ, છેલ્લા યોગદાનની તારીખથી 36 મહિના (અંદાજે એપ્રિલ 2027) સુધી વ્યાજ મળતું રહે છે. ત્યારબાદ વ્યાજ બંધ થઈ જાય છે, પરંતુ જમા થયેલું બેલેન્સ તમારું જ રહે છે અને તમે ગમે ત્યારે ક્લેમ કરી શકો છો. નોકરી છોડ્યા પછી EPF બેલેન્સ પર મળતું વ્યાજ કરપાત્ર હોય છે. પૈસા ઉપાડવાની પ્રક્રિયા સરળ રહે તે માટે તમારા બેંક ખાતાની માહિતી સાથે KYC અપડેટ રાખવી જોઈએ. ત્રણ વર્ષ પૂરા થતાં પહેલાં જમા થયેલું બેલેન્સ ઉપાડી લેવું યોગ્ય રહે છે, કારણ કે ત્યારબાદ પૈસા રાખવા પર વધારાનું વળતર મળતું નથી.