પાકિસ્તાનમાં પેટ્રોલનો ભાવ 1000 રૂપિયા પ્રતિ લિટર સુધી પહોંચી શકે છે. પેટ્રોલિયમ મંત્રી અલી પરવેઝ મલિકે રવિવારે કહ્યું કે દેશમાં પેટ્રોલની અછત ઊભી થાય તો કિંમત વધુ વધી શકે છે. તેમણે કહ્યું કે અત્યાર સુધીમાં પેટ્રોલ લગભગ 50% મોંઘું થઈ ચૂક્યું છે. હાલ પાકિસ્તાનમાં પેટ્રોલ 389.14 રૂપિયા પ્રતિ લિટર અને ડીઝલ 424.04 રૂપિયા પ્રતિ લિટર છે.
મધ્ય પૂર્વમાં ચાલી રહેલી લડાઈને કારણે વૈશ્વિક સ્તરે ક્રૂડ ઓઇલના ભાવ વધી રહ્યા છે. હોર્મુઝ સ્ટ્રેટ બંધ થવાની ચિંતાથી તેલ પુરવઠા અંગે પણ ભય વધ્યો છે. તેની સીધી અસર પાકિસ્તાનમાં પેટ્રોલની કિંમત પર થઈ રહી છે. 17 સપ્ટેમ્બરે કરાચીના પેટ્રોલ પંપ પર લોકો પોતાના વારાની રાહ જોતા જોવા મળ્યા હતા.
વધતી કિંમતો વચ્ચે પાકિસ્તાન સરકારે બાઇક, રિક્ષા, ચિંગચી (મોટરસાયકલ આધારિત ઓટો રિક્ષા) અને 800 સીસી સુધીની કારો માટે પેટ્રોલ પર સબસિડી યોજના શરૂ કરી છે. આ યોજના હેઠળ પેટ્રોલ પર 100 રૂપિયા પ્રતિ લિટર સુધીની સબસિડી મળે છે. દરેક પાત્ર વ્યક્તિને મહિનામાં ચાર ટોકન મળે છે અને દરેક ટોકન પર 500 રૂપિયાની સબસિડી મળે છે. હવે 1 જાન્યુઆરી 2006થી રજિસ્ટર્ડ મોટરસાયકલોને પણ યોજનામાં સામેલ કરવામાં આવી છે.
સરકારના જણાવ્યા મુજબ, યોજનામાં 17.5 લાખથી વધુ લોકોએ રજિસ્ટ્રેશન કરાવ્યું છે. આશરે 15 લાખ ટોકન જારી થઈ ચૂક્યા છે અને 6.80 લાખથી વધુ ટોકનનો ઉપયોગ થઈ ચૂક્યો છે.
બીજી તરફ, પાકિસ્તાન સરકાર દેશમાં નવા તેલ ભંડારો શોધવા પર કામ કરી રહી છે. પેટ્રોલિયમ મંત્રી અલી પરવેઝ મલિકના જણાવ્યા મુજબ, તેલના કુવાઓ પર કામ શરૂ થઈ ચૂક્યું છે અને ઓક્ટોબર સુધીમાં કાચું તેલ મળવાની આશા છે. સરકારે તેલ અને ગેસની શોધ માટે નવા બ્લોક પણ કંપનીઓને આપ્યા છે. તેનો હેતુ દેશમાં સ્થાનિક ઉત્પાદન વધારવાનો અને વિદેશોમાંથી તેલ ખરીદવા પાછળ થતો ખર્ચ ઘટાડવાનો છે. જો નવા કુવાઓમાંથી વ્યાવસાયિક સ્તરે તેલનું ઉત્પાદન થાય તો પાકિસ્તાનને પોતાની જરૂરિયાતનો કેટલોક હિસ્સો દેશમાં જ મળી શકશે. તેનાથી આંતરરાષ્ટ્રીય બજારમાં તેલનો ભાવ વધે ત્યારે દેશ પર પડતું દબાણ પણ ઘટી શકે છે.
દરમિયાન, બાંગ્લાદેશ સરકારે બળતણના ભાવમાં 17.4% સુધીનો વધારો કર્યો છે. નવા ભાવ સોમવાર, 21 સપ્ટેબરથી લાગુ થઈ ગયા છે. ભાવવધારાને કારણે બાંગ્લાદેશમાં ટ્રાન્સપોર્ટ અને ચીજવસ્તુઓના ઉત્પાદનનો ખર્ચ વધી શકે છે. જેની સીધી અસર પહેલેથી જ મોંઘવારી અને વીજળી-ગેસની અછતનો સામનો કરી રહેલી જનતા તથા વેપાર-ઉદ્યોગ પર પડવાની આશંકા છે. સરકારના નવા દર મુજબ, ડીઝલની કિંમત 115 થી વધીને 135 ટકા પ્રતિ લિટર થઈ ગઈ છે. ઓક્ટેનનો ભાવ 145 થી વધીને 165 ટકા, પેટ્રોલ 140 થી વધીને 160 ટકા અને કેરોસીન 135 થી વધીને 155 ટકા પ્રતિ લિટર થયો છે. બાંગ્લાદેશના ઊર્જા મંત્રાલયના જણાવ્યા અનુસાર, માર્ચ 2026થી આંતરરાષ્ટ્રીય સ્તરે બળતણના ભાવ બમણાથી વધુ વધી ચૂક્યા છે. સરકારનું કહેવું છે કે આ વધતા ખર્ચની સીધી અસર સરકારી તેલ કંપની બાંગ્લાદેશ પેટ્રોલીયમ કોર્પોરેશન (BPC) પર પણ પડી છે.