દેશમાં ચૂંટણી પ્રક્રિયા અને મતદાર યાદીમાં કથિત ગરબડને લઈને વિપક્ષી દળોએ કેન્દ્ર સરકાર અને ચૂંટણી પંચ સામે મોરચો ખોલ્યો છે. 'ઇન્ડિયા' (I.N.D.I.A.) ગઠબંધને મુખ્ય ચૂંટણી કમિશનર (CEC) જ્ઞાનેશ કુમાર સામે જન મહાભિયોગ (પબ્લિક ઇમ્પીચમેન્ટ) લાવવાની જાહેરાત કરી છે. આ અંગે કોંગ્રેસના જનરલ સેક્રેટરી કે.સી. વેણુગોપાલે માહિતી આપી છે.
આ ઝુંબેશ અંતર્ગત 30મી ઓક્ટોબરે દિલ્હીમાં એક વિશેષ 'મૉક પાર્લિયામેન્ટ' (સંસદ)નું આયોજન કરવામાં આવશે. દિલ્હીની અશોક હોટેલ અથવા અન્ય નિર્ધારિત સ્થળે યોજાનારી આ મૉક સંસદમાં મુખ્ય ચૂંટણી કમિશનર જ્ઞાનેશ કુમારને પદ પરથી હટાવવા માટે જનતાનો નિર્ણય જાહેરમાં સંભળાવવામાં આવશે.
વિપક્ષનો આક્ષેપ છે કે એસઆઈઆર (SIR) પ્રક્રિયામાં થયેલી ગરબડોના કારણે મોટી સંખ્યામાં નાગરિકોના નામ મતદાર યાદીમાંથી કમી કરવામાં આવ્યા છે, જેના દ્વારા ચૂંટણીને પ્રભાવિત કરવાનો પ્રયાસ કરવામાં આવ્યો છે. આ જ મુદ્દે વિપક્ષ સતત CECના રાજીનામાની માંગ કરી રહ્યો છે.
મૉક પાર્લિયામેન્ટના આયોજન બાદ આગામી પહેલી નવેમ્બરે 'વોટ ચોરી' વિરુદ્ધ 'દિલ્હી ચલો માર્ચ' કાઢવામાં આવશે. આ માર્ચ દિલ્હીના પ્રખ્યાત રામલીલા મેદાનમાં એક વિશાળ જનસભા સાથે પૂર્ણ થશે. કોંગ્રેસ અધ્યક્ષ મલ્લિકાર્જુન ખડગે દ્વારા ગઠબંધનના તમામ પક્ષોનો સંપર્ક સાધીને પોતાના નેતાઓ અને કાર્યકર્તાઓને મોટી સંખ્યામાં દિલ્હી ઉપસ્થિત રહેવા અપીલ કરવામાં આવી છે.