નવી દિલ્હી: મુખ્ય ચૂંટણી કમિશનર જ્ઞાનેશ કુમાર અને ચૂંટણી યાદીમાં થયેલા ફેરફાર (SIR) વિરુદ્ધ વિપક્ષના પ્રદર્શનનો શુક્રવારે ચોથો દિવસ છે. INDIA જૂથના સાંસદો સાંજે સંસદ પહોંચ્યા છે. તેમની સંવિધાન સદનના સેન્ટ્રલ હોલમાં બેઠક યોજાશે.
પશ્ચિમ બંગાળના મુખ્યમંત્રી મમતા બેનરજી પહેલીવાર આ પ્રદર્શનમાં જોડાયા છે. સૂત્રોના જણાવ્યા અનુસાર, તેઓ સંસદમાં પ્રિયંકા ગાંધી સાથે વાતચીત કરતા જોવા મળ્યા હતા. કોંગ્રેસના નેતા રાહુલ ગાંધી પણ સંસદ પહોંચી ગયા છે અને વિપક્ષી નેતાઓ સાથે બેઠક કરી રહ્યા છે.
INDIA જૂથના નેતાઓ શુક્રવારે રાત્રે 8 વાગ્યે રાષ્ટ્રપતિ દ્રૌપદી મુર્મૂને મળવાના છે. તેઓ SIRમાં થયેલી કથિત ગેરરીતિઓ અંગે પોતાની ચિંતા વ્યક્ત કરશે અને મુખ્ય ચૂંટણી કમિશનર જ્ઞાનેશ કુમારના રાજીનામાની માંગણી કરશે.
આ મુલાકાત બાદ વિપક્ષી સાંસદો ગૃહમંત્રી, વડાપ્રધાન આવાસ, સેવા તીર્થ અથવા ઉપરાષ્ટ્રપતિ આવાસ તરફ કૂચ કરી શકે છે. જોકે, આ માર્ચ થશે કે નહીં તે અંગે હજુ સ્પષ્ટતા નથી.
સતત ચાલી રહેલા વિરોધ પ્રદર્શનોને ધ્યાનમાં રાખીને દિલ્હી પોલીસે જ્ઞાનેશ કુમારના સરકારી આવાસ અને ચૂંટણી પંચની કચેરીની આસપાસ સુરક્ષા વધારી દીધી છે. સૂત્રોના જણાવ્યા અનુસાર, 9 થી 12 ઓક્ટોબર વચ્ચે દિલ્હીમાં આશરે 23,000 સુરક્ષાકર્મીઓ તૈનાત કરવામાં આવી શકે છે. કુમારને હાલમાં ઝેડ-પ્લસ કેટેગરીની સુરક્ષા મળી રહી છે, જેમાં દિલ્હી પોલીસના 32 સુરક્ષાકર્મીઓ સામેલ છે.
કાયદો અને વ્યવસ્થા જાળવવા માટે દિલ્હીની તમામ દારૂની રિટેલ દુકાનો 9 અને 10 ઓક્ટોબરે બંધ રહેશે. દિલ્હી હાઈકોર્ટ શુક્રવારે ઈન્ડિયન યુથ કોંગ્રેસની અરજી પર સુનાવણી કરી શકે છે, જેમાં જંતર-મંતર પર વિરોધ પ્રદર્શન કરવાની મંજૂરી માંગવામાં આવી છે.
અત્યાર સુધીમાં, દિલ્હીમાં પ્રદર્શન દરમિયાન થયેલા ઘર્ષણોને લઈને રાહુલ ગાંધી અને પ્રિયંકા ગાંધી વિરુદ્ધ 4 FIR નોંધાઈ ચૂકી છે. કનોટ પ્લેસ વિસ્તારમાં કાશ્મીરી યુવક પર થયેલા હુમલાના મામલે પણ પોલીસે અજાણ્યા લોકો વિરુદ્ધ FIR નોંધી છે. આ ઘટના ગુરુવારે કોંગ્રેસના પ્રદર્શનના થોડા સમય પહેલાં બની હતી.
ઉલ્લેખનીય છે કે, ગઈકાલે (ગુરુવારે) રાહુલ અને પ્રિયંકા ગાંધીએ રાજઘાટ પર બાપુને શ્રદ્ધાંજલિ આપી હતી. કોંગ્રેસ અધ્યક્ષ મલ્લિકાર્જુન ખડગેએ કહ્યું હતું કે સરકાર મત આપવાનો અધિકાર છીનવી રહી છે. તેમણે એમ પણ કહ્યું કે સરકાર ડરી ગઈ છે, અને જે ડરે છે તે મરે છે. બીજી તરફ, વેણુગોપાલે દિલ્હીમાં અઘોષિત ઈમરજન્સી જેવી સ્થિતિ હોવાનો આરોપ લગાવ્યો હતો.