એક સમયે ભારત અને બ્રાઝિલમાં ખૂબ લોકપ્રિય રહેલું સોશિયલ નેટવર્કિંગ પ્લેટફોર્મ ઓરકુટ ફરી શરૂ થવાની ચર્ચા વચ્ચે તેના સ્થાપક ઓરકુટ બુયુક્કોક્ટેને લોકોને આ પહેલને સમર્થન આપવા અપીલ કરી છે. નવા પ્લેટફોર્મમાં મિત્રતા, સમુદાય અને વાસ્તવિક માનવ જોડાણ પર ધ્યાન કેન્દ્રિત કરવામાં આવશે. જોકે, હજુ સુધી લોન્ચિંગની કોઈ તારીખ જાહેર કરવામાં આવી નથી.
ગુરુવારે બુયુક્કોક્ટેને X પર એક પોસ્ટ શેર કરી હતી, જેમાં લોકોને આ પહેલને ટેકો આપવા વિનંતી કરી હતી. તેમણે કહ્યું કે ઇન્ટરનેટ લોકોને મિત્રો બનાવવામાં, સમુદાયો ઊભા કરવામાં અને પોતાનાપણાની ભાવના અનુભવવામાં મદદ કરશે. તેમણે યુઝર્સને સત્તાવાર વેબસાઇટ orkut.com પર તેમનું નામ ઉમેરવા અને મિત્રો સાથે સપોર્ટર કાર્ડ શેર કરવા જણાવ્યું હતું.
ઓરકુટ ઇન્ટરનેટના શરૂઆતના સમયની લોકપ્રિય સોશિયલ નેટવર્કિંગ સેવા હતી. તેને ગૂગલના એન્જિનિયર ઓરકુટ બુયુક્કોક્ટેને બનાવી હતી અને તેનું સંચાલન Google દ્વારા કરવામાં આવતું હતું. જાન્યુઆરી 2004માં લોન્ચ થયેલું આ પ્લેટફોર્મ ભારત અને બ્રાઝિલ જેવા દેશોમાં ખૂબ લોકપ્રિય બન્યું હતું. યુઝર્સ પોતાની પ્રોફાઇલ બનાવી શકતા, કમ્યુનિટી, ટેસ્ટિમોનિયલ્સ અને ફ્રેન્ડ નેટવર્ક દ્વારા એકબીજા સાથે જોડાઈ શકતા હતા.
જોકે, સમય જતાં ફેસબુક અને ઇન્સ્ટાગ્રામ જેવા પ્લેટફોર્મની લોકપ્રિયતા વધતા Googleએ સપ્ટેમ્બર 2014માં ઓરકુટને બંધ કરી દીધું હતું.
ઓરકુટની વેબસાઇટ પર લખેલા ખુલ્લા પત્રમાં બુયુક્કોક્ટેને પ્લેટફોર્મ ફરી શરૂ કરવા પાછળનું કારણ સમજાવ્યું છે. તેમણે જણાવ્યું કે છેલ્લા બે દાયકામાં સોશિયલ મીડિયાની દુનિયા ઘણી બદલાઈ ગઈ છે. આજના પ્લેટફોર્મ લોકો વચ્ચે અર્થપૂર્ણ સંબંધો બનાવવાને બદલે યુઝર્સને વધુ સમય સુધી પ્લેટફોર્મ પર વ્યસ્ત રાખવાને પ્રાથમિકતા આપે છે. તેમના મતે, સોશિયલ મીડિયાનો મુખ્ય હેતુ લોકો વચ્ચે મિત્રતા, વિશ્વાસ અને વાસ્તવિક સંબંધો મજબૂત બનાવવાનો હોવો જોઈએ.
પોતાના ખુલ્લા પત્રમાં તેમણે લખ્યું કે તેઓ ઇન્ટરનેટનું એક અલગ ભવિષ્ય જુએ છે, જે વાસ્તવિક લોકોની આસપાસ રચાયેલું હોય. તેમણે કહ્યું કે તેઓ એવું ઇન્ટરનેટ ઇચ્છે છે, જ્યાં દરેક મેસેજની બીજી તરફ એક વાસ્તવિક વ્યક્તિ હોય. તેમના જણાવ્યા અનુસાર, ભવિષ્યનું સોશિયલ મીડિયા માત્ર એલ્ગોરિધમ, વ્યૂઝ અને યુઝર્સને વધુ સમય સુધી વેબસાઇટ પર રોકી રાખવાની પદ્ધતિ પર આધારિત ન હોવું જોઈએ. તેમણે ઉમેર્યું કે આવનારી પેઢી વધુ સારી ડિજિટલ દુનિયાની હકદાર છે, જ્યાં સમુદાયો સકારાત્મકતા, જિજ્ઞાસા, મિત્રતા, વિશ્વાસ અને પરસ્પર જોડાણને પ્રોત્સાહન આપે.
ઓરકુટના સ્થાપકે લોકોને આ પહેલમાં જોડાવા માટે પોતાના મિત્રો અને પરિચિતોને આમંત્રિત કરવાની અપીલ કરી છે. તેમણે સમર્થકોને પોતાના સપોર્ટર કાર્ડ શેર કરવા જણાવ્યું છે, જેથી પ્રસ્તાવિત પ્લેટફોર્મની આસપાસ મજબૂત કમ્યુનિટી તૈયાર થઈ શકે. તેમણે લોકોને એવા મિત્રો અને પરિચિતોનો સંપર્ક કરવા કહ્યું છે, જેમને તેઓ આ અભિયાન સાથે જોડવા ઇચ્છે છે. તેમણે મિત્રો પ્રત્યે લાગણી વ્યક્ત કરવા અને તેઓ તેમના જીવનમાં શા માટે ખાસ છે તે જણાવવા પણ પ્રોત્સાહિત કર્યા છે.
ઓરકુટની વાપસીને લઈને ચર્ચા શરૂ થઈ ગઈ છે, પરંતુ અત્યાર સુધી પ્લેટફોર્મ ફરી ક્યારે લોન્ચ થશે તેની કોઈ સત્તાવાર તારીખ જાહેર કરવામાં આવી નથી. હાલમાં તેના સ્થાપક લોકોનું સમર્થન એકત્રિત કરી રહ્યા છે અને પ્લેટફોર્મની આસપાસ નવી કમ્યુનિટી ઊભી કરવાનો પ્રયાસ કરી રહ્યા છે.
બુયુક્કોક્ટેનનું માનવું છે કે મિત્રતા અને સમુદાય જ જીવનને સાચો અર્થ આપે છે. તેથી ઇન્ટરનેટનું ધ્યાન લોકોનું ધ્યાન આકર્ષિત કરવા કરતાં વાસ્તવિક માનવીય સંબંધો મજબૂત બનાવવા પર હોવું જોઈએ.