ભારતના પંકજ અડવાણીએ 29મી વખત ક્યૂ સ્પોર્ટ્સ વર્લ્ડ ચેમ્પિયન બન્યા છે. 41 વર્ષીય અડવાણીએ ઇંગ્લેન્ડના રોબર્ટ હોલને 1906-1206થી હરાવીને વર્લ્ડ બિલિયર્ડ્સ ચેમ્પિયનશિપનો ખિતાબ જીત્યો છે. આ ફાઇનલ 5 કલાક સુધી ચાલી હતી.
ફાઇનલમાં એક સમયે હોલ 317 પોઇન્ટ્સથી આગળ હતા. પરંતુ અડવાણીએ 587 પોઇન્ટ્સની સિરીઝ રમીને મુકાબલો પોતાના પક્ષમાં કરી લીધો. આ ચેમ્પિયનશિપમાં કોઈ ખેલાડી દ્વારા બનાવવામાં આવેલી આ સૌથી મોટી સિરીઝ છે.
બિલિયર્ડ્સમાં ‘બ્રેક’ એટલે શું? ખેલાડી ક્યૂ નામની લાંબી સ્ટિકથી બોલને ફટકારે છે અને નિયમો મુજબ પોઈન્ટ્સ મેળવે છે. સતત એક જ વારમાં બનાવાયેલા પોઈન્ટ્સને ‘બ્રેક’ કહેવાય છે. અડવાણીનો 587 પોઈન્ટ્સનો બ્રેક એટલે તેમણે પોતાની વારમાં સતત રમીને 587 પોઈન્ટ્સ બનાવ્યા.
ફાઇનલની શરૂઆત અડવાણીએ 91 પોઈન્ટ્સના બ્રેકથી કરી. પરંતુ હોલે 203 પોઈન્ટ્સની સિરીઝ બનાવીને સરસાઈ મેળવી લીધી. લગભગ બે કલાક સુધી બંને ખેલાડીઓ વચ્ચેનો મુકાબલો બરાબરીનો રહ્યો. ત્યારબાદ અડવાણીએ વધુ એક બ્રેક બનાવીને સરસાઈ મેળવવાનો પ્રયાસ કર્યો. જોકે, હોલે આગામી લગભગ 30 મિનિટમાં 331 પોઈન્ટ્સનો મોટો બ્રેક રમ્યો અને અડવાણીથી 300થી વધુ પોઈન્ટ્સ આગળ નીકળી ગયા.
જ્યારે મુકાબલામાં 115 મિનિટ બાકી હતી, ત્યારે અડવાણીનો સ્કોર 697 અને હોલનો 1014 પોઈન્ટ્સ હતો. હોલ 317 પોઈન્ટ્સથી આગળ હતા અને તેમની સામે પહેલી વાર વર્લ્ડ ચેમ્પિયન બનવાની તક હતી. આ પહેલાં હોલ વર્લ્ડ બિલિયર્ડ્સ ચેમ્પિયનશિપની પાંચ ફાઇનલ રમી ચૂક્યા હતા, પરંતુ ખિતાબ જીતી શક્યા નહોતા.
આવા દબાણમાં અડવાણીએ 210 પોઈન્ટ્સનો બ્રેક બનાવ્યો અને અંતર ઘટાડીને લગભગ 100 પોઈન્ટ્સ કરી દીધું. ત્યારબાદ હોલ એક સરળ શોટ ચૂકી ગયા. બિલિયર્ડ્સમાં આવી ભૂલ વિરોધી ખેલાડીને ફરીથી ટેબલ પર રમવાની તક આપે છે. અડવાણીએ આ તકનો પૂરો લાભ ઉઠાવ્યો.
ખિતાબ જીતતા પહેલાં અડવાણીએ ક્વાર્ટર ફાઇનલમાં ભારતના સૌરવ કોઠારીને 1134-575થી હરાવ્યો હતો. આ મુકાબલો લગભગ ત્રણ કલાક ચાલ્યો હતો. ત્યારબાદ સેમિફાઇનલમાં તેમણે ઇંગ્લેન્ડના ડેવિડ કોઝિયરને 1607-1271થી માત આપી હતી.
અડવાણી હવે બિલિયર્ડ્સથી અલગ ક્યૂ સ્પોર્ટ્સના બીજા સ્વરૂપ સ્નૂકરની તૈયારી કરશે. વર્લ્ડ સ્નૂકર ચેમ્પિયનશિપ નવેમ્બરમાં ઇન્દોરમાં યોજાવાની છે.