ઓસ્કાર 2027માં ભારતની સત્તાવાર એન્ટ્રી મરાઠી ફિલ્મ 'ગોંધલ' ઉપરાંત નાગાલેન્ડની કોન્યાક ભાષાની ફિલ્મ 'અંગ' પણ રેસમાં છે. સામાન્ય રીતે દરેક દેશ ઓસ્કારમાં એક જ સત્તાવાર ફિલ્મ મોકલી શકે છે. ફિલ્મ ફેડરેશન ઓફ ઇન્ડિયાએ આ વર્ષે 'ગોંધલ'ને ભારતની સત્તાવાર એન્ટ્રી બનાવી છે. પરંતુ 'અંગ' સત્તાવાર એન્ટ્રી ન હોવા છતાં ઓસ્કારની રેસમાં પહોંચી ગઈ છે.
આ માટે ઓસ્કાર એકેડેમીના નવા નિયમ અને ટોરોન્ટો ઇન્ટરનેશનલ ફિલ્મ ફેસ્ટિવલમાં મળેલી સફળતા જવાબદાર છે. ઓસ્કાર 2026થી એકેડેમીએ નિયમ લાગુ કર્યો છે કે જો કોઈ બિન-અંગ્રેજી ફિલ્મ વિશ્વના છ પ્રમુખ ફિલ્મ ફેસ્ટિવલ (ટોરોન્ટો, કાન, બર્લિન, વેનિસ, બુસાન અને સનડાન્સ)માં કોઈ મોટો એવોર્ડ જીતે, તો તેને 'બેસ્ટ ઇન્ટરનેશનલ ફીચર ફિલ્મ' કેટેગરીમાં સીધી વિચારણા માટે લઈ શકાય.
20 સપ્ટેમ્બર 2026ના રોજ 'અંગ'એ ટોરોન્ટો ઇન્ટરનેશનલ ફિલ્મ ફેસ્ટિવલમાં 'પ્લેટફોર્મ એવોર્ડ' અને 20,000 કેનેડિયન ડોલરનું ઇનામ જીત્યું. આ જીતને કારણે તેને દેશની સત્તાવાર એન્ટ્રી બન્યા વિના જ ઓસ્કાર સુધી પહોંચવાનો સીધો રસ્તો મળી ગયો.
'અંગ' 1962-1963ના નાગાલેન્ડની વાર્તા છે, જ્યારે નાગાલેન્ડને રાજ્યનો દરજ્જો મળવાનો બાકી હતો. આ ફિલ્મ કોન્યાક સમુદાય પર આધારિત છે, જે પ્રકૃતિ પૂજા અને દુશ્મનોના માથા કાપવાની પ્રથા માટે જાણીતો હતો. વાર્તા ગામના વૃદ્ધ મુખિયા (જેમને 'અંગ' કહેવાય છે) અને એક અમેરિકન મિશનરી વચ્ચેના સંઘર્ષની છે. મિશનરીના આગમનથી ધીમે ધીમે આખું ગામ ખ્રિસ્તી ધર્મ અપનાવે છે, જે જૂની પરંપરાઓને વળગી રહેલા મુખિયાને વિશ્વાસઘાત લાગે છે. આ ધાર્મિક અને સાંસ્કૃતિક સંઘર્ષની સીધી અસર મુખિયા અને તેના પુત્રના સંબંધો પર પડે છે. 1960ના દાયકાનો અસલી લુક આપવા માટે ફિલ્મ સંપૂર્ણપણે કોન્યાક ભાષામાં અને 16mm કેમેરાથી શૂટ કરવામાં આવી છે.
ફિલ્મના ડાયરેક્ટર 31 વર્ષીય તેજા રિયો છે, જેઓ નાગાલેન્ડના મુખ્યમંત્રી નેઇફિયુ રિયોના ભત્રીજા છે. યુકેની ફિલ્મ સ્કૂલમાંથી ભણેલા તેજા રિયોએ 2021માં 'અંગ' નામની શોર્ટ ફિલ્મ બનાવી હતી, જેને વિસ્તૃત કરીને આ ફીચર ફિલ્મ બનાવવામાં આવી છે. ફિલ્મમાં મુખિયાનું ગંભીર પાત્ર સ્થાનિક સ્ટેન્ડ-અપ કોમેડિયન એંગલોંગ કોન્યાકે ભજવ્યું છે, જ્યારે અમેરિકન મિશનરીના રોલમાં બ્રિટિશ એક્ટર ડગ્લાસ હેનશાલ જોવા મળે છે. અન્ય કલાકારોમાં સોબિનો રેંગમા, ગેનપાઈ કોન્યાક અને વાંગટન કોન્યાકનો સમાવેશ થાય છે.
ફિલ્મના નિર્માતા નેન્સી નિસા બેસો (41) અને વર્લ્ડ સેલ્સ એજન્ટ ગૌરવ ઢીંગરા (47) માટે ઓસ્કાર સુધીની સફર સહેલી નથી. ઓસ્કાર રેસમાં હોય તેવી ફિલ્મોના પ્રચાર માટે મોટો ખર્ચ થાય છે. ભારતની સત્તાવાર એન્ટ્રી 'ગોંધલ'ને સરકાર તરફથી 1 કરોડ રૂપિયાની આર્થિક સહાય મળશે, પરંતુ 'અંગ' સત્તાવાર એન્ટ્રી ન હોવાથી ઓસ્કારમાં લોબિંગનો તમામ ખર્ચ નિર્માતાઓએ જાતે ઉઠાવવો પડશે. ગૌરવ ઢીંગરા અને બેસો આશાવાદી છે. તેઓ માને છે કે ટોરોન્ટો એવોર્ડ જીતવાને કારણે ઓસ્કારના વોટર્સ 'અંગ' વિશે પહેલેથી જાણે છે, જે તેમના માટે ફાયદો બની શકે છે.