પાકિસ્તાને બીજી T-20 આંતરરાષ્ટ્રીય મેચમાં શ્રીલંકાને 82 રનથી હરાવ્યું. આ જીત સાથે પાકિસ્તાને ત્રણ મેચોની સિરીઝમાં 2-0ની અજેય સરસાઈ મેળવી લીધી. શ્રીલંકાની ટીમ ઘર બહાર સતત ત્રીજી T-20 સિરીઝ હારી છે.
પાકિસ્તાને રવિવારે ટોસ હારીને પ્રથમ બેટિંગ કરતાં 20 ઓવરમાં 3 વિકેટે 215 રન બનાવ્યા. T-20 આંતરરાષ્ટ્રીય ક્રિકેટમાં પાકિસ્તાનનો આ બીજો સૌથી મોટો સ્કોર છે. ટીમનો સર્વોચ્ચ સ્કોર 232/6 છે, જે તેણે 2021માં ઇંગ્લેન્ડ સામે બનાવ્યો હતો.
જવાબમાં શ્રીલંકાની ટીમ 20 ઓવરમાં 7 વિકેટે માત્ર 133 રન જ બનાવી શકી. ઝડપી બોલર મોહમ્મદ ઇમરાને 11 રન આપીને 3 વિકેટ લીધી. તે પહેલાં માઝ સદાકતે 51 બોલમાં 96 અને કેપ્ટન સાહિબઝાદા ફરહાને 73 રન બનાવ્યા. બંને બેટરને કેચ છૂટવાનો લાભ મળ્યો.
કેપ્ટન સાહિબઝાદા ફરહાન અને માજ સદાકતે 49 બોલમાં 88 રનની ભાગીદારી કરી.
શ્રીલંકાની ખરાબ ફિલ્ડિંગનો પાકિસ્તાની બેટર્સે પૂરેપૂરો લાભ લીધો. કપ્તાન સાહિબઝાદા ફરહાન જ્યારે 11 રન પર હતા, ત્યારે સીનેથ જયવર્ધનેએ તેમનો સરળ કેચ છોડી દીધો. આ પહેલાં બિનુરા ફર્નાન્ડોના ઓવરમાં મહેશ તીક્ષ્ણાએ પણ તેમનો મુશ્કેલ કેચ છોડ્યો હતો.
બે જીવનદાન મળ્યા બાદ ફરહાને 5 છગ્ગા અને 4 ચોગ્ગાની મદદથી 73 રન બનાવ્યા. 15મી ઓવરમાં દાસુન શનાકાની બોલ પર મહેશ તીક્ષ્ણાએ બાઉન્ડ્રી પાસે તેમનો કેચ પકડ્યો.
કેરેબિયન પ્રીમિયર લીગ (CPL)માં સતત બે સદી ફટકારનાર ડાબોડી યુવા બેટર માજ સદાકતે પોતાનું ફોર્મ જાળવી રાખ્યું. 44 રનના વ્યક્તિગત સ્કોર પર નુવાન તુષારાએ પોતાની જ બોલિંગમાં તેમનો કેચ છોડી દીધો હતો.
સદાકતે 51 બોલમાં 7 છગ્ગા અને 6 ચોગ્ગાની મદદથી 96 રન બનાવ્યા. ઇનિંગ્સના છેલ્લા બોલે ઈશાન મલિંગાની બોલ પર ડીપ કવરમાં કેચ આઉટ થતાં તેઓ પોતાની પ્રથમ T-20 ઈન્ટરનેશનલ સદી ચૂકી ગયો.
સદાકતે કહ્યું, ‘હું મારા ફોર્મનો પૂરેપૂરો ફાયદો ઉઠાવવા માંગતો હતો. મને પોતાની જાત પર વિશ્વાસ હતો. હું સકારાત્મક ઇરાદા સાથે બેટિંગ કરવા અને યોગ્ય બોલ પર બાઉન્ડરી ફટકારવા માંગતો હતો.’
216 રનના ટાર્ગેટનો પીછો કરવા ઉતરેલી શ્રીલંકાની શરૂઆત ખરાબ રહી. પાકિસ્તાનના ઝડપી બોલર સલમાન મિર્ઝાએ પ્રથમ જ ઓવરમાં લહિરુ ઉદારાને આઉટ કરી દીધો. ત્યારબાદ પોતાની બીજી T-20 ઈન્ટરનેસનલ મેચ રમી રહેલા મોહમ્મદ ઇમરાને સ્વિંગ બોલિંગથી શ્રીલંકાની ટોચની ક્રમની બેટિંગને હચમચાવી દીધી.
ઇમરાને 4 ઓવરમાં 11 રન આપીને સિનેથ જયવર્ધને (22), કેપ્ટન કુસલ મેન્ડિસ (9) અને સહન અરાચિગે (0)ની વિકેટ ઝડપી. શ્રીલંકાએ 8મી ઓવર સુધીમાં 49 રનમાં 4 વિકેટ ગુમાવી દીધી હતી અને ત્યારબાદ ટીમ સંભળી શકી નહીં.
શ્રીલંકા તરફથી મહેશ તીક્ષ્ણાએ 26 બોલમાં અણનમ 32 રન બનાવ્યા, જ્યારે ચમિન્દુ વિક્રમસિંઘેએ 24 બોલમાં 29 રનની ઇનિંગ રમી.
શ્રીલંકાના કેપ્ટન કુસલ મેન્ડિસે હાર બાદ કહ્યું કે બેટરે, જેમાં તેઓ પોતે પણ સામેલ છે, જવાબદારી લેવી પડશે. તેમણે કહ્યું, ‘આ બેટિંગ માટે સારી પિચ હતી. અમારે ઓછામાં ઓછા 200 રન બનાવવા જોઈતા હતા.’
મેન્ડિસે કહ્યું- ‘છેલ્લી કેટલીક ટૂર્નામેન્ટમાં અમારી ફિલ્ડિંગ સારી રહી હતી, પરંતુ આ સિરીઝની બંને મેચોમાં અમે અપેક્ષા મુજબનું પ્રદર્શન કરી શક્યા નહીં.’