સત્ય. સાહસ. સંકલ્પ.

પાટણમાં જીમ બહાર છ રાઉન્ડ ફાયરિંગથી ભય, ધારાસભ્યની કડક કાર્યવાહીની માંગ

પાટણમાં જીમ બહાર છ રાઉન્ડ ફાયરિંગથી ભય, ધારાસભ્યની કડક કાર્યવાહીની માંગ

પાટણ શહેરના રોટલીયા હનુમાનથી હાંસાપુર જવાના માર્ગ પર આવેલા એક ખાનગી કોમ્પ્લેક્સમાં દલપુજી ઠાકોરના જીમ બહાર વહેલી સવારે બાઇક સવાર બે બુકાનીધારી શખ્સોએ આડેધડ છ રાઉન્ડ ફાયરિંગ કર્યું હતું. આ ઘટનાથી આસપાસના વિસ્તારમાં ભયનો માહોલ ફેલાઈ ગયો હતો.

ઘટનાની વિગતો મુજબ, વામૈયા ગામના દલપુજી ઠાકોર જ્યારે જીમમાંથી બહાર નીકળી રહ્યા હતા, ત્યારે અગાઉથી ઘાત લગાવીને બેઠેલા બાઇક સવાર બે શખ્સોએ તેમને નિશાન બનાવીને ફાયરિંગ કર્યું હતું. ફાયરિંગ બાદ આરોપીઓ મોટરસાઇકલ પર ફરાર થઈ ગયા હતા.

બનાવની જાણ થતાં જ ઉચ્ચ પોલીસ અધિકારીઓનો કાફલો ઘટનાસ્થળે દોડી આવ્યો હતો અને તપાસ હાથ ધરી હતી. સ્થળ પરથી પોલીસને છ ખાલી કારતૂસ મળી આવ્યા હતા. પોલીસે આસપાસના સીસીટીવી ફૂટેજ કબજે કરી બંને આરોપીઓની શોધખોળ શરૂ કરી છે.

પ્રાથમિક તપાસમાં આ હુમલો જૂની અદાવત અથવા રૂપિયાના લેવડદેવડના વિવાદને કારણે થયો હોવાનું અનુમાન લગાવવામાં આવી રહ્યું છે. જોકે, પોલીસ તપાસ ચાલુ હોવાથી હજુ સુધી સત્તાવાર કારણ જાહેર થયું નથી.

સ્થાનિક ધારાસભ્ય કિરીટ પટેલે ઘટનાનો રોષ વ્યક્ત કરતાં જણાવ્યું હતું કે પાટણમાં આવા અસામાજિક તત્વોની હિંમત થવી ચિંતાજનક છે. તેમણે જાહેરમાં ફાયરિંગ કરીને લોકોને ભયમાં મૂકવાની ઘટનાને નાગરિકોની સુરક્ષા સામેનો પડકાર ગણાવી તાત્કાલિક કડક કાર્યવાહીની માંગ કરી છે.

આ પ્રકારની ઘટનાઓ શહેરમાં ગુનાખોરીના વધતા ગ્રાફ અને સુરક્ષા વ્યવસ્થા અંગે પ્રશ્નો ઊભા કરે છે. વહીવટી તંત્રે અસામાજિક તત્વો સામે ત્વરિત પગલાં લેવા જરૂરી છે, જેથી શાંતિપ્રિય શહેરોની સલામતી જળવાઈ રહે.