પાકિસ્તાનના આબોહવા મંત્રી મુસાદિક મસૂદ મલિક આવતા અઠવાડિયે ભારત આવશે. પાકિસ્તાની વિદેશ મંત્રાલયના જણાવ્યા અનુસાર, મલિક 20થી 22 નવેમ્બર દરમિયાન નવી દિલ્હીમાં યોજાનારા શાંઘાઈ સહયોગ સંગઠન (SCO)ના એક કાર્યક્રમમાં ભાગ લેશે.
ભારતે પાકિસ્તાનને SCOના સભ્ય હોવાના નાતે કાર્યક્રમમાં ભાગ લેવા માટે આમંત્રણ આપ્યું હતું. આ માટે ગયા મહિને પાકિસ્તાનના રાષ્ટ્રીય વારસા અને સંસ્કૃતિ મંત્રી ઔરંગઝેબ ખાન ખિચીને આમંત્રણ આપવામાં આવ્યું હતું.
ઓપરેશન સિંદૂર બાદ પહેલીવાર એવું બનશે જ્યારે કોઈ પાકિસ્તાની મંત્રી ભારત આવશે. આ પહેલાં મે 2023માં પાકિસ્તાનના તત્કાલીન વિદેશ મંત્રી બિલાવલ ભુટ્ટો જરદારી SCOની બેઠકમાં ભાગ લેવા માટે ગોવા આવ્યા હતા.
4-5 મે 2023ના રોજ ભારતમાં યોજાયેલી SCO સમિટમાં પાકિસ્તાનના તત્કાલીન વિદેશમંત્રી બિલાવલ ભુટ્ટો ભારત આવ્યા હતા.
ભારતની પહેલથી પ્રથમ કાર્યક્રમ
SCO સિવિલાઇઝેશનલ ડાયલોગ ફોરમ (સભ્યતા સંવાદ કાર્યક્રમ)નું પ્રથમ સત્ર આ મહિનાના અંતમાં નવી દિલ્હીમાં યોજાશે. સમગ્ર યુરેશિયામાં સાંસ્કૃતિક આદાન-પ્રદાન અને લોકો વચ્ચેના સંપર્કને વધારવા માટે ભારતે આ પહેલ શરૂ કરી છે.
ભારતે SCOના તમામ 10 સભ્ય દેશોને સભ્યતા સંવાદ કાર્યક્રમમાં સામેલ થવા માટે આમંત્રણ આપ્યું છે. વિદેશ મંત્રાલયના પ્રવક્તા રણધીર જયસવાલે કહ્યું હતું કે ભારત આ કાર્યક્રમમાં તમામ સભ્ય દેશોની યજમાની કરવા માટે તૈયાર છે.
નવી દિલ્હીમાં 20થી 22 નવેમ્બર દરમિયાન યોજાનારી આ સમિટમાં વિવિધ સભ્યતાઓ અને સંસ્કૃતિઓ વચ્ચે સંવાદ તથા પરસ્પર સંપર્ક વધારવા અંગે ચર્ચા કરવામાં આવશે.
આ કાર્યક્રમની જાહેરાત રક્ષામંત્રી રાજનાથ સિંહે 20 ઑક્ટોબરે તાજિકિસ્તાનની રાજધાની દુશાંબેમાં કરી હતી. તે સમયે તેઓ SCOની બેઠકમાં ભાગ લેવા પહોંચ્યા હતા.
સભ્યતા સંવાદ કાર્યક્રમ દિલ્હીના પુરાણા કિલ્લામાં યોજાશે. અધિકારીઓના જણાવ્યા અનુસાર, ભારતના પ્રાચીન ભૂતકાળ સાથે જોડાયેલા મહત્ત્વને કારણે આ સ્થળની પસંદગી કરવામાં આવી છે.
પાકિસ્તાન પાસે છે SCOનું અધ્યક્ષપદ
પાકિસ્તાને 1 સપ્ટેમ્બર 2026થી 2026-27 માટે SCOના સભ્ય દેશોની સરકારોના વડાઓની પરિષદની ફરતી અધ્યક્ષતા સંભાળી છે.
SCOમાં ભારત, પાકિસ્તાન, ચીન, રશિયા, ઈરાન, બેલારુસ, કઝાકિસ્તાન, કિર્ગિઝિસ્તાન, તાજિકિસ્તાન અને ઉઝબેકિસ્તાન સામેલ છે.
મલિકની મુલાકાત બંને દેશો વચ્ચેની દ્વિપક્ષીય વાતચીત માટે નથી. તેઓ SCOના સભ્ય દેશના પ્રતિનિધિ તરીકે આ કાર્યક્રમમાં સામેલ થશે.