સત્ય. સાહસ. સંકલ્પ.

'પંચાયત' સીઝન 5: 3 ડિસેમ્બરે પ્રાઇમ વીડિયો પર રિલીઝ, સચિવ અને બનરાકસ વચ્ચે ખેંચાણ

'પંચાયત' સીઝન 5: 3 ડિસેમ્બરે પ્રાઇમ વીડિયો પર રિલીઝ, સચિવ અને બનરાકસ વચ્ચે ખેંચાણ

પ્રાઇમ વીડિયોએ બુધવારે જાહેરાત કરી છે કે લોકપ્રિય ભારતીય વેબ સિરીઝ 'પંચાયત'ની પાંચમી સીઝન 3 ડિસેમ્બરથી સ્ટ્રીમ થશે. આ સાથે નિર્માતાઓએ નવી સીઝનનું પોસ્ટર પણ બહાર પાડ્યું છે.

આ સીઝન રિલીઝ થતાં જ 'પંચાયત' એવી ભારતની બીજી વેબ સિરીઝ બની જશે જેણે પાંચ સીઝન પૂર્ણ કરી હોય. આ પહેલી સિરીઝ TVFની જ 'ગુલ્લક' હતી, જે સોની લિવ પર સ્ટ્રીમ થાય છે. 'ગુલ્લક'ની પહેલી સીઝન 2019માં રિલીઝ થઈ હતી.

નવી સીઝનમાં દર્શકો ફરી ફુલેરા ગામ અને સચિવજી સાથે પરત ફરશે. આ વખતે ગામની રાજનીતિ, બદલાતા સંબંધો અને હળવું હાસ્ય જોવા મળશે. ખાસ કરીને સચિવ અને બનરાકસ વચ્ચેની ખેંચતાણ આ સીઝનનું મુખ્ય આકર્ષણ રહેશે.

શોમાં 'સચિવજી'ની ભૂમિકા અભિષેક ત્રિપાઠીની છે, જેને અભિનેતા જિતેન્દ્ર કુમારે ભજવી છે. ફુલેરા ગામને નવા પ્રધાન મળ્યા છે અને બનરાકસ (ભૂષણ) નવા સરપંચ તરીકે શું કરશે, એ આ સીઝનનો મોટો સવાલ છે. બનરાકસની ભૂમિકા દુર્ગેશ કુમારે ભજવી છે.

પાંચમી સીઝનમાં જિતેન્દ્ર કુમાર, રઘુબીર યાદવ, નીના ગુપ્તા, સુનીતા રાજવર, ફૈઝલ મલિક, ચંદન રોય, દુર્ગેશ કુમાર અને અશોક પાઠક સહિતના કલાકારો પરત ફરશે. સિરીઝનું નિર્દેશન દીપક કુમાર મિશ્રાએ કર્યું છે, જ્યારે તેના ક્રિએટર્સ દીપક કુમાર મિશ્રા, ચંદન કુમાર અને અરુણાભ કુમાર છે. નિર્માણ ધ વાયરલ ફીવર (TVF)એ કર્યું છે.

પંચાયતની વાર્તા 2020માં શરૂ થઈ હતી. પહેલી સીઝન 3 એપ્રિલ 2020ના રોજ પ્રાઇમ વીડિયો પર આવી હતી. તેમાં એન્જિનિયરિંગ ગ્રેજ્યુએટ અભિષેક ત્રિપાઠીની વાર્તા દર્શાવવામાં આવી હતી, જે સારી નોકરી ન મળતાં ઉત્તર પ્રદેશના કાલ્પનિક ગામ ફુલેરામાં પંચાયત સચિવની નોકરી કરવા પહોંચે છે. શહેરમાં ઉછરેલા અભિષેક માટે ગામનું વાતાવરણ નવું હોય છે, અને તે ગામના લોકો, તેમની સમસ્યાઓ અને પંચાયતના રાજકારણ વચ્ચે પોતાની નોકરી કરે છે. સાથે જ તેનું સપનું MBA કરીને વધુ સારી નોકરી મેળવવાનું છે.

