પાકિસ્તાને બ્રિક્સ (BRICS) જૂથમાં સભ્યપદ માટે અરજી કરી છે. આ જૂથમાં બ્રાઝિલ, રશિયા, ભારત, ચીન અને દક્ષિણ આફ્રિકા જેવા દેશો સામેલ છે. પાકિસ્તાનની આ અરજી 2023થી અટકેલી છે, કારણ કે ભારતના વીટો પાવર અને સર્વસંમતિના નિયમને કારણે તેને પ્રવેશ મળ્યો નથી.
રિપોર્ટ અનુસાર પાકિસ્તાન એ 29 દેશોમાંનું એક છે જેમણે બ્રિક્સમાં જોડાવા અરજી કરી છે. ભારતના વીટોને કારણે પાકિસ્તાનનો પ્રવેશ અટકેલો છે. પાકિસ્તાને બ્રિક્સ સમર્થિત ન્યૂ ડેવલપમેન્ટ બેંકમાં 580 મિલિયન ડોલરનું રોકાણ કર્યું છે. વર્લ્ડ બેંક અને આંતરરાષ્ટ્રીય નાણાકીય ફંડ પરની નિર્ભરતા ઘટાડવા માટે પાકિસ્તાને આ રોકાણ કર્યું છે.
ગયા વર્ષે બ્રિક્સમાં ઇજિપ્ત, ઇથોપિયા, ઈરાન અને યુએઈ જોડાયા હતા. તેમ છતાં, પાકિસ્તાનની એન્ટ્રી હજુ અટકેલી છે. પાકિસ્તાનના વિદેશ મંત્રાલયના પ્રવક્તા મુમતાઝ ઝહરા બલોચે કહ્યું કે દેશ વૈશ્વિક દક્ષિણ જૂથમાં જોડાઈને આંતરરાષ્ટ્રીય સહયોગ વધારવા માંગે છે.
રશિયા અને ચીન તરફથી સમર્થન હોવા છતાં ભારતનો વિરોધ મોટો રોક છે. રશિયામાં પાકિસ્તાનના રાજદૂત મુહમ્મદ ખાલિદ જમાલીએ જણાવ્યું કે તેઓ સભ્ય દેશો સાથે સંપર્કમાં છે અને ખાસ કરીને રશિયાનો સહયોગ મેળવવા પ્રયાસ કરી રહ્યા છે.
બ્રિક્સ જૂથ વિશ્વની લગભગ 49 ટકા વસ્તી અને વૈશ્વિક જીડીપીના અંદાજે 40 ટકા હિસ્સાનું પ્રતિનિધિત્વ કરે છે. ભારતની બ્રિક્સ દેશો સાથેની નિકાસ 48.8 ટકા વધીને 64.3 અબજ ડોલરથી 95.7 અબજ ડોલર થઈ છે.