રાવલપિંડીમાં રમાયેલી પ્રથમ T20 મેચમાં પાકિસ્તાને શ્રીલંકાને 4 વિકેટે હરાવ્યું. શ્રીલંકાએ પહેલા બેટિંગ કરતા 20 ઓવરમાં 8 વિકેટે 182 રન બનાવ્યા હતા. જવાબમાં પાકિસ્તાને 18.5 ઓવરમાં 6 વિકેટે 187 રન બનાવીને મેચ જીતી લીધી.
પાકિસ્તાનના કેપ્ટન સાહિબઝાદા ફરહાને 53 બોલમાં 89 રનની ઇનિંગ રમી. તેમણે 10 ચોગ્ગા અને 4 છગ્ગા ફટકાર્યા. મસૂદ સદાકતે 29 બોલમાં 50 રન બનાવ્યા. બંનેએ બીજી વિકેટ માટે 92 રનની ભાગીદારી કરી. બોલિંગમાં નસીમ શાહે 3 વિકેટ ઝડપી.
શ્રીલંકાની શરૂઆત ખરાબ રહી. કેપ્ટન કુસલ મેન્ડિસ 1 રન બનાવીને નસીમ શાહની બોલિંગમાં આઉટ થયો. કામિલ મિશારા પણ 6 રન બનાવીને પેવેલિયન પરત ફર્યો. ટીમે ચોથી ઓવરમાં 18 રનના સ્કોર પર 2 વિકેટ ગુમાવી દીધી હતી.
આ પછી લાહિરુ ઉદારાએ ઇનિંગ્સ સંભાળી અને 55 બોલમાં 91 રન બનાવ્યા. તેમની ઇનિંગ્સમાં 11 ચોગ્ગા અને એક છગ્ગો સામેલ હતો. ઉદારાએ કામિન્દુ મેન્ડિસ સાથે ત્રીજી વિકેટ માટે મહત્વપૂર્ણ ભાગીદારી કરી. કામિન્દુએ 18 બોલમાં 23 રન બનાવ્યા.
પાકિસ્તાન તરફથી નસીમ શાહે 3 વિકેટ ઝડપી, જ્યારે મોહમ્મદ ઇમરાન રંધાવાએ 2 વિકેટ મેળવી. શ્રીલંકાએ 20 ઓવરમાં 182/8નો સ્કોર બનાવ્યો.
183 રનના ટાર્ગેટને ચેઝ કરતાં પાકિસ્તાને ઝડપી શરૂઆત કરી. ઓપનર ફખર ઝમાન અને સાહિબઝાદા ફરહાને પાંચમી ઓવરમાં ટીમનો સ્કોર 50 રનને પાર પહોંચાડી દીધો. ફખર ઝમાન 13 બોલમાં 21 રન બનાવીને પાવરપ્લેની છેલ્લી ઓવરમાં આઉટ થયો.
આ પછી સદાકતે ફરહાનનો સાથ આપ્યો. બંનેએ બીજી વિકેટ માટે 52 બોલમાં 92 રનની ભાગીદારી કરી. સદાકત 50 રન બનાવીને 14મી ઓવરમાં આઉટ થયો.
ત્યારબાદ શ્રીલંકાએ વધુ કેટલીક વિકેટ લઈને વાપસી કરવાનો પ્રયાસ કર્યો, પરંતુ ફરહાન ક્રિઝ પર ટકી રહ્યો. તે 89 રન બનાવીને 18મી ઓવરમાં આઉટ થયો. અંતે ખ્વાજા નફેએ છગ્ગો ફટકારીને પાકિસ્તાનને જીત અપાવી.