પહેલી સીઝનને મળેલા સારા પ્રતિસાદ બાદ બીજી સીઝન 2022માં, ત્રીજી સીઝન 2024માં અને ચોથી સીઝન જૂન 2025માં રિલીઝ થઈ હતી. હવે પાંચમી સીઝન લગભગ દોઢ વર્ષ બાદ દર્શકો સમક્ષ આવશે.

આ સિરીઝને પુરસ્કારો પણ મળ્યા છે. નવેમ્બર 2023માં ગોવામાં યોજાયેલા 54મા ઇન્ટરનેશનલ ફિલ્મ ફેસ્ટિવલ ઑફ ઇન્ડિયા (IFFI)માં 'પંચાયત 2'ને બેસ્ટ વેબ સિરીઝનો પહેલો OTT એવોર્ડ આપવામાં આવ્યો હતો. માહિતી અને પ્રસારણ મંત્રાલય અનુસાર, આ પુરસ્કાર માટે 15 OTT પ્લેટફોર્મની 10 ભાષાઓની 32 સિરીઝ પસંદ કરવામાં આવી હતી, જેમાંથી ચાર સિરીઝને અંતિમ નૉમિનેશન મળ્યું હતું.

ચોથી સીઝને વ્યૂઅરશિપનો રેકોર્ડ બનાવ્યો હતો. પ્રાઇમ વીડિયોના જણાવ્યા અનુસાર, રિલીઝના પહેલા અઠવાડિયામાં આ સીઝન 180થી વધુ દેશોમાં જોવામાં આવી હતી અને 42થી વધુ દેશોમાં પ્લેટફોર્મની ટોપ-10 ટ્રેન્ડિંગ યાદીમાં સામેલ થઈ હતી. ભારતમાં તે 95% પિન કોડ સુધી પહોંચી હતી. પ્લેટફોર્મે તેને સિરીઝની અત્યાર સુધીની સૌથી મોટી ઓપનિંગ સીઝન ગણાવી હતી.

પ્રાઇમ વીડિયો ઇન્ડિયામાં SVOD કન્ટેન્ટ એક્વિઝિશનના ડિરેક્ટર અને હેડ મનીષ મેન્ઘાણીએ કહ્યું, “કેટલીક વાર્તાઓ સમય જતાં આપણા જીવનનો હિસ્સો બની જાય છે. પંચાયત પણ એવી જ એક વાર્તા છે.” તેમણે ઉમેર્યું, “ભારતની સૌથી સફળ અને ઓળખીતી ફ્રેન્ચાઇઝીમાં સામેલ આ સિરીઝનું પાંચમી સીઝન સાથે પરત ફરવું ગર્વની વાત છે. આ ઉપલબ્ધિ તેની ખાસ સફર અને દર્શકો સાથેના સતત જોડાણને દર્શાવે છે.”

ધ વાયરલ ફીવર (TVF)ના પ્રેસિડેન્ટ વિજય કોશીએ કહ્યું કે દર્શકોએ ફુલેરા અને તેના લોકોને જે પ્રેમ આપ્યો છે, તેનાથી તેમનો વિશ્વાસ વધુ મજબૂત થયો છે. તેમણે કહ્યું, “સીઝન 5માં અમે આ લોકપ્રિય કલાકારસમૂહની વાર્તાને આગળ વધારીશું. નવા પડકારો, બદલાતા સંબંધો અને અચાનક આવતાં વળાંકો ગામડાના જીવનનાં નવા પાસાં દર્શાવશે.” તેમણે ઉમેર્યું, “પંચાયત OTT પર પાંચમી સીઝન સુધી પહોંચનારા ભારતના માત્ર બે શોમાંથી એક છે. પ્રાઇમ વીડિયોના સતત સહયોગ વિના આ સિદ્ધિ શક્ય ન બની હોત.”