અમદાવાદના સાઉથ બોપલ ખાતે આવેલા ઓશિયા મોલના સંચાલક સામે વેપારીઓએ રૂ. 365 કરોડથી વધુની છેતરપિંડીનો આક્ષેપ કર્યો છે. આ મામલે અમદાવાદ, સુરત, વડોદરા અને મુંબઈના 50થી વધુ વેપારીઓએ સાઉથ બોપલ ખાતે બેઠક યોજીને આગળની કાયદાકીય લડત માટે રણનીતિ તૈયાર કરી હોવાનું જાણવા મળે છે.
વેપારીઓના જણાવ્યા અનુસાર, ઓશિયા મોલના સંચાલકે રિટેલ ચેન મારફતે અલગ-અલગ વેપારીઓ પાસેથી માલ મેળવ્યો હતો, પરંતુ તેની ચુકવણી કરવામાં આવી ન હતી. 7 જુલાઈના રોજ આ મામલે CID ક્રાઇમમાં ફરિયાદ કરવામાં આવી હતી. ફરિયાદ બાદ તપાસ દરમિયાન અત્યાર સુધીમાં 17 વેપારીઓના નિવેદન નોંધવામાં આવ્યા છે.
પ્રાથમિક માહિતી મુજબ, આશરે 325 જેટલા રજિસ્ટર્ડ વેપારીઓ પાસેથી માલ ખરીદવામાં આવ્યો હોવાની માહિતી સામે આવી છે. આ મામલે વધુ વેપારીઓના નિવેદનો અને દસ્તાવેજો પણ તપાસનો ભાગ બની શકે છે. વેપારીઓનો દાવો છે કે અત્યાર સુધીમાં કુલ રૂ. 365 કરોડની છેતરપિંડી થઈ હોવાનો અંદાજ છે. જોકે, આ આંકડો વેપારીઓ દ્વારા કરવામાં આવેલો દાવો છે અને સત્તાવાર તપાસ બાદ જ સંપૂર્ણ રકમ અંગે સ્પષ્ટતા થઈ શકશે.
વેપારીઓએ ઓશિયા મોલના સંચાલક સામે અન્ય ગંભીર આક્ષેપો પણ કર્યા છે. જેમાં NSEમાં શેરના ભાવમાં અપડાઉન કરી કમાણી કરવામાં આવી હોવાનો આક્ષેપ સામેલ છે. વેપારીઓનો આરોપ છે કે તેમની સાથે ઇરાદાપૂર્વક છેતરપિંડી કરવામાં આવી છે. આ આક્ષેપોની સત્યતા અંગે સંબંધિત તપાસ એજન્સીઓની તપાસ અને ઉપલબ્ધ નાણાકીય દસ્તાવેજોના આધારે જ અંતિમ સ્થિતિ સ્પષ્ટ થઈ શકશે.
હાલ વિવિધ મોલના બુક્સ ઓફ એકાઉન્ટ અને એકાઉન્ટ સંબંધિત માહિતી મંગાવી તપાસ કરવામાં આવી રહી હોવાનું વેપારીઓએ જણાવ્યું છે. વેપારીઓએ સમગ્ર નાણાકીય વ્યવહારોની તપાસ માટે ફોરેન્સિક ઓડિટ કરાવવાનો નિર્ણય કર્યો છે. આ માટે એજન્સીની શોધખોળ કરવામાં આવી રહી છે. ફોરેન્સિક ઓડિટના માધ્યમથી મોલના નાણાકીય વ્યવહારો, એકાઉન્ટ્સ અને વેપારીઓ સાથે થયેલા વ્યવહારોની તપાસ કરાવવાની તૈયારી છે.
વેપારીઓ હવે માત્ર પોલીસ ફરિયાદ પૂરતી કાર્યવાહી નહીં, પરંતુ NCLT (નેશનલ કંપની લો ટ્રિબ્યુનલ)ના માધ્યમથી પણ ઓશિયાના સંચાલક સામે કાયદાકીય લડત આપવા નવી રણનીતિ બનાવી રહ્યા છે. બેઠકમાં આગામી સમયમાં કાયદાકીય કાર્યવાહી વધુ મજબૂત બનાવવાનો નિર્ણય લેવામાં આવ્યો હોવાનું જાણવા મળે છે. વેપારીઓએ પોતાના બાકી નાણાંની વસૂલાત અને સમગ્ર મામલાની નિષ્પક્ષ તપાસ માટે સંગઠિત રીતે આગળ વધવાની તૈયારી દર્શાવી છે.