પાટણના સંખારી રોડ પર આવેલી વૃંદાવન સોસાયટીમાં 68 વર્ષીય ગોદાવરીબેન પરમારની હત્યા થયાની ઘટના સામે આવી છે. ગયા વર્ષે 7 જૂન, 2025ના રોજ સવારે અંદાજે 9:30 વાગ્યે તેમની લાશ તેમના બંગલાના બેડરૂમમાં બેડની નીચે મળી આવી હતી. તેમના નાકમાંથી લોહી વહી રહ્યું હતું અને ગળા તથા દાઢી નીચે ઈજાના નિશાન હતા.
ઘરમાં કામ કરતાં નીતાબેન દરરોજની જેમ તે દિવસે પણ સવારે 9 વાગ્યે પહોંચ્યા હતા. તેમણે જોયું કે મુખ્ય લોખંડની જાળીનો આંકડિયો મારેલો નહોતો અને લાકડાનો દરવાજો ખુલ્લો હતો. અંદર જતાં ડ્રોઇંગ રૂમમાં કોઈ નહોતું, ત્યારબાદ બેડરૂમમાં જોયું તો ગોદાવરીબેન બેડ નીચે પડ્યા હતા. આ જોઈને નીતાબેન ડરી ગયા અને બહાર દોડીને બૂમાબૂમ કરી. પડોશીઓ દોડી આવ્યા અને ગોદાવરીબેનને ઉઠાડવાનો પ્રયાસ કર્યો, પરંતુ તેઓ ઉઠ્યા નહીં. લોકોએ ધ્યાનથી જોયું તો ગળા પર કાપાના નિશાન દેખાયા.
તરત જ સોસાયટીના રહીશોએ ગોદાવરીબેનના સગાંને જાણ કરી અને 108ને ફોન કર્યો. એમ્બ્યુલન્સ આવીને તેમને પાટણ જનરલ હોસ્પિટલ લઈ ગઈ, જ્યાં ડૉક્ટરે તેમને મૃત જાહેર કર્યા. પોલીસને જાણ કરાઈ અને પોસ્ટમોર્ટમમાં ખુલ્યું કે ગળું દબાવવાના કારણે તેમનું મોત થયું છે. એટલે કે તેમની હત્યા થઈ છે.
ગોદાવરીબેન તેમના બંગલામાં એકલા રહેતા હતા. પતિ ગોવિંદભાઈ પરમારનું અવસાન થયા પછી તેઓ પાટણના મોટીસરામાં પિતાના મકાનમાં રહેતા હતા અને હત્યાના બે મહિના પહેલાં જ વૃંદાવન બંગલામાં રહેવા આવ્યા હતા. ઉંમરને કારણે ઘરકામ માટે નીતાબેનને રાખ્યા હતા. ઘટનાના એક દિવસ પહેલાં ગોદાવરીબેને નીતાબેનને કહ્યું હતું કે આવતીકાલે દૂધની થેલી લઈને ના આવતી. આ વાત પોલીસ તપાસમાં શંકાનું કારણ બની છે.
પોલીસ હાલ હત્યારાને શોધવા તપાસ કરી રહી છે. સોસાયટીના લોકો અને સગાં-સંબંધીઓની પૂછપરછ કરવામાં આવી રહી છે.