નવી દિલ્હી: સરકાર આ મહિને સંસદનું વિશેષ સત્ર બોલાવી શકે છે. સૂત્રોના જણાવ્યા મુજબ, આ સત્ર મહિલા અનામત અને સીમાંકન સંબંધિત બંધારણીય સુધારા બિલોને ફરીથી આગળ વધારવા માટે બોલાવવામાં આવી શકે છે.
વિશેષ સત્ર બોલાવવાની સત્તાવાર જાહેરાત પહેલાં સામાન્ય રીતે એક અઠવાડિયાની નોટિસ આપવામાં આવે છે. સૂત્રોનું કહેવું છે કે સરકારને આ બિલો લોકસભામાં પસાર કરાવવા માટે જરૂરી સંખ્યાબળનો વિશ્વાસ છે.
ઉલ્લેખનીય છે કે, સંસદનું ચોમાસુ સત્ર ગયા 13 ઓગસ્ટે પૂરું થયું હતું. પરંતુ હજુ સુધી બંને ગૃહોના સત્રાવસાન (Prorogation)ની સત્તાવાર જાહેરાત કરવામાં આવી નથી. ચોમાસુ સત્ર પૂરું થયાને બે મહિના થવા છતાં આ સ્થિતિ છે. આ પહેલાં 1989માં લોકસભા અને રાજ્યસભા 63 દિવસ સુધી સત્રાવસાન વગર રહ્યાં હતાં. હાલનો સમયગાળો તેનાથી લાંબો બની ગયો છે.
આ પહેલાં સરકારે 15થી 17 એપ્રિલ 2025 દરમિયાન ત્રણ દિવસનું વિશેષ સત્ર બોલાવ્યું હતું. તે સમયે આ બિલો પર મતદાન થયું હતું, પરંતુ બિલ પસાર થઈ શક્યું નહોતું. હાજર 528 સભ્યોએ મતદાન કર્યું હતું, જેમાં સત્તાપક્ષ તરફથી 298 અને વિપક્ષ તરફથી 230 મત પડ્યા હતા. બંધારણીય સુધારા બિલ માટે બે તૃતીયાંશ બહુમતીની જરૂર પડે છે, જે 528ના કિસ્સામાં 352 થાય. આમ બિલ 54 મતથી પસાર થઈ શક્યું નહોતું.
ત્યારબાદ રાજકીય સમીકરણોમાં ઘણા ફેરફારો થયા છે. તમિલનાડુ વિધાનસભા ચૂંટણી બાદ DMKએ કોંગ્રેસથી અંતર જાળવી લીધું છે અને 'ઇન્ડિયા' (INDIA) ગઠબંધનથી પણ અલગ થઈ ગઈ છે. સૂત્રોના જણાવ્યા મુજબ, કેન્દ્ર સરકાર DMK સહિત કેટલાક નાના પક્ષો સાથે સંપર્કમાં છે. આ વાટાઘાટોનો હેતુ ગૃહમાં સંખ્યાબળ મજબૂત કરવાનો છે.
આ સિવાય, TMCમાં મોટો બળવો થયો છે અને 21 સાંસદોએ પક્ષપલટો કરીને NCPIમાં જોડાવાની જાહેરાત કરી છે. તેવી જ રીતે શિવસેના (UBT)ના 6 સાંસદોએ અલગ જૂથ બનાવીને NDAને સમર્થન આપ્યું છે. આ બધા પરિવર્તનો સંસદના આંકડામાં પ્રતિબિંબિત થાય તેવી શક્યતા છે.
સરકાર વિશેષ સત્ર બોલાવે તો મહિલા અનામત અને સીમાંકન જેવા સંવેદનશીલ વિષયો પર ફરી ચર્ચા અને મતદાન થવાની શક્યતા છે. આ બિલ પસાર થવા માટે સંખ્યાબળ ઉપરાંત વિવિધ પક્ષોની સહમતી પણ જરૂરી છે, તેથી રાજકીય ગણતરી અને સંપર્કો પર નજર રહેશે.