સત્ય. સાહસ. સંકલ્પ.

પાકિસ્તાનમાં બસ અને ગેસ ટેન્કર અથડાયા, આગમાં 10 મુસાફરોના મોત, 27 ઘાયલ

પાકિસ્તાનમાં બસ અને ગેસ ટેન્કર અથડાયા, આગમાં 10 મુસાફરોના મોત, 27 ઘાયલ

પાકિસ્તાનના બલૂચિસ્તાન પ્રાંતમાં મકરાન કોસ્ટલ હાઈવે પર ગુરુવારે સવારે એક પેસેન્જર બસ અને LPG ગેસ ટેન્કર સામસામે અથડાયા. ટક્કર પછી તરત જ ભીષણ આગ લાગી, જેમાં 10 લોકોના મોત થયા અને 27 મુસાફરો ઘાયલ થયા છે.

આ દુર્ઘટના સવારે લગભગ 10:30 વાગ્યે ગ્વાદર જિલ્લાના ઓરમારા વિસ્તારમાં બસોલ નજીક, કોસ્ટલ હાઈવે પર આવેલી પોલીસ ચેકપોસ્ટ પાસે બની. અખબાર 'ડોન'ના અહેવાલ મુજબ, તુર્બતથી કરાચી તરફ જતી એક ખાનગી બસ અને કરાચીથી ગ્વાદર નજીક ઈરાન-ગાબદ સરહદ તરફ જતું ગેસ ટેન્કર સામસામે ટકરાયા. ટક્કર એટલી જોરદાર હતી કે થોડી જ સેકન્ડોમાં બંને વાહનો આગની લપેટમાં આવી ગયા.

બસમાં મહિલાઓ અને બાળકો સહિત 40 થી વધુ મુસાફરો હતા. આગ અચાનક ફેલાઈ જવાથી ઘણા મુસાફરો બસમાંથી બહાર નીકળી શક્યા નહીં. ઓરમારાના ડીએસપી નબી બખ્શ રુન્ઝાએ જણાવ્યું કે તમામ 10 મૃતકોનું મોત ગંભીર રીતે દાઝી જવાને કારણે થયું છે. તેમાં મહિલાઓ અને બાળકો પણ સામેલ છે. બચાવ કામગીરી દરમિયાન બસમાંથી 8 અને ગેસ ટેન્કરમાંથી 2 મૃતદેહ બહાર કાઢવામાં આવ્યા.

ઘટનાની જાણ થતાં જ પાકિસ્તાની સેના, સ્થાનિક પોલીસ અને ફાયર બ્રિગેડની ટીમો તાત્કાલિક સ્થળ પર પહોંચી. આ તમામ એજન્સીઓએ સાથે મળીને આગ બુઝાવી, ઘાયલોને બહાર કાઢીને હોસ્પિટલ પહોંચાડ્યા. આ અકસ્માતને કારણે મકરાન કોસ્ટલ હાઈવે પર કલાકો સુધી વાહનવ્યવહાર સંપૂર્ણપણે ઠપ થઈ ગયો હતો અને બંને તરફ વાહનોની લાંબી કતારો લાગી હતી.

આ હાઈવે પર અગાઉ પણ જીવલેણ અકસ્માતો બની ચૂક્યા છે. ઓગસ્ટમાં ઓરમારા વિસ્તારમાં એક ગેસ ટેન્કરે સામેથી આવીને કારને ટક્કર મારી હતી, જેમાં એક જ પરિવારના 6 સભ્યોનાં મોત થયા હતા. માર્ચમાં બે વાહનો અથડાતાં 7 લોકોના મોત થયા હતા, જ્યારે જાન્યુઆરીમાં ઓરમારા પાસે એક પેસેન્જર વાહન પલટી જતાં 10 લોકોએ જીવ ગુમાવ્યો હતો અને 30 થી વધુ લોકો ઘાયલ થયા હતા.