ભારતીય સેનાએ જમ્મુ-કાશ્મીરના બડગામ જિલ્લામાં એક એન્કાઉન્ટરમાં લશ્કર-એ-તૈયબાના કમાન્ડર મોહમ્મદ આસિફ ઉર્ફે હાશિમ મૂસાને ઠાર કર્યાનો દાવો કર્યો હતો. આ ઘટનાના થોડા જ કલાકો બાદ પાકિસ્તાને ભારતના દાવાને પડકારવા માટે આસિફ જેવો દેખાતો એક વ્યક્તિ મીડિયા સમક્ષ રજૂ કર્યો હતો.
ગુરુવારે એક પ્રેસ કોન્ફરન્સમાં પાકિસ્તાનના DG ISPR લેફ્ટનન્ટ જનરલ અહમદ શરીફ ચૌધરીએ તે વ્યક્તિને રજૂ કરી હતી. મોહમ્મદ આસિફ તરીકે પોતાની ઓળખ આપતાં તેણે દાવો કર્યો કે તે 2023માં પાકિસ્તાની સેનાના સ્પેશિયલ સર્વિસ ગ્રુપ (SSG)માંથી હવાલદારના પદ પરથી નિવૃત્ત થયો હતો. તેણે કહ્યું, '2000માં હું પાકિસ્તાની સેનામાં જોડાયો હતો. 2005માં હું SSGમાં સામેલ થયો, 18 વર્ષ સુધી ફરજ બજાવી અને 2023માં નિવૃત્ત થયો... હું જીવતો છું અને તમારી સામે હાજર છું.'
જોકે, પાકિસ્તાન દ્વારા રજૂ કરાયેલી આ વ્યક્તિ થોડા જ સમયમાં શંકાના ઘેરામાં આવી ગઈ હતી. સ્વતંત્ર OSINT (ઓપન સોર્સ ઇન્ટેલિજન્સ) એકાઉન્ટ્સે તે વ્યક્તિના ચહેરા અને શારીરિક બનાવટની સરખામણી મૂસાની જૂની તસવીરો સાથે કરી હતી. આ સરખામણીમાં કાન, નાકનો આકાર અને આંખોની સીધ સહિત અનેક તફાવતો દર્શાવવામાં આવ્યા હતા, જેણે પાકિસ્તાનના દાવાને ખોટો સાબિત કરી દીધો હતો.
રક્ષા નિષ્ણાતો અને ભારતીય સેનાના પૂર્વ અધિકારીઓએ પણ પાકિસ્તાનના આ પ્રયાસનો પર્દાફાશ કર્યો હતો. મેજર જનરલ હર્ષા કાકર (નિવૃત્ત)એ ટ્વીટ કર્યું હતું કે, 'હંમેશાની જેમ, પાકિસ્તાને એક નકલી વ્યક્તિ રજૂ કરી અને તેનું નામ હાશિમ મૂસા રાખ્યું, જ્યારે તેને ખબર છે કે સત્ય સામે આવી ચૂક્યું છે.'
કોણ હતો મોહમ્મદ આસિફ ઉર્ફે હાશિમ મૂસા? મૂસા પીર પંચાલ વિસ્તાર અને કાશ્મીર ખીણમાં સામાન્ય નાગરિકો અને સુરક્ષા દળો પર થયેલા અનેક જીવલેણ હુમલાઓ પાછળનો મુખ્ય માસ્ટરમાઇન્ડ હતો. તે લાંબા સમયથી સુરક્ષા દળોની પકડથી બચતો ફરતો હતો. બુધવારે યુસમર્ગમાં એક એન્કાઉન્ટરમાં તે માર્યો ગયો હતો. તે લશ્કર-એ-તૈયબાના તે ચાર આતંકવાદીઓમાંથી એક હતો, જેમના ફોટા 2025ના પહેલગામ આતંકી હુમલા પછી વાઈરલ થયા હતા, જેમાં 26 હિન્દુ પ્રવાસીઓ માર્યા ગયા હતા. હવે તે ચારેય આતંકવાદીઓ સુરક્ષા દળો સાથે અલગ-અલગ એન્કાઉન્ટરમાં માર્યા ગયા છે.