પાટણ જિલ્લાના રાધનપુર અને સાંતલપુર તાલુકાના ખેડૂતો માટે રવિ સિઝનને ધ્યાને રાખીને સિંચાઈનું પાણી છોડવામાં આવ્યું છે. રાધનપુર નર્મદા વિભાગ દ્વારા માઈનોર કેનાલોની સફાઈનું કામ પૂર્ણ થતાં આ પાણી છોડાયું છે, જેનાથી ખેડૂતોને પાકની સિંચાઈ માટે રાહત મળી છે.
રવિ સિઝનમાં પાકને પૂરતું પાણી મળી રહે તે માટે વિભાગે સમયસર આયોજન કર્યું હતું. રાધનપુર અને સાંતલપુરના ખેડૂતો લાંબા સમયથી સિંચાઈના પાણીની માંગણી કરી રહ્યા હતા. આ માંગણીને ધ્યાને રાખીને માઈનોર કેનાલોની સફાઈનું કામ ઝડપથી પૂર્ણ કરવામાં આવ્યું.
કેનાલો સાફ થવાથી પાણીનો પ્રવાહ છેવાડાના ખેતરો સુધી સરળતાથી પહોંચી શકશે. તેનાથી ખેડૂતો રવિ પાકની વાવણી અને સિંચાઈનું આયોજન વધુ સારી રીતે કરી શકશે.
આ નિર્ણયથી ખેડૂતોમાં આનંદ છે. સમયસર પાણી મળવાથી રવિ પાકને ફાયદો થશે અને ખેડૂતોની આર્થિક સ્થિતિ મજબૂત બનવાની આશા છે.