કેન્દ્ર સરકાર મહિલા આરક્ષણ બિલ પસાર કરાવવા માટે ટૂંક સમયમાં સંસદનું વિશેષ સત્ર બોલાવી શકે છે. સમાચાર એજન્સી પીટીઆઈના અહેવાલ મુજબ, આ બિલ હેઠળ લોકસભાની બેઠકોની સંખ્યા 543થી વધારીને 850 કરવાનો લક્ષ્યાંક રાખવામાં આવ્યો છે. આનાથી સંસદ અને રાજ્ય વિધાનસભાઓમાં મહિલાઓ માટે 33 ટકા અનામતનો માર્ગ મોકળો થશે.
સૂત્રોના જણાવ્યા અનુસાર, સરકારને વિશ્વાસ છે કે બિલ 15થી 18 મતોના અંતરથી પસાર થશે. જોકે, વિશેષ સત્રની તારીખો અંગે હજુ કોઈ સત્તાવાર જાહેરાત થઈ નથી. બંધારણીય સુધારા બિલ માટે બે-તૃતીયાંશ બહુમતી જરૂરી છે, જેના માટે 361 મતોની આવશ્યકતા રહે છે. 543 સભ્યોની લોકસભામાં હાલ 3 બેઠકો ખાલી છે. અગાઉ 17 એપ્રિલે સરકારે બજેટ સત્ર દરમિયાન આ બિલ પસાર કરાવવાનો પ્રયાસ કર્યો હતો, પરંતુ જરૂરી સંખ્યાબળ ન હોવાથી તે પસાર થઈ શક્યું ન હતું.
સંસદને ટૂંકી નોટિસ પર બોલાવવાની શક્યતા છે, કારણ કે ચોમાસુ સત્રનું હજુ સુધી ઔપચારિક સત્રાવસાન કરવામાં આવ્યું નથી. 13 ઓગસ્ટે ચોમાસુ સત્રને અનિશ્ચિતકાળ માટે સ્થગિત કરવામાં આવ્યું હતું. આ સત્ર હવે 91 દિવસથી સત્રાવસાન વિના ચાલી રહ્યું છે, જેણે 2008ના 87 દિવસના અગાઉના રેકોર્ડને તોડી નાખ્યો છે. નિયમ મુજબ, વર્તમાન સત્રની અંદર બેઠક લંબાવવા માટે ઓછામાં ઓછી 2 દિવસની નોટિસ જરૂરી છે, જ્યારે નવું સત્ર બોલાવવા માટે 14 દિવસની નોટિસ આપવી પડે છે.
દક્ષિણના રાજ્યોની ચિંતાઓ દૂર કરવા માટે સરકારે તમામ રાજ્યોની લોકસભા બેઠકોમાં 50 ટકા વધારાનો પ્રસ્તાવ મૂક્યો છે. સરકાર 2029ની લોકસભા ચૂંટણી પહેલા મહિલા અનામત કાયદો લાગુ કરવા માંગે છે. નવા મુસદ્દામાં 1971ની વસ્તી ગણતરી મુજબ રાજ્યો વચ્ચે બેઠકોનું વર્તમાન પ્રમાણ જાળવી રાખવાનો પ્રસ્તાવ છે.
બીજી તરફ, કોંગ્રેસ સંસદના સત્રાવસાન ન કરવા મામલે સરકાર પર પ્રહાર કરી રહી છે. 9 નવેમ્બરે કોંગ્રેસ મહાસચિવ જયરામ રમેશે જણાવ્યું હતું કે, સંસદને અનિશ્ચિતકાળ માટે સ્થગિત કર્યાને 88 દિવસ થઈ ગયા હોવા છતાં સત્રાવસાન કરવામાં આવ્યું નથી. તેમણે આરોપ લગાવ્યો કે, આ રેકોર્ડ એટલા માટે બનાવવામાં આવ્યો છે જેથી કેન્દ્રીય ગૃહમંત્રીને લોકસભામાં શંકાસ્પદ બે-તૃતીયાંશ બહુમતી એકત્ર કરવાનો સમય મળી શકે, જેનાથી સીમાંકન બિલ પસાર કરાવી શકાય. તેમણે વધુમાં જણાવ્યું કે કોંગ્રેસ અધ્યક્ષે છેલ્લા 6 મહિનામાં વડાપ્રધાનને 4 વખત પત્ર લખીને સીમાંકન પર સર્વપક્ષીય બેઠક બોલાવવાની માંગ કરી છે, પરંતુ તેને નકારવામાં આવી છે.